कोण आहेत परिधी अदानी? अदानी कुटुंबाची सूनच नाही, तर आहे प्रतिष्ठीत व्यावसायिक, वाचा संपूर्ण माहिती

भारतातील सर्वात मोठ्या उद्योगपतींपैकी अदानी हे एक आहेत. अदानी कुटुंब आपले वैयक्तीक आयुष्य खाजगी ठेवणे पसंत करतात. मात्र त्यांच्या कुटुंबाविषयी व अदानी कुटुंबाच्या जीवनशैलीविषयी लोकांना नेहमीच उत्सुकता असते. गौतम अदानी, त्यांच्या पत्नी प्रीती अदानी यांना करण आणि जीत ही दोन मुले आहेत. अदानी कुटुंबातील मोठा मुलगा असलेल्या करण अदानी व त्यांची पत्नी परिधी अदानी यांच्याबद्दल अनेकांना माहीती नाही. आज आपण अदानी कुटुंबाची मोठी सून असलेल्या परिधी अदानी यांच्याबद्दल माहिती जाणून घेऊयात...

कोण आहेत परिधी अदानी?

परिधी अदानी या गौतम अदानींचा मोठा मुलगा करण अदानी यांच्या पत्नी आहेत. त्यांची कारकीर्द प्रभावी आहे. त्या एक सुप्रसिद्ध वकील म्हणूनही प्रसिद्ध आहेत. परिधी अदानी यांनी २०१३ मध्ये करण अदानीशी लग्न केले. करण हा गौतम अदानी यांचा मोठा मुलगा आहे आणि तो अदानी पोर्ट्स आणि एसईझेड लिमिटेडचा सीईओ म्हणून काम करतो. त्यांचा विवाह सोहळा एका भव्य समारंभात पार पडला होता. मुकेश अंबानी, अनिल अंबानी, अनिल अग्रवाल आणि आनंद महिंद्रा यांसारखे आघाडीचे उद्योजक या लग्नाला उपस्थित होते. करण आणि परिधी या दाम्पत्याला २०१६ मध्ये अनुराधा ही मुलगी झाली. हे जोडपे कुटुंबासह अहमदाबादमध्ये राहते.

कसे होते परिधी यांचे आयुष्य?

परिधी यांचा जन्म जून १९८९ मध्ये झाला. परिधी ही एका प्रसिद्ध वकिलांच्या कुटुंबातून येते. अमरचंद मंगलदासचे व्यवस्थापकीय भागीदार सिरिल श्रॉफ आणि वंदना श्रॉफ यांची ती मुलगी आहे. ते एक प्रसिद्ध वकीलही आहेत. तिच्या कुटुंबाच्या वारशाचे अनुसरण करून, परिधीने कायदेशीर क्षेत्रात स्वतःचे नाव कमावले आहे.

कोठे झाले शिक्षण?

परिधीने मुंबई विद्यापीठातून अकाउंटिंग आणि फायनान्समध्ये बॅचलर ऑफ कॉमर्स पदवी घेतली. त्यानंतर तिने मुंबईतील सरकारी कायदा महाविद्यालयातून कायद्याची पदवी पूर्ण केली. २०१३ मध्ये, तिने फॉन्टेनब्लू येथील प्रतिष्ठित फ्रेंच बिझनेस स्कूल INSEAD मध्ये शिक्षण घेऊन तिचे शिक्षण आणखी वाढवले. याव्यतिरिक्त, तिने स्वित्झर्लंडमधील मॉन्ट्रो येथील प्रसिद्ध फिनिशिंग स्कूल इन्स्टिट्यूट व्हिला पियरेफ्यू येथे शिक्षण घेतले.

परिधी अदानी यांचे करिअर

परिधी ही भारतातील आघाडीच्या कायदा फर्मपैकी एक असलेल्या सिरिल अमरचंद मंगलदास येथे भागीदार आहे. ती गुजरात कार्यालयाची प्रमुख आहे. ती कॉर्पोरेट कायद्यात तज्ज्ञ आहे. लॉजिस्टिक्स, शहरी पायाभूत सुविधा आणि अक्षय ऊर्जा यासह पायाभूत सुविधा क्षेत्रातील क्लायंटशी तिचे जिव्हाळ्याचे संबंध आहेत. तिने संयुक्त उपक्रम, विविध उद्योगांमधील भागीदारी, कॉर्पोरेट प्रशासन आणि सार्वजनिक विलीनीकरण आणि अधिग्रहणांशी संबंधित अनेक प्रकरणे हाताळली आहेत. ज्यात सार्वजनिक एमएंडए व्यवहारांचा समावेश आहे. तिच्या लिंक्डइन प्रोफाइलनुसार, ती व्यवसायांना डिजिटल प्लॅटफॉर्मशी जुळवून घेण्याबाबत, क्लाउड-आधारित उपायांवर आणि नवीन तंत्रज्ञान नियमांचे पालन करण्याबाबत सल्ला देते.

परिधीची मालमत्ता आणि संपत्ती

द इकॉनॉमिक टाईम्सच्या वृत्तानुसार, परिधी आणि तिचे वडील सिरिल श्रॉफ यांनी २०२० मध्ये मुंबईच्या वरळी परिसरात सुमारे ४.५ दशलक्ष अमेरिकन डॉलर्सला एक सी-व्ह्यू फ्लॅट खरेदी केला. परिधीची एकूण संपत्ती सार्वजनिकरित्या उपलब्ध नसली तरी, फोर्ब्सने दिलेल्या वृत्तानुसार, तिचे सासरे गौतम अदानी यांची अंदाजे एकूण संपत्ती ५०.७ अब्ज अमेरिकन डॉलर्स आहे. भारतातील सर्वात प्रभावशाली व्यावसायिक कुटुंबांपैकी एकाचा भाग असताना परिधी अदानी यांनी यशस्वी कारकीर्द घडवली आहे.