वेदांत समूहाचे अनिल अग्रवाल यांचे पुत्र अग्निवेश यांचे निधन; नेमकं काय घडलं, काय असते स्कीइंग?

Anil Aggarwal son Agnivesh Aggarwal Death Cause : भारतीय उद्योगविश्वासाठी ७ जानेवारी २०२६ हा दिवस अत्यंत दुःखद ठरला. वेदांत समूहाचे संस्थापक आणि प्रसिद्ध उद्योगपती अनिल अग्रवाल यांचे सुपुत्र अग्निवेश अग्रवाल (वय ४९) यांचे अमेरिकेतील न्यूयॉर्क येथे निधन झाले.

एका साहसी स्कीइंग खेळादरम्यान झालेल्या अपघातानंतर उपचार सुरू असतानाच त्यांना हृदयविकाराचा तीव्र झटका आला, जो प्राणघातक ठरला.

अपघाताची नेमकी घटना काय?

अग्निवेश अग्रवाल न्यूयॉर्कमध्ये स्कीइंगचा आनंद घेत असताना त्यांचा भीषण अपघात झाला. या अपघातात त्यांना गंभीर दुखापत झाली होती. त्यांना तातडीने न्यूयॉर्कमधील प्रसिद्ध माउंट सिनाई रुग्णालयात दाखल करण्यात आले. डॉक्टरांनी शर्थीचे प्रयत्न केले, मात्र उपचारादरम्यान त्यांची प्रकृती अधिक खालावली आणि हृदयविकाराच्या झटक्याने त्यांची प्राणज्योत मालवली.

स्कीइंग: रोमांचक पण तितकाच धोकादायक खेळ

अग्निवेश अग्रवाल ज्या खेळादरम्यान अपघाताचे बळी ठरले, तो 'स्कीइंग' हा बर्फाच्छादित प्रदेशातील अत्यंत लोकप्रिय खेळ आहे.

काय आहे हा खेळ?

यात खेळाडू आपल्या पायांना 'स्की' नावाचे लांब पट्टे बांधून बर्फावरून वेगाने घसरतात. हातात असलेल्या खांबांच्या (Poles) मदतीने वेग आणि दिशा नियंत्रित केली जाते.

धोका काय?

स्कीइंगमध्ये वेग खूप जास्त असतो. उतार तीव्र असल्यास किंवा बर्फाचा पोत बदलल्यास संतुलन बिघडून गंभीर अपघात होऊ शकतात. अल्पाइन, नॉर्डिक आणि फ्रीस्टाइल असे याचे विविध प्रकार असून, अमेरिकेत हा खेळ अत्यंत लोकप्रिय आहे.

Today is the darkest day of my life.

My beloved son, Agnivesh, left us far too soon. He was just 49 years old, healthy, full of life, and dreams. Following a skiing accident in the US, he was recovering well in Mount Sinai Hospital, New York. We believed the worst was behind us.… pic.twitter.com/hDQEDNI262

— Anil Agarwal (@AnilAgarwal_Ved) January 7, 2026

अग्निवेश अग्रवाल : प्रसिद्धीच्या झोतापासून दूर राहिलेला 'व्हिजनरी' नेता

३ जून १९७६ रोजी पाटणा येथे जन्मलेल्या अग्निवेश यांनी आपले शिक्षण अजमेरच्या मेयो कॉलेजमधून पूर्ण केले. ते केवळ अनिल अग्रवाल यांचे वारसदार नव्हते, तर त्यांनी स्वतःच्या कर्तृत्वावर कॉर्पोरेट जगात वेगळी ओळख निर्माण केली होती.

हिंदुस्तान झिंकचे अध्यक्ष: २०१५ ते २०१९ या काळात त्यांनी हिंदुस्तान झिंकचे अध्यक्षपद भूषवले. त्यांच्या नेतृत्वाखाली ही कंपनी जगातील आघाडीची झिंक उत्पादक बनली.

तंत्रज्ञानाचा वापर : खाण क्षेत्रात आधुनिक आणि जागतिक दर्जाच्या तंत्रज्ञानाचा अवलंब करण्यात त्यांचा मोठा वाटा होता.

विविध पदे : त्यांनी 'फुजैराह गोल्ड'चे अध्यक्ष आणि व्यवस्थापकीय संचालक म्हणून काम पाहिले. तसेच वेदांत समूहाच्या अनेक वीज आणि पायाभूत सुविधा कंपन्यांच्या संचालक मंडळावर ते सक्रिय होते.

"माझं जग हिरावलं..." - अनिल अग्रवाल यांची भावूक पोस्ट

मुलाच्या निधनाने खचलेल्या अनिल अग्रवाल यांनी सोशल मीडिया प्लॅटफॉर्म 'X' वर आपली व्यथा मांडली. त्यांनी लिहिले की, "आजचा दिवस माझ्या आयुष्यातील सर्वात मोठा काळा दिवस आहे. अग्निवेश केवळ माझा मुलगा नव्हता, तर तो माझा सर्वात चांगला मित्र, माझा अभिमान आणि माझे पूर्ण जग होता. मी आणि किरण (पत्नी) पूर्णपणे हताश झालो आहोत."

संघर्षातून साम्राज्य उभं करणाऱ्या पित्यावर दुःखाचा डोंगर

"भारताचे मेटल पुरुष" म्हणून ओळखले जाणारे अनिल अग्रवाल यांनी शून्यातून वेदांतचे साम्राज्य उभे केले. पाटण्यातील सरकारी शाळेत शिकून, मुंबईत भंगार व्यवसायापासून सुरुवात करणाऱ्या या जिद्दी माणसाने जागतिक स्तरावर भारताचे नाव उंचावले. मात्र, आज आपल्या ४९ वर्षीय कर्तृत्ववान मुलाला गमावल्याने या कुटुंबावर मोठे संकट कोसळले आहे.