अरविंद केजरीवालांवर होऊ शकतो हल्ला! खलिस्तान्यांचा कट उघड, गुप्तचर यंत्रणा सतर्क

Arvind Kejriwal : दिल्लीचे माजी मुख्यमंत्री आणि आम आदमी पार्टीचे राष्ट्रीय संयोजक अरविंद केजरीवाल यांच्यावर हल्ल्याची भीती व्यक्त केली जात आहे. पंजाबस्थित खलिस्तानी दहशतवादी केजरीवाल यांना लक्ष्य करू शकतात, अशी माहिती गुप्तचर यंत्रणांनी दिली आहे. या अलर्टनंतर त्यांच्या सुरक्षेचा आढावा घेण्यात आला आहे.

सध्या अरविंद केजरीवाल यांना झेड प्लस सुरक्षा देण्यात आली आहे, मात्र या नव्या माहितीनंतर दिल्ली पोलिसांना अतिरिक्त दक्षता घेण्याच्या सूचना देण्यात आल्या आहेत. काही संशयित लोकांच्या हालचालींवर नजर ठेवण्यात येत असल्याचे गुप्तचर यंत्रणांनी सांगितले आहे. याप्रकरणी दिल्ली पोलिसांना सतर्क राहण्यास सांगण्यात आले आहे.

व्हीव्हीआयपी सुरक्षेमुळे पोलिस आधीच हाय अलर्टवर आहेत, मात्र या नव्या माहितीमुळे सुरक्षेच्या उपाययोजना आणखी कडक झाल्या आहेत.

केजरीवाल यांच्यावर कधी हल्ला झाला?

अरविंद केजरीवाल यांच्यावर यापूर्वीही अनेकदा हल्ले झाले आहेत. काही घटनांमध्ये ते जखमीही होताना दिसत आहे.

2019 मध्ये थप्पड मारण्याची घटना: सुलतानपुरीमध्ये रोड शो दरम्यान एका व्यक्तीने केजरीवाल यांना थप्पड मारली.
2018 मध्ये मिरची पावडर हल्ला: दिल्ली सचिवालयात एका व्यक्तीने केजरीवाल यांच्यावर मिरची पावडर फेकली.
2016 मध्ये फेकले शूज: सम-विषम योजनेवर रागावलेल्या एका व्यक्तीने त्यांच्यावर जोडा फेकला.
2016 मध्ये पंजाबमध्ये हल्ला: लुधियानामध्ये त्यांच्या कारवर लोखंडी रॉड आणि काठ्यांनी हल्ला करण्यात आला, ज्यामुळे कारच्या काचा फोडण्यात आल्या.
2014 मध्ये शाई आणि अंड्यांचा हल्ला: लोकसभा निवडणुकीदरम्यान वाराणसी आणि गुजरातमध्ये त्यांच्यावर अंडी आणि शाई फेकण्यात आली होती.

हल्ल्याची भीती का वाढतेय?

दिल्ली विधानसभा निवडणुका आणि केजरीवाल यांच्या सक्रिय राजकारणामुळे त्यांच्याविरोधातील कारस्थानं वाढत चालली आहेत. या प्रकरणात खलिस्तानी दहशतवाद्यांची नावे समोर येणे चिंताजनक आहे. याआधीही केजरीवाल यांना राजकीय आणि वैयक्तिक कारणावरून लक्ष्य करण्यात आले आहे.

"सुरक्षेसाठी कोणती पावले उचलण्यात आली?

केजरीवाल यांची झेड प्लस सुरक्षा आणखी मजबूत करण्यात आली आहे. त्यांच्या प्रत्येक हालचालीवर नजर ठेवण्यात येत आहे. या अलर्टबाबत दिल्ली पोलीस आणि सुरक्षा यंत्रणा सतर्क आहेत.