शिमला मशीद वादामुळे तणाव वाढला, हिंदू संघटनांचा निषेध, 4 जिल्ह्यांतील बाजारपेठा बंद

Shimla Masjid Case : शिमला येथील संजौली येथे एका मशिदीच्या कथित बेकायदेशीर बांधकामावरून सुरू असलेल्या वादामुळे संपूर्ण हिमाचल प्रदेशात तणावाचे वातावरण पाहायला मिळत आहे. या बांधकामांच्या निषेधार्थ विश्व हिंदू परिषदेसह हिंदू संघटनांनी आज राज्यभरात दोन तासांच्या बाजार बंदची हाक दिली.

बाजार बंदच्या आवाहनामुळे अनेक जिल्ह्यांतील व्यापाऱ्यांनी सकाळपासूनच आपले दुकाने बंद ठेवले आहेत. शिमलाच्या रामपूर उमदल भागातील जुरी, झाकरी आणि नोगली येथील दुकाने दुपारी एक वाजेपर्यंत बंद होती. तसेच हमीरपूर जिल्ह्यातील स्थानिक व्यापारी संघटनांनी सकाळी 11 वाजेपर्यंत बाजार बंद राहणार असल्याचे सांगितले आहे.

काही भागांमध्ये कडकडीत बंद पाळण्यात आला तर व्यापक लॉकडाऊन असूनही, राजधानी शिमला आणि मॉल रोड सारख्या उपनगरात कोणताही विशेष परिणाम दिसून आला नाही. स्थानिक व्यापारी मंडळाने दोन दिवसांपूर्वी अर्धा दिवस बंद पाळला होता.

लाठीचार्जच्या विरोधात हिमाचल बंदची हाक

विश्व हिंदू परिषद आणि हिंदू जागरण मंचसह इतर हिंदू संघटनांनी आज 14 सप्टेंबर रोजी संजौली येथे झालेल्या लाठीचार्जच्या विरोधात हिमाचल बंदची हाक दिली आहे. मिळालेल्या माहितीनुसार, मंडी, चंबा, कुल्लू, संधोळ आणि इतर भागातील बाजारपेठा शनिवारी काही तासांसाठी बंद आहेत. त्यामुळे चार जिल्ह्यांतील बाजारपेठा बंद ठेवण्यात आल्या आहेत.

मात्र, बंदच्या आवाहनाला संमिश्र प्रतिसाद मिळत आहे. अनेक व्यापाऱ्यांनी आपली दुकाने बंद ठेवून आंदोलनाला पाठिंबा दिला, तर काहींनी दुकाने खुली केली होती. उदाहरणार्थ, सिरमौर जिल्ह्यातील नाहानच्या ट्रेड युनियनने बंदमध्ये भाग घेतला नाही, ज्यामुळे त्यांच्या बाजारपेठा चालू राहिल्या.

कठोर कारवाईची मागणी

विश्व हिंदू परिषदेचे राज्यमंत्री तुषार डोगरा म्हणाले की, व्यापाऱ्यांना शांततापूर्ण बंदला पाठिंबा देण्याचे आवाहन करण्यात आले आहे. बेकायदेशीर मशीद बांधकाम दुर्दैवी असल्याचे सांगत सरकारने कठोर कारवाईची मागणी केली. डोगरा यांनी हिमाचलमध्ये योग्य पडताळणी आणि नोंदणी न करता व्यवसाय करणाऱ्यांबद्दल चिंता व्यक्त केली.

त्यांनी दावा केला की असे लोक गुन्हेगारी कृत्यांमध्ये सामील होऊ शकतात आणि त्यांनी नोंदणी आणि पडताळणीच्या नियमांची कठोरपणे अंमलबजावणी करण्याची मागणी केली. हिमाचल प्रदेशातील विविध भागात वादामुळे परिस्थिती तणावपूर्ण आहे. निदर्शने आणि बाजार बंद दरम्यान सुव्यवस्था राखण्यासाठी मोठा पोलीस बंदोबस्त तैनात करण्यात आला आहे.

हिंदू संघटनांनी रॅली काढली

मशिदीतील बेकायदेशीर बांधकाम हटवावे आणि परप्रांतीयांची चौकशी करावी या मागणीसाठी आज सुन्नीमध्ये हिंदू संघटना निदर्शने करत आहेत. निदर्शने करण्यासाठी शेकडो लोक बाजारात दाखल झाले आहेत. आंदोलकांमध्ये महिलांचाही समावेश आहे. रॅली सुन्नी चौकात आल्यानंतर हिंदू संघटनांच्या नेत्यांनी येथील जनतेला संबोधित केले. संजौली आंदोलनात सहभागी झालेल्या लोकांवर दाखल केलेले गुन्हे मागे घेण्याची मागणीही त्यांनी केली आहे.