EPFO बाबत मोठी अपडेट, आता ATM वरुन काढता येणार पैसे; कधी, कसे काढायचे पैसे? वाचा डिटेल्स

जर तुम्ही नोकरी करत असाल तुमच्यासाठी आता एक महत्त्वाची बातमी समोर आली आहे. कर्मचारी भविष्य निर्वाह निधी संघटना म्हणजेच EPFO ​​लवकरच आपल्या सिस्टिममध्ये एक मोठा बदल करणार आहे. या बदलानंतर कर्मचाऱ्यांना आपले पैसे काढणे सोपे होईल. केंद्रीय कामगार आणि रोजगार मंत्री मनसुख मांडवीय यांनी शुक्रवारी याबाबत माहिती दिली. ईपीएफओचे नवीन आवृत्ती पुढील महिन्यापासून म्हणजेच मे-जूनपासून सुरू होऊ शकते. यानंतर ९ कोटींहून अधिक खातेधारकांना या अपडेटचा लाभ मिळेल.

EPFOचे नवे अपडेट काय?

नवीन प्लॅटफॉर्ममध्ये डिजिटल दुरुस्ती, ऑटो क्लेम सेटलमेंट आणि एटीएममधून पैसे काढण्याची सुविधा असेल. यामुळे प्रक्रिया सोपी आणि जलद होईल. म्हणजेच त्यानंतर ईपीएफओ खातेधारकांना दाव्यासाठी कार्यालयात जाण्याची आवश्यकता नाही किंवा मोठा फॉर्म भरावा लागणार नाही. मांडवीय म्हणाले की, ईपीएफओ ३.० आवृत्तीमुळे सेवा पूर्वीपेक्षा खूपच सोप्या होतील आणि त्या एका मजबूत आयटी प्रणालीसह अंमलात आणल्या जातील. पेन्शन किंवा पैसे काढण्याची माहिती सहजपणे पाहण्याव्यतिरिक्त, खातेधारकांना ओटीपी पडताळणीद्वारे त्यांचा डेटा अपडेट करण्याची सुविधा देखील असेल.

किती टक्के मिळते व्याज?

केंद्रीय कामगार मंत्री पुढे म्हणाले की, ईपीएफओकडे सध्या 'सरकारी हमी'सह २७ लाख कोटी रुपयांचा निधी आहे. तो ८.२५ टक्के व्याज देतो. आधीच अस्तित्वात असलेल्या केंद्रीकृत पेन्शन पेमेंट सिस्टममुळे ७८ लाखांहून अधिक पेन्शनधारकांना फायदा होतो. त्यामुळे त्यांना देशभरातील कोणत्याही बँक खात्यात पेन्शन मिळू शकते आणि पूर्वी नियुक्त केलेल्या प्रादेशिक बँकांमध्ये खाती ठेवण्याची आवश्यकता दूर झाली आहे.

कोणत्या मिळतील सुविधा?

पेन्शन कव्हरेज सुलभ आणि बळकट करण्यासाठी अटल पेन्शन योजना, प्रधानमंत्री जीवन विमा योजना आणि श्रमिक जन धन योजना यासह विविध सामाजिक सुरक्षा योजनांचे एकत्रीकरण करण्याचा विचार सरकार करत असल्याचे त्यांनी सांगितले. कामगारांना आरोग्यसेवा सुलभ करण्यासाठी, त्यांनी सांगितले की कर्मचारी राज्य विमा महामंडळ (ESIC) चे लाभार्थी लवकरच आयुष्मान भारत योजनेअंतर्गत सूचीबद्ध रुग्णालयांमध्ये मोफत वैद्यकीय उपचार घेऊ शकतील, असेही सांगितले जात आहे.