मोठी बातमी : उपराष्ट्रपतीपदाच्या शर्यतीत 'या' महिलेच्या नावाची निश्चिती; 12 तारखेला होऊ शकते घोषणा!

NDA Vice President Candidate woman possibility : उपराष्ट्रपतीपदाच्या निवडणुकीसाठी एनडीए (NDA) लवकरच आपला उमेदवार जाहीर करणार असून, पंतप्रधान नरेंद्र मोदी 12 ते 13 ऑगस्टदरम्यान अंतिम निर्णय घेतील.

सूत्रांच्या माहितीनुसार, भाजपने असा उमेदवार निवडण्याचे ठरवले आहे. ज्यांचा राजकीय प्रवास वादग्रस्त राहिला नाही आणि ज्याला संसदीय कामकाजाचा मोठा अनुभव आहे. उपराष्ट्रपतीपद हे एक महत्त्वाचे संवैधानिक पद असल्यामुळे, राज्यसभेचे कामकाज सुरळीत चालवण्यासाठी अनुभवी व्यक्तीची गरज असल्याचे भाजपच्या एका खासदाराने सांगितले.

कोण आहेत संभाव्य उमेदवार?

उपराष्ट्रपतीपदाच्या शर्यतीत अनेक नावांची चर्चा सुरू असली तरी, पंतप्रधान मोदी यावेळीही 'आश्चर्यकारक' निर्णय घेऊ शकतात.

सध्या गुजरात, कर्नाटक, सिक्कीम आणि जम्मू-काश्मीरच्या राज्यपालांची नावे आघाडीवर आहेत. याशिवाय, गोव्याच्या माजी राज्यपालांचे नावही चर्चेत आहे.

महिला उमेदवाराची शक्यता?

या निवडणुकीत महिला उमेदवाराला संधी दिली जाऊ शकते, अशीही जोरदार चर्चा सुरू आहे. द न्यू इंडियन एक्सप्रेसच्या वृत्तानुसार, ओबीसी समुदायातून आलेल्या भाजपच्या एका माजी महिला खासदाराचे नाव संभाव्य यादीत आहे.

जर भाजपने महिला उमेदवाराला संधी दिली तर, राष्ट्रपती द्रौपदी मुर्मू यांच्यानंतर हा महिला सक्षमीकरणाचा आणखी एक मोठा संदेश असेल.

या शर्यतीत राजस्थानच्या माजी मुख्यमंत्री वसुंधरा राजे यांचे नाव प्रामुख्याने समोर आले आहे. अलीकडेच त्यांनी पंतप्रधान नरेंद्र मोदी यांची भेट घेतली, ज्यामुळे या चर्चेला आणखी बळ मिळाले आहे.

उपराष्ट्रपतीपदाचा राजीनामा देणारे जगदीप धनखड यांच्यानंतर रिक्त झालेल्या जागेसाठी राजस्थानमधील जाट समुदायाला भाजपसाठी खुश करणे हे मोठे आव्हान आहे.

त्यामुळे, राजस्थानच्या राजकारणात मोठा प्रभाव असलेल्या वसुंधरा राजे यांना ही संधी दिली जाऊ शकते, असे राजकीय विश्लेषकांचे म्हणणे आहे.

राजकीय समीकरणे आणि आव्हाने!

वसुंधरा राजे आणि सिक्कीमचे राज्यपाल ओम माथूर यांच्यातील जुनी राजकीय कटुता सर्वांनाच माहीत आहे. ओम माथूर यांचेही नाव चर्चेत असल्यामुळे पक्षाला दोन्ही नेत्यांमधील समीकरणे सांभाळणे महत्त्वाचे ठरणार आहे.

विशेष म्हणजे, भाजपच्या राष्ट्रीय अध्यक्षपदाची निवडणूकही जवळ आली आहे आणि त्यासाठीही वसुंधरा राजे यांचे नाव चर्चेत आहे. त्यामुळे उपराष्ट्रपतीपदाची जबाबदारी त्यांना मिळते की नाही, हे पाहणे औत्सुक्याचे ठरेल.