राहुल गांधी लोकसभेतील विरोधी पक्षनेते होणार? काँग्रेस खासदाराने केली मागणी
Mumbai: लोकसभा निवडणुकीत भाजपच्या नेतृत्वाखालील राष्ट्रीय लोकशाही आघाडीला (एनडीए) बहुमत मिळाले आहे, परंतु विरोधी आघाडी 'इंडिया'नेही चमकदार कामगिरी केली आहे. नरेंद्र मोदी तिसऱ्यांदा पंतप्रधानपदाची शपथ घेणार असल्याचे स्पष्ट झाले आहे.
अशा स्थितीत आता लोकसभेतील विरोधी पक्षनेतेपद कोणाकडे असणार याची चर्चा रंगली आहे. दरम्यान, सूत्रांनुसार, काँग्रेस नेते राहुल गांधी लोकसभेतील विरोधी पक्षनेते होऊ शकतात.
काय म्हणाले मणिकम टागोर?
मणिकम टागोर यांनी सोशल मीडिया प्लॅटफॉर्म X वर पोस्ट करत लिहिले की, "मी माझे नेते राहुल गांधी यांच्या नावावर मते मागितली आहेत. अशा परिस्थितीत राहुल गांधी हे लोकसभेतील काँग्रेसचे नेते असावेत, असे माझे मत आहे. मला आशा आहे की इतर काँग्रेस खासदारही माझ्यासारखाच विचार करतील. बघूया काँग्रेस संसदीय पक्ष काय निर्णय घेते. आम्ही लोकशाहीवादी पक्ष आहोत.
लोकसभेत विरोधी पक्षनेते होण्यासाठी 10 टक्क्यांपेक्षा जास्त जागा असणे आवश्यक आहे. 2014 मध्ये काँग्रेसने 44 जागा जिंकल्या होत्या आणि 2019 मध्ये 52 जागा जिंकल्या होत्या, मात्र यावेळी पक्षाने 99 जागा जिंकल्या आहेत. अशा परिस्थितीत राहुल गांधी विरोधी पक्षनेते होण्याची सर्वाधिक शक्यता आहे.
राहुल गांधी विरोधी पक्षनेते का होऊ शकतात?
लोकसभा निवडणुकीत विरोधी आघाडी 'इंडिया'च्या उत्कृष्ट कामगिरीमध्ये काँग्रेसचे माजी अध्यक्ष राहुल गांधी यांची महत्त्वाची भूमिका असल्याचे मानले जाते. आघाडीतील जागांच्या बाबतीतही काँग्रेस सर्वात मोठा पक्ष आहे.
नुकतेच महाराष्ट्राचे माजी मुख्यमंत्री उद्धव ठाकरे यांच्या शिवसेनेचे नेते संजय राऊत यांनीही राहुल गांधींना पंतप्रधान व्हायचे असेल तर आमचा विरोध नाही, असे म्हटले आहे. भाजपच्या नेतृत्वाखालील एनडीए केंद्रात सरकार स्थापन करणार असल्याचे सांगण्यात येत आहे.
कारण टीडीपी आणि जेडीयूने आपण एनडीएमध्येच राहणार असल्याची भूमिका स्पष्ट केली आहे. अशा स्थितीत नरेंद्र मोदी सलग तिसऱ्यांदा पंतप्रधानपदाची शपथ घेत असल्याचे स्पष्ट झाले आहे. त्यामुळे आता राहुल गांधी लोकसभेतील विरोधी पक्षनेतेपदी विराजमान होण्याची दाट शक्यता आहे.
Click it and Unblock the Notifications
Sign in with Google