'द वॉकिंग डेड'ची अभिनेत्री केली मॅकचे ब्रेन कॅन्सरने निधन: जाणून घ्या- 'ग्लिओमा' आजाराविषयी!

glioma brain cancer Symptoms Causes details in marathi : हॉलिवूड मनोरंजन विश्वातून एक अत्यंत दुःखद बातमी समोर आली आहे. लोकप्रिय नेटफ्लिक्स मालिका 'द वॉकिंग डेड' मधील अभिनेत्री केली मॅक यांचे वयाच्या अवघ्या ३३ व्या वर्षी निधन झाले आहे.

ग्लिओमा, या दुर्मिळ आणि धोकादायक ब्रेन कॅन्सरने त्यांचा जीव घेतला. गेल्या एक वर्षापासून त्या या गंभीर आजाराशी झुंज देत होत्या, अशी माहिती त्यांच्या कुटुंबीयांनी दिली. त्यांच्या निधनाने चाहते आणि सहकाऱ्यांमध्ये शोककळा पसरली आहे.

ग्लिओमा म्हणजे काय?

ग्लिओमा हा मेंदूच्या कर्करोगाचा एक प्रकार आहे जो मेंदू किंवा पाठीच्या कण्यातील ग्लिअल पेशींपासून तयार होतो. या पेशींचे मुख्य कार्य मेंदूच्या न्यूरॉन्सना (मज्जातंतूंना) आधार देणे आणि त्यांचे संरक्षण करणे आहे. जेव्हा या पेशींची वाढ असामान्यपणे होऊ लागते, तेव्हा ते कर्करोगाचे रूप धारण करते.

ग्लिओमाचे वर्गीकरण त्याच्या श्रेणीनुसार केले जाते

• श्रेणी १ आणि २ : हे कमी धोकादायक मानले जातात.
• श्रेणी ३ आणि ४ : हे अत्यंत धोकादायक आणि आक्रमक मानले जातात.
• श्रेणी ४ : ग्लिओब्लास्टोमा हा ग्लिओमाचा सर्वात आक्रमक आणि जीवघेणा प्रकार आहे.

ग्लिओमाची प्रमुख लक्षणे!

जागतिक आरोग्य संघटनेच्या (WHO) मते, ग्लिओमाची लक्षणे ट्यूमरचे स्थान, त्याचा आकार आणि वाढीचा वेग यावर अवलंबून असतात. प्रमुख लक्षणांमध्ये खालील गोष्टींचा समावेश होतो.

सतत डोकेदुखी : ही डोकेदुखी सामान्य औषधांनी लवकर कमी होत नाही.

फिट्स किंवा झटके : शरीराला झटके येणे किंवा थरथरणे.

मळमळ आणि उलट्या : विशेषतः सकाळी उठल्यावर मळमळ होणे.

शारीरिक कमजोरी किंवा सुन्नपणा : शरीराच्या एखाद्या भागात अचानक कमजोरी जाणवणे किंवा तो भाग सुन्न होणे.

संतुलन आणि समन्वयातील समस्या : चालताना किंवा उभे राहताना शरीराचा तोल जाणे.

वर्तणूक आणि व्यक्तिमत्वात बदल: वागण्यात अचानक बदल होणे.

दृष्टी आणि बोलण्यात अडचण: स्पष्टपणे बोलता न येणे किंवा दिसण्यात समस्या येणे.

ट्यूमरचा आकार वाढल्यावर किंवा तो मेंदूच्या महत्त्वाच्या भागावर दबाव टाकल्यावर ही लक्षणे अधिक तीव्र होतात.

ग्लिओमाची कारणे आणि उपचार पद्धती

ग्लिओमाचे नेमके कारण नेहमी स्पष्ट नसते, पण ते ग्लिअल पेशींमध्ये होणाऱ्या अनुवांशिक बदलांमुळे (Genetic Mutation) सुरू होते. या बदलांमुळे पेशींची वाढ आणि विभाजन अनियंत्रित होते, आणि त्यातून कर्करोग होतो.

काही संभाव्य जोखमीचे घटक:

रेडिएशनचा संपर्क : डोक्याला जास्त प्रमाणात रेडिएशनचा संपर्क होणे.

कौटुंबिक इतिहास : काही दुर्मिळ प्रकरणांमध्ये हा रोग अनुवांशिक कारणांमुळे कुटुंबात पुढे येऊ शकतो.

उपचार काय केले जातात..!

ग्लिओमावर उपचार करण्यासाठी सामान्यतः तीन प्रमुख पद्धतींचा वापर केला जातो:

शस्त्रक्रिया : ट्यूमरचा जास्तीत जास्त भाग काढून टाकण्याचा प्रयत्न केला जातो. मात्र, मेंदूच्या संवेदनशील भागांमुळे तो पूर्णपणे काढणे अनेकदा शक्य नसते.

रेडिएशन थेरपी : शस्त्रक्रियेनंतर उर्वरित कर्करोगाच्या पेशी नष्ट करण्यासाठी रेडिएशनचा वापर केला जातो.

केमोथेरपी : कर्करोगाच्या पेशी मारण्यासाठी औषधे दिली जातात. काही प्रकरणांमध्ये, टार्गेटेड थेरपीचा (targeted therapy) वापर केला जातो, ज्यात ट्यूमरच्या विशिष्ट जनुकीय बदलांवर थेट हल्ला केला जातो.

केली मॅक यांनी सप्टेंबर 2024 मध्ये आपल्या आजाराची माहिती सार्वजनिक केली होती. ग्लिओमाशी एक वर्षभर झुंज दिल्यानंतर अखेर त्यांनी जगाचा निरोप घेतला. त्यांच्या निधनाने एका प्रतिभावान अभिनेत्रीला आपण गमावले आहे.

(अस्वीकरण: या लेखात दिलेली माहिती केवळ सामान्य माहितीसाठी आहे. ग्लिओमा किंवा कोणत्याही वैद्यकीय समस्येबद्दल अचूक माहितीसाठी, कृपया तज्ज्ञ डॉक्टरांचा सल्ला घ्या.)