‘तुम्ही दुसरी नोकरी शोधा'; डोनाल्ड ट्रम्प दुसरा सर्वात मोठा धक्का देण्याच्या तयारीत...

अमेरिकेचे राष्ट्राध्यक्ष डोनाल्ड ट्रम्प यांनी पुन्हा एकदा भारताला रशियाकडून तेल खरेदी करण्याच्या मुद्द्यावरून कठोर इशारा दिला आहे. त्यांनी पोलंडचे राष्ट्राध्यक्ष करोल नवरोकी यांच्यासोबतच्या द्विपक्षीय बैठकीनंतर पत्रकारांशी बोलताना हे वक्तव्य केले. एका पोलिश पत्रकाराने रशियावर कारवाई न केल्याबद्दल विचारणा केल्यावर ट्रम्प संतापले आणि त्यांनी थेट भारतावर टीका केली, ज्यामुळे भारत-अमेरिका संबंधांमध्ये तणाव निर्माण होण्याची शक्यता आहे.

'मी अजून दुसरा आणि तिसरा टप्पा लागू केला नाही'

पत्रकाराने विचारले, "तुम्ही पुतिनबद्दल नाराजी जाहीर केली, पण त्यांच्यावर कोणतीही कारवाई केली नाही." या प्रश्नावर ट्रम्प संतापले. त्यांनी म्हटले की, "तुम्हाला कसे समजले की, मी कोणतीही कारवाई केली नाही? तुम्ही म्हणाल, रशियाकडून तेल खरेदी करणारा चीन सर्वात मोठा देश आहे, मग भारतावर कारवाई करणे योग्य आहे का? पण मी तुम्हाला सांगतो की, शेकडो अब्ज डॉलरचे नुकसान झाले आहे. तरीही तुम्ही म्हणणार कोणतीही कारवाई नाही? मी अजून दुसरा आणि तिसरा टप्पा लागू केला नाहीये."

यादरम्यान, ट्रम्प यांनी पत्रकारांना थेट धमकी दिली, "जर तुम्हाला इतके मोठे नुकसान होऊनही दिसत नसेल, तर मला वाटते की, तुम्ही नक्कीच दुसरी नोकरी शोधली पाहिजे." त्यांचे हे वक्तव्य केवळ पत्रकारांसाठी नव्हते, तर भारत आणि इतर देशांसाठीही एक अप्रत्यक्ष इशारा होता.

भारताला थेट धमकी

ट्रम्प यांनी दोन आठवड्यांपूर्वीच भारताला इशारा दिल्याचे सांगितले. "मी दोन आठवड्यांपूर्वीच स्पष्ट म्हटले होते की, भारत जर रशियाकडून तेल खरेदी करेल, तर त्याला खूप मोठ्या समस्यांना सामोरे जावे लागेल. त्यामुळे नक्कीच मला याबद्दल विचारू नका," असे ते म्हणाले. ट्रम्प यांच्या या वक्तव्यावरून हे स्पष्ट होते की, अमेरिकेला भारताने रशियाकडून तेल खरेदी करणे मान्य नाही आणि ते यापुढेही भारतावर दबाव आणण्याचा प्रयत्न करत राहतील.

ट्रम्प यांनी यापूर्वीच भारताच्या बहुतांश वस्तूंवर ५०% टॅरिफ (आयात शुल्क) लावला आहे. आता ते म्हणतात की, ते अजूनही दुसऱ्या आणि तिसऱ्या टप्प्यात कारवाई करू शकतात. अमेरिकेने रशियावर लादलेल्या निर्बंधांमुळे रशियाचे मोठे नुकसान होत असले, तरी भारताने अमेरिकेच्या दबावाला बळी न पडता रशियाकडून तेल खरेदी सुरूच ठेवली आहे.

पुढील कारवाईकडे सर्वांचे लक्ष

ट्रम्प प्रशासनाची ही धमकी भारतासाठी एक नवीन आव्हान आहे. आंतरराष्ट्रीय राजकारणात आपला सार्वभौम अधिकार राखूनही भारताने आपली ऊर्जा सुरक्षा जपली आहे. आता डोनाल्ड ट्रम्प भारतावर पुढील कोणती कारवाई करतात, याकडे सर्वांच्या नजरा लागल्या आहेत. भारताला आर्थिक आणि राजनैतिक पातळीवर याचे काय परिणाम भोगावे लागतात, हे येत्या काळातच स्पष्ट होईल.