विमानाचा प्रवास आता अधिक आलिशान होणार; Air indiaच्या ताफ्यात 'कस्टम-डिझाइन' बोईंग 737-8 दाखल!

Air India Express new aircraft : भारतीय विमान वाहतूक क्षेत्रात मोठी झेप घेत, 'एअर इंडिया एक्सप्रेस'ने आपल्या ताफ्यात पहिले विशेष डिझाइन केलेले बोईंग ७३७-८ विमान समाविष्ट केले आहे. टाटा समूहाच्या मालकीची ही एअरलाइन आता प्रवाशांना जागतिक दर्जाचा अनुभव देण्यासाठी सज्ज झाली आहे.

अमेरिकेतील सिएटल येथून हे विमान दिल्लीच्या इंदिरा गांधी आंतरराष्ट्रीय विमानतळावर दाखल झाले असून, प्रवाशांना लवकरच यात प्रवासाची संधी मिळणार आहे.

व्यावसायिक उड्डाणे कधी सुरू होणार?

एअर इंडिया एक्सप्रेसच्या ताफ्यात सामील झालेले हे ५१ वे बोईंग विमान आहे. या विमानाच्या तांत्रिक चाचण्या आणि औपचारिकता पूर्ण झाल्यानंतर, जानेवारी २०२६ पासून हे विमान अधिकृतपणे व्यावसायिक सेवेत रुजू होईल.

प्रवाशांना मिळेल '5-स्टार' अनुभव: वैशिष्ट्ये काय?

हे विमान एअर इंडिया एक्सप्रेसच्या गरजेनुसार 'लाइन-फिट कॉन्फिगरेशन'मध्ये डिझाइन करण्यात आले आहे. यामुळे प्रवाशांचा प्रवास केवळ वेगवानच नाही तर अधिक सुखकर होणार आहे:

आरामदायी आसन व्यवस्था

विमानात आधुनिक 'एर्गोनॉमिक सीट्स' बसवण्यात आल्या आहेत. तसेच प्रवाशांना पाय ताणून बसता यावे यासाठी 'लेगरूम' वाढवण्यात आला आहे.

अद्ययावत चार्जिंग सुविधा

प्रत्येक सीटवर स्मार्टफोन आणि लॅपटॉपसाठी 'फास्ट-चार्जिंग पॉवर आउटलेट्स' देण्यात आले आहेत.

स्काय इंटीरियर आणि मूड लाइटिंग

विमानात बोईंगचे प्रगत 'स्काय इंटीरियर' आहे. डायनॅमिक मूड लाइटिंगमुळे केबिनमधील वातावरण शांत आणि प्रसन्न वाटते.

गरम जेवणाची सोय

विमानात ऑनबोर्ड ओव्हनची सुविधा असल्याने प्रवाशांना आता हवेतही ताज्या आणि गरम 'गॉरमेअर' जेवणाचा आस्वाद घेता येईल.

शांत केबिन

नवीन इंजिन तंत्रज्ञानामुळे केबिनमधील आवाजाचे प्रमाण लक्षणीयरीत्या कमी झाले आहे.

टाटा समूहाच्या नेतृत्वाखाली विस्तार

टाटा समूहाने सूत्रे हाती घेतल्यापासून एअर इंडिया एक्सप्रेसच्या विस्ताराला मोठी गती मिळाली आहे. केवळ २०२५ मध्ये एअरलाइनने ए३२१निओ (A321neo) आणि ए३२०निओ यांसारखी आधुनिक विमाने ताफ्यात जोडली आहेत. यामुळे आता त्यांच्या ताफ्यात विमानांची एकूण संख्या १०० च्या पार गेली आहे. एअर इंडिया एक्सप्रेस आता भारतातील बोईंग विमानांची सर्वात मोठी ऑपरेटर बनली आहे.

६० शहरांशी जोडले गेले नेटवर्क

एअर इंडिया एक्सप्रेसने केवळ विमानेच वाढवली नाहीत, तर आपली सेवाही विस्तारली आहे. आता ही एअरलाइन ६० गंतव्यस्थानांना जोडते. २०२५ मध्ये १२ नवीन शहरे जोडली गेली असून, प्रामुख्याने टियर-२ आणि टियर-३ शहरांमधील कनेक्टिव्हिटी वाढवण्यावर भर दिला जात आहे. 'न्यू इंडिया'च्या गरजा ओळखून लहान शहरांना महानगरांशी जोडण्याचे काम वेगाने सुरू आहे.

जुन्या विमानांचाही कायापालट

एअरलाइनने केवळ नवीन विमाने आणली नाहीत, तर जुन्या बोईंग ७३७-८ विमानांचे नूतनीकरणही सुरू केले आहे. त्यांना १८९-आसनांच्या नवीन आणि सोयीस्कर कॉन्फिगरेशनमध्ये बदलले जात आहे. आतापर्यंत दोन विमानांचे 'रेट्रोफिट' पूर्ण झाले असून उर्वरित विमानांचे काम प्रगतीपथावर आहे.