'Labubu Doll' राक्षसाचे रूप की फक्त अफवा?, सोशल मीडियावर लाबुबू विषयी भीती अन् रहस्यमय थरार!

What is Labubo doll : सोशल मीडियावर कधी कोणती गोष्ट व्हायरल होईल, याचा नेम नाही. सध्या अशीच एक विचित्र दिसणारी बाहुली, 'लाबुबू' बाहुली (Labubu) प्रचंड लोकप्रिय झाली आहे. ही बाहुली पाहून अनेकांना आश्चर्य वाटते, तर काही जण घाबरतातही. काही लोक तर तिला 'राक्षसी बाहुली' किंवा 'राक्षसाचे दुसरे रूप' म्हणू लागलेत.

असे म्हटले जाते की, ही बाहुली एका प्राचीन राक्षसाशी संबंधित आहे आणि मुलांना देणे धोकादायक ठरू शकते. पण यामागे सत्य काय आहे? ही केवळ अफवा आहे की, काहीतरी वेगळे? चला, या रहस्यमय बाहुलीमागचे संपूर्ण सत्य जाणून घेऊया.

'राक्षसी' असल्याचा संशय कसा आला?

लाबुबू बाहुली राक्षसी असल्याचा संशय तेव्हा निर्माण झाला, जेव्हा तिचा एक इन्स्टाग्राम व्हिडिओ व्हायरल झाला. या व्हिडिओमध्ये, लाबुबू बाहुली एका भयानक व्यक्तिरेखेसोबत दाखवण्यात आली होती. व्हिडिओमध्ये प्रसिद्ध अॅनिमेटेड सिटकॉम 'द सिम्पसन्स' मधील एक दृश्य जोडण्यात आले होते.

या दृश्यात एक महिला चुकून एका राक्षसी बाहुली विकत घेते आणि ती तिच्या मुलाला देते, त्यानंतर त्या मुलाभोवती विचित्र आणि राक्षसी कृत्ये घडू लागतात. या व्हिडिओमुळेच लाबुबू बाहुलीला राक्षसाचे रूप मानले जाऊ लागले आणि ही गोष्ट सोशल मीडियावर आगीसारखी पसरली.

लाबुबूचे खरे सत्य काय आहे?

• खरं तर, लाबुबू बाहुली दिसायला गोंडस आणि भयानक आहे. ही विचित्र राक्षसी दिसणारी बाहुली हाँगकाँगचे कलाकार केसिंग लंग (Kasing Lung) यांनी बनवली आहे.
• 2015 मध्ये त्यांनी 'द मॉन्स्टर' (The Monsters) नावाची एक चित्र पुस्तक मालिका तयार केली होती. या पुस्तकात लाबुबू नावाचे एक पात्र होते.
• केसिंग यांनी खेळण्यांच्या दुकानातील प्रसिद्ध ब्रँड 'पॉप मार्ट' (Pop Mart) च्या सहकार्याने या पात्राला बाहुलीचे रूप देऊन बाजारात आणले.
• या बाहुलीचे डोळे राक्षसांसारखे मोठे आणि कान सशासारखे मोठे आहेत, तसेच तिच्या चेहऱ्यावर एक धोकादायक हास्य आहे. पहिल्यांदाच ही बाहुली पाहिल्यावर खरोखर भीती वाटू शकते.

लाबुबू बाहुली कशी विकली जाते?

लाबुबू बाहुली ज्या पद्धतीने विकली जाते, ते देखील तिच्या व्हायरल होण्यामागे एक मोठे कारण मानले जाते. ही बाहुली 'ब्लाइंड बॉक्स' मध्ये येते, म्हणजे बाहुली खरेदी करणाऱ्या व्यक्तीला तिच्या बॉक्समध्ये कोणती विशिष्ट लाबुबू बाहुली मिळणार आहे, हे माहीत नसते. अशा परिस्थितीत खरेदीदाराच्या मनात उत्सुकता आणि आश्चर्य दोन्ही असते.

आता या बाहुलीची लोकांमध्ये इतकी मागणी वाढली आहे की, पॉप मार्टचे अॅप अमेरिकन अॅप्समध्ये अव्वल स्थानावर पोहोचले आहे आणि कंपनीच्या शेअर्समध्येही लक्षणीय वाढ झाली आहे.

त्यामुळे, 'लाबुबू' ही राक्षसी बाहुली नसून, एका कलाकाराच्या कल्पनेतून जन्माला आलेले आणि मार्केटिंगच्या हटके अंदाजामुळे प्रचंड लोकप्रिय झालेले एक खेळणे आहे हे स्पष्ट होते.

लाबूबू बाहुली लाखो कोटींना विकली जातेय?

लाबूबू बाहुली ही केवळ एक ट्रेंड किंवा शोपीस नाही तर काही लोक ती गुंतवणूक म्हणून देखील खरेदी करत आहेत. अलिकडेच, बीजिंगमध्ये झालेल्या लिलावात, 131 सेमी उंच लाबूबू बाहुली सुमारे 1,08 दशलक्ष युआन म्हणजेच सुमारे 1.2 कोटी रुपयांना विकली गेली. त्याच वेळी, या बाहुलीचे छोटे मॉडेल देखील लाखो रुपयांना विकले जात आहेत.

लाबूबू बाहुली ही एक ट्रेंड बनली आहे ज्याने पॉप संस्कृतीत भीती आणि गोंडसपणाला एकत्रितपणे स्थान दिले आहे. तिचा अनोखा लूक, मर्यादित आवृत्तीची किंमत, सेलिब्रिटी समर्थन आणि सस्पेन्सने भरलेला ब्लाइंड बॉक्स फॉरमॅट, या सर्वांनी मिळून सोशल मीडियाची नवी खळबळ उडवून दिली आहे.