अध्यक्षपद ठरलं ? या बड्या नेत्याने घेतली मोहन भागवतांची भेट, वार फिरलं; भाजप धक्का देण्याच्या तयारीत

केंद्रीय कृषी मंत्री आणि मध्य प्रदेशचे माजी मुख्यमंत्री शिवराज सिंह चौहान यांनी नुकतीच राष्ट्रीय स्वयंसेवक संघाचे सरसंघचालक मोहन भागवत यांची भेट घेतली. ही भेट भाजपच्या आगामी राष्ट्रीय अध्यक्षपदाच्या निवडीच्या पार्श्वभूमीवर झाल्याने, राजकीय वर्तुळात अनेक तर्कवितर्कांना उधाण आलं आहे. या भेटीमुळे आता भाजपच्या सर्वोच्च पदासाठीच्या उमेदवारांमध्ये शिवराज सिंह चौहान यांच्या नावाचा जोरदारपणे विचार केला जात असल्याची चर्चा सुरू झाली आहे.

जवळपास दोन वर्षांनंतर चौहान आणि भागवत यांची ही भेट झाली आहे. सप्टेंबर महिन्यात भाजपच्या राष्ट्रीय अध्यक्षपदासाठी निवडणूक घेण्याचे प्रयत्न सुरू आहेत. उपराष्ट्रपतीपदाची निवडणूक 9 सप्टेंबर रोजी पार पडल्यानंतर, लगेचच अध्यक्षपदाची निवड होण्याची शक्यता आहे. 28 सप्टेंबरपूर्वी हा निर्णय घेण्याचा भाजप आणि संघाचा मानस असल्याचे बोलले जाते. याच महत्त्वपूर्ण काळात ही भेट झाल्याने या घटनेला विशेष महत्त्व प्राप्त झाले आहे.

45 मिनिटांची गुप्त बैठक

सूत्रांनी दिलेल्या माहितीनुसार, केंद्रीय मंत्री शिवराज सिंह चौहान यांनी रविवारी संध्याकाळी दिल्लीतील संघाच्या मुख्यालयात, केशव कुंज येथे मोहन भागवत यांची भेट घेतली. ही बैठक सुमारे 45 मिनिटे चालली. या गुप्त बैठकीनंतर चौहान थेट दिल्ली आंतरराष्ट्रीय विमानतळाकडे रवाना झाले. बैठकीपूर्वी चौहान हे भारत मंडपम येथे गायत्री परिवाराच्या एका कार्यक्रमात सहभागी झाले होते. तिथे त्यांच्यासोबत केंद्रीय सांस्कृतिक मंत्री गजेंद्र सिंह शेखावत देखील उपस्थित होते.

अध्यक्षपदाच्या निवडीला उशीर का?

गेल्या वर्षभरापासून भाजपला पूर्णवेळ राष्ट्रीय अध्यक्ष निवडता आलेला नाही. यामागे भाजप आणि संघ यांच्यातील समन्वयाचा अभाव हे एक प्रमुख कारण मानले जाते. अशा परिस्थितीत, संघटनेमध्ये मोठ्या बदलांची अपेक्षा असताना शिवराज सिंह चौहान यांची भागवत यांच्याशी झालेली ही भेट अत्यंत महत्त्वाची मानली जात आहे. संघाच्या जवळचे नेते म्हणून शिवराज सिंह चौहान यांची ओळख आहे आणि त्यांच्या नावाचा विचार अध्यक्षपदासाठी होण्याची हीच वेळ आहे, असे राजकीय विश्लेषकांचे मत आहे.

या भेटीमुळे, केवळ आगामी अध्यक्षपदाच्या निवडीसाठीच नाही, तर भाजपच्या राष्ट्रीय स्तरावरील नेतृत्वात एक नवीन समीकरण तयार होत असल्याचे संकेत मिळत आहेत. या घडामोडींवर आता सर्वांचे लक्ष लागून आहे.