ते माणसं नव्हे, कसाई!; सासूने रॉकेल ओतलं, नवऱ्याने पेटवून दिलं, मुलीचा मृतदेह पाहताच वडिलांचा आक्रोश

Nikki bhati murder case Update : पुण्यातील वैष्णवी हगवणे प्रमाणे आणखी एका मुलीचा हुंडा पद्धतीने जीव घेतला आहे. हुंडा पद्धतीसारख्या सामाजिक दुर्गुणाने पुन्हा एकदा विदारक घटना समोर आली आहे. ग्रेटर नोएडाच्या सिरसा गावात २८ वर्षीय निक्की भाटीच्या वेदनादायक मृत्यूने संपूर्ण समाज हादरून गेला आहे.

पती आणि सासरच्यांनी केवळ ₹३६ लाख रुपयांच्या हुंड्याची मागणी पूर्ण न झाल्यामुळे निक्कीला तिच्या सहा वर्षांच्या निष्पाप मुलासमोर रॉकेल ओतून जिवंत जाळले, असा निक्कीच्या वडिलांनी आरोप केला आहे. याप्रकरणी आता मुलाच्या साक्षीने गुन्हा दाखल झाला आहे.

'वडिल म्हणाले- त्यांना फाशी द्या, अन्यथा एन्काउन्टर करा'

मुलीचा जळालेला मृतदेह पाहून निक्कीचे वडील भिकारी सिंग पायला यांच्या वेदनांचा बांध फुटला. संतप्त आणि दुःखी झालेले वडील रडत म्हणाले, "या प्राण्यांनी माझ्या मुलीची हत्या केली. त्यांना मुलगी दिसली नाही, त्यांनी फक्त हुंडा पाहिला. आता त्यांना फाशी द्यावी... बुलडोझर किंवा एन्काउन्टर शिक्षेपेक्षा कमी काही नाही."

भिकारी सिंग यांनी त्यांचे हृदय पिळवटून टाकणारे दुःख व्यक्त केले. "आम्ही धावत रुग्णालयात पोहोचलो, पण तोपर्यंत सर्व काही संपले होते. माझ्या प्रिय मुलीला फोर्टिस हॉस्पिटलने उपचार करण्यास नकार दिला आणि सफदरजंग येथे रेफर केले. रुग्णवाहिकेत पोहोचताच डॉक्टरांनी तिला मृत घोषित केले."

वडिलांनी सासरच्यांच्या क्रूरतेचा पाढा वाचला!

"तिच्या सासूने रॉकेल ओतले आणि तिच्या पतीने तिला जाळून टाकले. या लोकांना त्यांच्या मुलीची काळजी नव्हती, तर फक्त हुंड्याची होती. आम्ही तिला शिक्षण देण्यासाठी खूप कष्ट केले, तिचे लग्न केले, तिला सर्व काही दिले. पण त्यांना गाडी हवी होती, म्हणूनच माझ्या मुलीचा रोज छळ होत असे."

वडिलांनी आरोपींना "माणसे नाहीत, ते कसाई आहेत" असे संबोधले. त्यांनी निक्कीला नरकमय जीवन दिले आणि शेवटी तिला मारून टाकले, आता त्यांना मृत्युदंडापेक्षा कमी काहीही मिळायला नको, अशी मागणी त्यांनी केली.

#WATCH | Noida, UP | The victim's father says, "My elder daughter called me up to inform what had happened. We reached the hospital. These people had set her on fire and fled. Their neighbours took her to Fortis Hospital. When we reached she had 70% burns. They referred us to… https://t.co/Vsomr1hntY pic.twitter.com/jznQlRqrs1

— ANI (@ANI) August 24, 2025

निष्पाप मुलाची साक्ष आणि व्हिडिओ पुरावा

सर्वात वेदनादायक बाब म्हणजे निक्कीचा ६ वर्षांचा मुलगा या क्रूर घटनेचा साक्षीदार आहे. त्याने पोलिसांना सांगितले की, "त्यांनी आईवर काहीतरी ओतले, तिला चापट-बुक्क्यांनी मारहाण करण्यात आली आणि नंतर तिला जाळून टाकले." या निष्पापाच्या साक्षीतून या हत्येचे सत्य उघड झाले आहे.

या घटनेचे दोन व्हिडिओ सोशल मीडियावर व्हायरल झाले आहेत. एका व्हिडिओमध्ये निक्कीला केसांनी ओढून मारहाण केली जात आहे आणि दुसऱ्यामध्ये ती आगीनंतर पायऱ्यांवरून खाली लंगडत आहे. हे व्हिडिओ निक्कीची मोठी बहीण कांचन हिने रेकॉर्ड केल्याचे सांगितले जात आहे, जी याच कुटुंबात विवाहित आहे. या दृश्यांमुळे जनतेचा संताप आणखी भडकला आहे.

छळ, खोटेपणा आणि दुसऱ्या लग्नाचा कट

डिसेंबर २०१६ मध्ये निक्कीचा विवाह विपिन भाटीशी झाला होता. लग्नाच्या सहा महिन्यांनंतर सासरच्यांनी ₹३६ लाख रुपयांची मागणी करण्यास सुरुवात केली. निक्कीची बहीण कांचन म्हणते, "त्यांनी निक्कीच्या मानेवर आणि डोक्यावर वार केले, अ‍ॅसिड फेकण्याची धमकी दिली आणि आम्हा दोघांनाही मारहाण केली. निक्कीचा सतत छळ केला जात होता."

अटक करण्यापूर्वी विपिनने इंस्टाग्रामवर 'तू मला निक्की का सोडून गेलास? लोक मला खुनी म्हणत आहेत,' अशी पोस्ट करून मृत्यूला आत्महत्या भासवण्याचा प्रयत्न केला, जो पोलिसांनी दिशाभूल करण्याचा प्रयत्न असल्याचे सांगितले. कांचनने गंभीर खुलासा केला की सासरच्यांना निक्कीला मारून विपिनचे पुन्हा लग्न करायचे होते.

पोलिसाची कारवाई

कांचनच्या तक्रारीवरून, कासना पोलिसांनी विपिन भाटी, सासरे सत्यवीर भाटी, सासू दया आणि मेहुणे रोहित भाटी यांच्याविरुद्ध खुनाचा गुन्हा दाखल केला आहे. पोलिसांनी विपिनला अटक केली आहे, मात्र उर्वरित आरोपी अजूनही फरार आहेत. एडीसीपी सुधीर कुमार यांनी फरार आरोपींच्या शोधात छापे टाकले जात असल्याची माहिती दिली आहे. हुंड्यासाठी केलेला हा क्रूर खून भारतीय समाजातील एका गंभीर आणि घातक समस्येवर पुन्हा एकदा प्रकाश टाकतो.