रक्तपातानंतर बांगलादेशात निवडणूका! 12 फेब्रुवारीला मतदान, कोण ठरणार प्रबळ, कुणाचे मोठे आव्हान? वाचा

Bangladesh election 2026 : ऑगस्ट २०२४ मध्ये झालेल्या तीव्र विद्यार्थी आंदोलनामुळे शेख हसीना यांचे सरकार कोसळल्यानंतर, बांगलादेश एका नव्या राजकीय पर्वाच्या उंबरठ्यावर उभा आहे. नोबेल पारितोषिक विजेते मुहम्मद युनूस यांच्या नेतृत्वाखालील अंतरिम सरकारच्या देखरेखीखाली, देशात लोकशाही पुनर्स्थापित करण्यासाठी १२ फेब्रुवारी रोजी सार्वत्रिक निवडणुकीची घोषणा करण्यात आली आहे.

ही निवडणूक केवळ नव्या सरकारची निवड करणार नाही, तर देशाच्या राजकीय भविष्याची दिशा ठरवणारी एक अग्निपरीक्षा ठरणार आहे. प्रमुख राजकीय पक्षांच्या चुरशीसोबतच मोठ्या संख्येने उभे असलेले अपक्ष उमेदवार या निवडणुकीत 'किंगमेकर' ठरू शकतात.

राजकीय आखाडा: कुणाचे किती उमेदवार?

या निवडणुकीत सत्तेसाठी बहुरंगी लढत पाहायला मिळत आहे. माजी पंतप्रधान खालेदा झिया यांच्या बांगलादेश नॅशनलिस्ट पार्टीने (BNP) सर्वाधिक २८८ उमेदवार उतरवून सत्तेत परतण्याचा निर्धार केला आहे. त्यांना इतर पक्षांकडून कडवे आव्हान मिळत आहे.

• प्रमुख पक्षांचे बलाबल खालीलप्रमाणे
• बांगलादेश नॅशनलिस्ट पार्टी (BNP): २८८ उमेदवार
• इस्लामिक आंदोलन बांगलादेश: २५३ उमेदवार
• जमात-ए-इस्लामी: २२४ उमेदवार
• जातिय पार्टी: १९२ उमेदवार
• नॅशनल सिटिझन्स पार्टी: ३२ उमेदवार

अपक्षांची भूमिका ठरणार निर्णायक

या निवडणुकीचे सर्वात मोठे वैशिष्ट्य म्हणजे तब्बल २४९ अपक्ष उमेदवारांची उपस्थिती. अनेक मतदारसंघांमध्ये हे अपक्ष उमेदवार प्रस्थापित पक्षांची मतं विभागून निकालांवर थेट परिणाम करू शकतात. निवडणुकीनंतर कोणत्याही पक्षाला स्पष्ट बहुमत न मिळाल्यास, सरकार स्थापनेसाठी या अपक्ष उमेदवारांची भूमिका अत्यंत महत्त्वाची ठरू शकते, ज्यामुळे ते 'किंगमेकर' म्हणून उदयास येण्याची शक्यता आहे.

अंतरिम सरकारसमोर निष्पक्ष निवडणुकीचे आव्हान

मुख्य सल्लागार मुहम्मद युनूस यांच्या नेतृत्वाखालील अंतरिम सरकारने निवडणूक वेळेवर, शांततेत आणि निष्पक्ष वातावरणात पार पडेल, असे आश्वासन दिले आहे. "काहीही झाले तरी निवडणूक १२ फेब्रुवारीलाच होईल, एक दिवस मागे-पुढे नाही," असे युनूस यांनी स्पष्ट केले आहे. निवडणुकीदरम्यान पसरवल्या जाणाऱ्या खोट्या बातम्यांपासून (फेक न्यूज) सावध राहण्याचे आवाहनही त्यांनी जनतेला केले आहे.

असा आहे निवडणूक कार्यक्रम आणि सुरक्षा व्यवस्था

• निवडणुकीचा प्रचार २२ जानेवारीपासून सुरू झाला असून तो १० फेब्रुवारीच्या सकाळी ७:३० वाजता संपेल.
• १२ फेब्रुवारी रोजी सकाळी ७:३० ते दुपारी ४:३० या वेळेत मतदानासोबतच एका राष्ट्रीय सार्वमतासाठीही मतदान होणार आहे.
• या संपूर्ण प्रक्रियेसाठी ८ लाखांपेक्षा जास्त मतदान अधिकाऱ्यांना प्रशिक्षण दिले जात आहे.

हेही वाचा : पंतप्रधान मोदी आणि मोहम्मद युनूस यांची बँकॉकमध्ये भेट, भारत-बांगलादेश संबंध सुधारतील का?