बांगलादेशाच्या माजी PM शेख हसीना मानवतेविरुद्धच्या 5 गुन्ह्यांमध्ये दोषी; फाशीची शिक्षा सुनावली!

Sheikh Hasina convicted : बांगलादेशच्या राजकारणात मोठी उलथापालथ झाली असून, देशाच्या आंतरराष्ट्रीय गुन्हे न्यायाधिकरणाने (International Crimes Tribunal) माजी पंतप्रधान शेख हसीना यांना गंभीर गुन्ह्यांमध्ये दोषी ठरवले आहे. हसीना यांच्यावर मानवतेविरुद्धचे आणि युद्धगुन्ह्यांचे असे एकूण 5 आरोप सिद्ध झाले आहेत, ज्यामुळे त्यांना मृत्युदंडाची शिक्षा सुनावण्यात आली आहे.

5 गुन्हे आणि मृत्यूदंडाची शिक्षा!

शेख हसीना यांच्यावर खून, गुन्हे रोखण्यात अपयश आणि मानवतेविरुद्ध गुन्ह्यांसह अनेक आरोप सिद्ध झाले आहेत. न्यायालयाचा हा महत्त्वाचा निकाल थेट प्रसारित करण्यात आला. या निकालामुळे बांगलादेशात तीव्र पडसाद उमटले असून, देशभर हिंसक निदर्शने सुरू आहेत. परिस्थितीचे गांभीर्य ओळखून सरकारने संपूर्ण देशात हाय अलर्ट जाहीर केला आहे.

ढाक्यामध्ये तणाव

राजधानी ढाका येथे १५,००० हून अधिक पोलीस कर्मचारी तैनात करण्यात आले आहेत. हिंसक निदर्शकांना दिसताच गोळ्या घालण्याचे (Shoot at Sight) आदेश देण्यात आले आहेत.

हिंसाचार

शनिवारी रात्री उशिरा ते रविवारी पहाटे दरम्यान ढाकामध्ये दोन बसेस जाळण्यात आल्या. निकालामुळे आणखी हिंसाचार होण्याची शक्यता असल्याने देशभरातील सुरक्षा व्यवस्था कडक करण्यात आली आहे.

माजी आयजीपी मामून यांची माफी

या खटल्यातील एक महत्त्वाचा दुवा म्हणजे बांगलादेशचे माजी आयजीपी मामून, यांनी न्यायालयात माफी मागितली आहे.

मामून यांनी न्यायालयात सांगितले की, त्यांनी तपासात पूर्ण सहकार्य केले आहे आणि हिंसाचारात आपला सहभाग कबूल केला आहे.

या प्रकरणात चार जणांनी मिळून कट रचला होता आणि ते सर्वजण पंतप्रधानांच्या निवासस्थानी दररोज भेटत असत, अशी माहिती त्यांनी दिली.

आपल्या ३६ वर्षांच्या सेवेत कोणताही गुन्हा केला नसल्याचे सांगत, या घटनेमुळे आपली प्रतिमा डागाळली असल्याचे मामून यांनी नमूद केले.

मामून यांचे युक्तिवाद ऐकल्यानंतर, न्यायालयाने 'आम्ही कमी शिक्षा देऊ, नेमकी शिक्षा नंतर ठरवली जाईल' असे म्हटले आहे. मामून आता माफीचा साक्षीदार बनले आहेत.

मुलगा साजीब वाजेद यांचा दावा: "आई भारतात सुरक्षित"

अल जझीरा या वृत्तसंस्थेनुसार, शेख हसीनांचा मुलगा साजीब वाजेद यांनी काही दिवसांपूर्वी पत्रकारांशी बोलताना महत्त्वाचे विधान केले होते. त्यांना आधीच कल्पना होती की त्यांच्या आईला मृत्युदंडाची शिक्षा सुनावण्यात येईल. वाजेद यांनी दावा केला की, शेख हसीना भारतात सुरक्षित आहेत आणि भारतीय सुरक्षा संस्था त्यांचे पूर्ण संरक्षण करतील.

हसीना पाच वेळा पंतप्रधान राहिल्या असल्याने आणि त्यांचा पक्ष (अवामी लीग) देशातील दोन सर्वात मोठ्या पक्षांपैकी एक असल्याने, त्यांचे समर्थक न्यायालयाचा हा निर्णय सहजासहजी स्वीकारणार नाहीत, असे मत वाजेद यांनी व्यक्त केले.

तिन्ही आरोपी कुठे आहेत?

शेख हसीना व्यतिरिक्त, या प्रकरणातील इतर दोन आरोपी माजी गृहमंत्री असदुज्जमान खान आणि माजी आयजीपी चौधरी अब्दुल्ला अल-मामुन आहेत. तीन आरोपींपैकी शेख हसीना आणि असदुज्जमान फरार आहेत. दोघेही आता भारतात राहत आहेत. त्याच वेळी, तिसरा आरोपी चौधरी अब्दुल्ला अल-मामुन सरकारी साक्षीदार बनला आहे.