Akshaya Tritiya 2025 Date : अक्षय्य तृतीया कधी आहे? शुभ वेळ, पूजा पद्धत आणि महत्त्व घ्या जाणून

Akshaya Tritiya 2025 : वैशाख महिन्यातील शुक्ल पक्षातील तृतीया तिथीला अक्षय्य तृतीया साजरी केली जाते. अक्षय्य तृतीयेला केलेले दान आणि चांगले काम वाया जात नाही असे मानले जाते. या दिवशी देवी लक्ष्मीची पूजा करण्याचे महत्त्व आहे. यामुळे घरात सुख आणि समृद्धी येते. या दिवशी नवीन काम सुरू करणे शुभ मानले जाते. अशा परिस्थितीत, अक्षय्य तृतीया कधी आहे, या दिवसाचा शुभ मुहूर्त आणि महत्त्व जाणून घेऊया.

अक्षय्य तृतीया: तारीख आणि शुभ मुहूर्त

यंदा अक्षय्य तृतीया 30 एप्रिल 2025, बुधवार रोजी साजरी होईल. वैशाख शुक्ल तृतीया तिथी 29 एप्रिल रोजी संध्याकाळी 5:32 वाजता सुरू होईल आणि 30 एप्रिल रोजी दुपारी 2:13 वाजता संपेल. उदया तिथीनुसार अक्षय्य तृतीया 30 एप्रिल रोजी साजरी होईल.

या दिवशी कोणतेही शुभ कार्य किंवा खरेदी कोणत्याही वेळी करता येते. विशेषतः सोने, चांदी, संपत्ती, वाहन किंवा नवीन व्यवसाय सुरू करण्यासाठी हा दिवस अत्यंत शुभ मानला जातो. या दिवशी सकाळी 5:30 वाजल्यापासून दुपारी 12:30 वाजेपर्यंत पूजा आणि खरेदीसाठी विशेष शुभ मुहूर्त आहे, असे पंचांगात नमूद आहे. या वेळेत माता लक्ष्मी आणि भगवान विष्णू यांची पूजा केल्यास घरात समृद्धी आणि सुखाची प्राप्ती होते, अशी श्रद्धा आहे.

अक्षय्य तृतीयेचे धार्मिक महत्त्व

हिंदू धर्मात अक्षय्य तृतीया हा सण अत्यंत महत्त्वाचा मानला जातो. 'अक्षय' या शब्दाचा अर्थ आहे 'ज्याचा कधीही क्षय होत नाही' किंवा 'ज्याचा नाश होत नाही'. या दिवशी केलेले दान, पूजा, जप, तप आणि शुभ कर्म यांचे फळ कायमस्वरूपी टिकते, अशी मान्यता आहे. पौराणिक कथांनुसार, या दिवशी अनेक महत्त्वाच्या घटना घडल्या आहेत.

भगवान विष्णूंचा सहावा अवतार परशुराम यांचा जन्म अक्षय्य तृतीयेला झाला होता, त्यामुळे हा दिवस परशुराम जयंती म्हणूनही साजरा केला जातो. तसेच, त्रेतायुगाची सुरुवात या दिवशी झाली होती, म्हणून या तिथीला युगादी तिथी असेही म्हणतात. महाभारतात या दिवशी भगवान श्रीकृष्णांनी पांडवांना अक्षय पात्र दिले होते, ज्यामुळे त्यांना कधीही अन्नाची कमतरता भासली नाही. या सर्व घटनांमुळे अक्षय्य तृतीया हा दिवस शुभ आणि पवित्र मानला जातो. या दिवशी माता लक्ष्मी आणि भगवान विष्णू यांची पूजा करण्याचा विशेष विधी आहे. या पूजेमुळे घरात सुख-समृद्धी आणि संपत्ती येते असं म्हटलं जातं.

अक्षय्य तृतीया आणि सोने खरेदी

अक्षय्य तृतीया हा सोने आणि चांदी खरेदी करण्यासाठी सर्वात शुभ दिवस मानला जातो. या दिवशी सोने खरेदी केल्याने घरात समृद्धी आणि सौभाग्य येते, अशी मान्यता आहे. माता लक्ष्मीचा आशीर्वाद मिळवण्यासाठी अनेकजण या दिवशी सोन्याचे दागिने, नाणी किंवा चांदीच्या वस्तू खरेदी करतात. तसेच, या दिवशी नवीन व्यवसाय सुरू करणे, गृहप्रवेश करणे, नवीन वाहन खरेदी करणे किंवा लग्नासारखे शुभ कार्य करणे अत्यंत शुभ मानले जाते. या सणाला अबूझ मुहूर्त मानले जाते, म्हणजेच कोणत्याही शुभ कार्यासाठी पंचांग पाहण्याची गरज नसते. या दिवशी नवीन प्रकल्प किंवा व्यवसायाची सुरुवात केल्यास तो यशस्वी होतो आणि त्यात सतत वाढ होते, अशी श्रद्धा आहे.

काय करावे, काय करु नये

अक्षय्य तृतीयेच्या दिवशी काही गोष्टी करणे आणि टाळणे आवश्यक आहे. या दिवशी दान, पूजा आणि शुभ कार्य करणे शुभ मानले जाते. परंतु, कोणतेही अशुभ कृत्य, वादविवाद किंवा नकारात्मक विचार टाळावेत. मांसाहार, मद्यपान आणि तामसी आहार घेणे टाळावे. तसेच, या दिवशी कोणालाही दुखवणे किंवा अपशब्द बोलणे टाळावे. घरात स्वच्छता ठेवून सकारात्मक वातावरण निर्माण करावे. या दिवशी केलेले सर्व शुभ कर्म अक्षय फळ देतात, त्यामुळे सत्कर्मावर भर द्यावा.