धक्कादायक! मुलांना चढवले दूषित रक्त; 5 चिमुकले HIV पॉझिटिव्ह! 'या' ठिकाणी घडला घोर निष्काळजीपणा

Blood Transfusion infection : झारखंडमधील पश्चिम सिंहभूम जिल्ह्यातील चाईबासा येथील सरकारी रुग्णालयातून आरोग्य व्यवस्थेवर प्रश्नचिन्ह उपस्थित करणारी एक अत्यंत भयावह घटना समोर आली आहे. रुग्णालयाच्या रक्तपेढीतून दूषित रक्त चढवल्यामुळे, सात वर्षांच्या थॅलेसेमियाग्रस्त बालकासह एकूण पाच निष्पाप मुले एचआयव्ही पॉझिटिव्ह आढळली आहेत. या प्रकरणामुळे पीडित कुटुंबांमध्ये संताप आणि भीतीचे वातावरण असून, राज्यभरातील आरोग्य विभागात खळबळ माजली आहे.

प्रकरण कधी आणि कसे उघडकीस आले?

वनइंडिया हिंदीनुसार, शुक्रवारी थॅलेसेमियाग्रस्त मुलाच्या कुटुंबीयांनी आरोप केला की, त्यांच्या मुलाला रुग्णालयाच्या रक्तपेढीतून एचआयव्ही संक्रमित रक्त देण्यात आले. कुटुंबीयांनी तातडीने प्रशासन आणि आरोग्य विभागाला याची माहिती दिली. याबाबत तक्रार मिळताच झारखंड सरकारने आरोग्य सेवा संचालक डॉ. दिनेश कुमार यांच्या नेतृत्वाखाली पाच सदस्यीय उच्चस्तरीय वैद्यकीय पथक तातडीने तपासासाठी पाठवले.

चौकशीत आणखी चार मुले पॉझिटिव्ह!

शनिवारी तपास पथकाने दिलेल्या अहवालात परिस्थिती आणखी गंभीर झाली. त्याच रुग्णालयात नियमितपणे रक्त संक्रमण घेणारी आणखी चार थॅलेसेमियाग्रस्त मुले एचआयव्ही पॉझिटिव्ह आढळली. यामुळे बाधित मुलांची एकूण संख्या पाच झाली आहे.

वनइंडिया हिंदीने डॉ. दिनेश कुमार यांचा हवाला दिला असून त्यांनी सांगितले की, "प्राथमिक तपासात थॅलेसेमिया रुग्णांना दूषित रक्त दिल्याचे उघड झाले आहे. ब्लड बँकेत अनेक गंभीर अनियमितता आढळल्या असून, त्या त्वरित सुधारण्याचे निर्देश दिले आहेत."सध्या या रक्तपेढीचे कामकाज केवळ गंभीर प्रकरणांसाठीच सुरू ठेवण्यात आले आहे.

तपासात आढळलेल्या त्रुटी

तपास पथकाने रक्तपेढी आणि बालरोग आयसीयूची तपासणी केली. प्राथमिक अहवालात ब्लड बँकेच्या कार्यपद्धतीत अनेक गंभीर त्रुटी आढळल्या आहेत, ज्यात खालील बाबींचा समावेश आहे.

नमुने तपासणीत गडबड: रक्ताच्या नमुन्यांची तपासणी योग्य पद्धतीने करण्यात आली नाही.

रेकॉर्डमधील त्रुटी: नोंदी ठेवण्यात मोठी कमतरता.

सुरक्षा नियमांचे उल्लंघन: रक्त संक्रमणाचे सुरक्षा नियम पाळले गेले नाहीत.

न्यायालयीन हस्तक्षेप आणि पुढील पाऊले

संक्रमाणचे कारण काय?

जिल्हा सिव्हिल सर्जन डॉ. सुषांत कुमार माझी यांनी स्पष्ट केले की, हे संक्रमण केवळ रक्त संक्रमणामुळे झाले की, संक्रमित सुई किंवा इतर संपर्कामुळे झाले, याचा पूर्ण तपास लवकरच केला जाईल. या गंभीर प्रकरणाची दखल आता झारखंड उच्च न्यायालयाने घेतली असून, राज्य आरोग्य सचिव आणि जिल्हा सिव्हिल सर्जन यांच्याकडून अहवाल मागवला आहे.

रक्तदात्यांचा शोध सुरु

आरोग्य विभागाला संबंधित रक्तदात्यांचा शोध घेण्याचे आणि पुढील संक्रमण रोखण्याचे निर्देश देण्यात आले आहेत. सध्या पश्चिम सिंहभूम जिल्ह्यामध्ये ५१५ एचआयव्ही पॉझिटिव्ह रुग्ण आणि ५६ थॅलेसेमियाचे रुग्ण आहेत. या घटनेने आरोग्य सुरक्षेच्या गंभीर संवेदनशीलतेवर प्रश्नचिन्ह उभे केले असून, प्रशासकीय आणि न्यायालयीन दोन्ही स्तरांवर उपाययोजना सुरू आहेत.