तुम्ही ChatGPT वर Ghibli इमेज तयार केलीय का? ती सुरक्षित आहे का? कोणते आहेत धोके? वाचा सगळी उत्तरे

गेल्या आठवड्यात ओपनएआयने चॅटजीपीटीचा घिबली-शैलीचा एआय इमेज जनरेटर लाँच केला. तेव्हापासून या फोटोंनी सोशल मीडियावर अक्षरशः धुमाकूळ घातला आहे. राजकारणी आणि सेलिब्रिटींपासून ते सामान्य वापरकर्त्यांपर्यंत अनेकांनी घिबली शैलीतील कृत्रिम बुद्धिमत्ता-निर्मित पोर्ट्रेट शेअर केले आहेत. फोटोची ही नवीन आवृत्ती अनेकांना आवडली आहे. मात्र हा प्रकार सुरक्षित आहे का? कोणत्या धोक्यांची चर्चा सुरु झालीय? चॅटजीपीटीचे काय म्हणणे आहे? याच प्रश्नांची उत्तरे आपण शोधूयात...

कोणते प्रश्न समोर आलेत?

सोशल मीडिया प्लॅटफॉर्म X वर या नव्या प्रकाराबाबत अनेकांनी चिंता व्यक्त केली. अनेकांनी या नव्या स्टाईलबाबत धोक्याची घंटाही वाजवली. ओपन- एआय कदाचित या ट्रेंडचा वापर एआय प्रशिक्षणासाठी हजारो वैयक्तिक प्रतिमा गोळा करण्यासाठी करत नसेल ना? असा प्रश्नही विचारला जात आहे. वापरकर्ते या नव्या स्टाईलची मजा घेत असताना, काही तज्ज्ञांनी काही धोकेही स्पष्ट केले आहेत. आपण नकळतपणे ओपन-एआयला नवीन चेहऱ्याचा डेटा देत आहोत, ज्यामुळे गंभीर गोपनीयतेची चिंता निर्माण होऊ शकते, असेही काहींचे म्हणणे आहे.

बेरोजगारीचीही काहींना चिंता

सध्या अॅनिमेशनसह अनेक कलाकारांनी या नव्या ट्रेंडबाबत शंका उपस्थित केलीय. यामुळे कृत्रिम बुद्धीमत्ता असणाऱ्या कलाकारांवर बेरोजगारीचे संकट येण्याची शक्यता आहे, असेही काहींचे मत आहे. या अशा ट्रेंडमुळे ज्यांच्यात खरोखर कला आहे ते कलाकार बेरोजगार होतील. तर दुसरीकडे काहींनी या नव्या ट्रेंडचे स्वागतही केले आहे. यातून शिकण्यासारखे खूप काही आहे, असेही काहींचे मत आहे.

चॅटजीपीटीने काय म्हटले?

ओपन-एआयने अद्याप घिबली-शैलीतील एआय इमेज आर्ट व्हर्जन वापरणाऱ्या वापरकर्त्यांसाठी वैयक्तिक डेटाच्या सुरक्षिततेबद्दल कोणतेही विधान केले नाही. एचटीने चॅटजीपीटीला घिबली आर्ट जनरेटरमध्ये वापरलेल्या वैयक्तिक फोटोंच्या सुरक्षिततेबाबत विचारले तेव्हा चॅटजीपीटीने सांगितले की, "जोपर्यंत तुम्हाला त्याच्या गोपनीयता धोरणे आणि डेटा हाताळणी पद्धतींबद्दल खात्री नसेल, तोपर्यंत कोणत्याही एआय टूलवर वैयक्तिक फोटो अपलोड करणे सुरक्षित नाही. ओपन-एआय अपलोड केलेल्या प्रतिमा ठेवत नाही किंवा वापरत नाही. परंतु एआय सेवांसह संवेदनशील किंवा वैयक्तिक प्रतिमा शेअर करणे टाळणे नेहमीच चांगले. गोपनीयतेची चिंता असेल, तर सुरक्षित प्रतिमा प्रक्रियेसाठी विशेषतः डिझाइन केलेली ऑफलाइन साधने किंवा अॅप्स वापरण्याचा विचार करावा."

डेटा कसा सुरक्षित ठेवावा?

- एआय इमेज ट्रेंडवर जाण्यापूर्वी त्यातील जोखीम विचारात घ्या. तुमची गोपनीयता कशी संरक्षित करावी ते तेथे आहे का, ते पहा.

- एआय-जनरेटेड इमेजेससाठी वैयक्तिक फोटो अपलोड करण्यापूर्वी दोनदा विचार करा.

- सोशल मीडियावर उच्च-रिझोल्यूशन प्रतिमा शेअर करणे टाळावे. त्या एआय प्रशिक्षणासाठी काढून टाकल्या जाऊ शकतात.

- डिव्हाइस अनलॉक करण्यासाठी फेशियल रेकग्निशनऐवजी पिन किंवा पासवर्ड वापरावा.

- कोणत्या अ‍ॅप्सना कॅमेरा वापरण्याची परवानगी आहे हे तपासून कॅमेरा अ‍ॅक्सेस मर्यादित करा.