आशिया चषकाचा थरार! 'अ' संघात भारत-बांग्लादेश आमने-सामने; LIVE सामना कुठे कसा बघायचा समजून घ्या

Ind a vs ban a womens asia cup rising stars 2026 : आशियाई क्रिकेटमधील दोन कट्टर प्रतिस्पर्धी आज जेतेपदासाठी एकमेकांशी भिडणार आहेत. हाँगकाँगमध्ये रंगलेल्या 'डीपी वर्ल्ड विमेन्स एशिया कप रायझिंग स्टार्स २०२६' स्पर्धेचा आज महाअंतिम सोहळा पार पडत आहे. एका बाजूला सुरुवातीच्या पराभवानंतर फिनिक्स झेप घेत अंतिम फेरीत धडक मारलेला गतविजेता भारत-अ संघ आहे, तर दुसऱ्या बाजूला स्पर्धेत आतापर्यंत एकही सामना न हारलेला बलाढ्य बांग्लादेश-अ संघ उभा आहे.

आज दुपारी १२:३० वाजता जेव्हा दोन्ही संघ मैदानावर उतरतील, तेव्हा केवळ ट्रॉफीच नाही तर आशियाई क्रिकेटमधील वर्चस्वही पणाला लागलेले असेल. कर्णधार राधा यादव आपल्या चतुरस्त्र नेतृत्वाच्या जोरावर चषकाचे रक्षण करणार की बांग्लादेशचे अजेय 'टायगर्स' पहिल्यांदा जेतेपदावर नाव कोरणार, याकडे संपूर्ण क्रिकेट विश्वाचे लक्ष लागले आहे.

टीम इंडियाचे दिमाखदार पुनरागमन

भारतीय संघाची या स्पर्धेतील सुरुवात काहीशी खराब झाली होती. पहिल्याच सामन्यात यूएई (UAE) कडून मिळालेल्या पराभवामुळे संघाला मोठा धक्का बसला होता. मात्र, त्यानंतर भारताने जोरदार पुनरागमन केले. टीम इंडियाने आधी कट्टर प्रतिस्पर्धी पाकिस्तानचा ८ गडी राखून पराभव केला आणि त्यानंतर उपांत्य फेरीत श्रीलंकेला ७ गडी राखून धूळ चारत अंतिम फेरी गाठली. या विजयात फिरकीपटू तनुजा कंवरच्या ४ बळींचा मोठा वाटा होता.

अजेय बांग्लादेशचे मोठे आव्हान

दुसरीकडे, फहीमा खातूनच्या नेतृत्वाखालील बांग्लादेशचा संघ या स्पर्धेत आतापर्यंत सर्वात सातत्यपूर्ण खेळ करणारा संघ ठरला आहे. त्यांनी दुसऱ्या उपांत्य फेरीत पाकिस्तानचा पराभव करून अंतिम फेरीत प्रवेश केला आहे. या स्पर्धेत त्यांना अद्याप एकही पराभव पत्करावा लागलेला नाही, हीच त्यांची मोठी जमेची बाजू आहे.

'या' स्टार खेळाडूंवर असेल नजर

भारत-अ : कर्णधार राधा यादव, मीनू मणि आणि तनुजा कंवर यांच्या फिरकीवर भारताची मदार असेल. फलंदाजीत नंदिनी कश्यप आणि वृंदा दिनेश यांच्याकडून मोठ्या खेळीची अपेक्षा आहे.

बांग्लादेश-अ : फहीमा खातून आणि फरिहा त्रिसना यांच्या गोलंदाजीचा सामना करणे भारतीय फलंदाजांसाठी कठीण आव्हान असू शकते.

सामना कधी आणि कोठे पाहाल?

• वेळ : हा अंतिम सामना आज दुपारी १२:३० वाजता (भारतीय वेळेनुसार) सुरू होईल.
• लाईव्ह टेलिकास्ट : भारतात या सामन्याचे थेट प्रक्षेपण सोनी स्पोर्ट्स नेटवर्क (Sony Sports Network) वर केले जाईल.
• लाईव्ह स्ट्रीमिंग : चाहते सोनी लिव (Sony LIV) ॲप आणि वेबसाइटवर या सामन्याचा आनंद घेऊ शकतात.