HDFC बँकेचे ग्राहकांना 'न्यू इयर गिफ्ट'; कर्जाचे व्याजदर घटले, वाचा तुम्हाला कुठे कसा फायदा मिळणार!

HDFC Bank MCLR Cut : "घर आणि कार खरेदीचे स्वप्न पाहणाऱ्यांसाठी २०२६ ची सुरुवात सुखद झाली आहे. एचडीएफसी बँकेने आपल्या 'मार्जिनल कॉस्ट ऑफ फंड्स बेस्ड लेंडिंग रेट' (MCLR) मध्ये कपात करून ग्राहकांना नवीन वर्षाची भेट दिली आहे. ज्या ग्राहकांचे कर्ज MCLR शी जोडलेले आहे, त्यांच्या कर्जाचा हप्ता (EMI) आता कमी होणार आहे. महागाईच्या काळात मध्यमवर्गीयांच्या खिशाला मिळणारा हा मोठा दिलासा मानला जात आहे."

देशातील सर्वात मोठी खाजगी बँक HDFC Bank ने आपल्या कर्ज दरांमध्ये (MCLR) कपात करण्याची घोषणा केल्याने असंख्य ग्राहकांना दिलासा मिळाला असून ही मध्यमवर्गीयांसाठी आनंदाची बाब आहे. 'गुड रिटर्न्स'नुसार, बँकेने निवडक कालावधीसाठी व्याजदरात ५ बेसिस पॉईंट्सची (0.05%) कपात केली असून, हे नवीन दर ७ जानेवारी २०२६ पासून लागू झाले आहेत. या निर्णयामुळे होम लोन, कार लोन आणि पर्सनल लोन घेणाऱ्या लाखो ग्राहकांना दिलासा मिळणार आहे.

किती झाली कपात?

बँकेने ओव्हरनाईट, एक महिना आणि तीन महिन्यांच्या MCLR मध्ये ५ बेसिस पॉईंट्सची घट केली आहे. विशेष म्हणजे, होम लोनसाठी अत्यंत महत्त्वाच्या मानल्या जाणाऱ्या 'एक वर्षाच्या MCLR' दरातही कपात करण्यात आली आहे.

नवीन दर काय आहेत?

एचडीएफसीच्या दर कपातीच्या घोषणेनंतर बँकेचे सुधारित MCLR दर लागू केले आहेत. त्यामुळे हे दर आता ८.२५% ते ८.५५% दरम्यान झाले आहेत.

EMI वर काय परिणाम होणार?

जेव्हा बँका आपला MCLR कमी करतात, तेव्हा कर्जाचा 'रीसेट कालावधी' आल्यावर ग्राहकांचे व्याजदर कमी होतात. परिणामी, तुमच्या मासिक हप्त्यात (EMI) कपात होते किंवा कर्जाचा कालावधी कमी होतो.कोणत्या कालावधीसाठी कर्ज स्वस्त झाले?

बँकेने सर्वच प्रकारच्या कर्जांचे दर कमी केलेले नाहीत, तर ठराविक कालावधीसाठी कपात केली आहे..

लगेच मिळणारे फायदे: 'ओव्हरनाईट' (एका दिवसासाठी), 'एक महिना' आणि 'तीन महिने' या कालावधीच्या व्याजदरात ०.०५% (5 Basis Points) घट करण्यात आली आहे.

होम लोन ग्राहकांसाठी: 'एक वर्षाचा' कालावधी, जो सहसा होम लोनसाठी वापरला जातो, त्या व्याजदरातही थोड्या प्रमाणात कपात झाली आहे.

बदल कोठे नाही?: सहा महिने, दोन वर्षे आणि तीन वर्षे या कालावधीसाठीचे व्याजदर आधीसारखेच राहतील, त्यात कोणताही बदल झालेला नाही.

थोडक्यात सांगायचे तर: या बदलांनंतर आता बँकेचे व्याजदर (MCLR) ८.२५% ते ८.५५% च्या दरम्यान असतील. याचा अर्थ असा की, जर तुमच्या कर्जाचा व्याजदर 'रिसेट' होण्याची वेळ आली असेल, तर तुम्हाला आता कमी व्याज भरावे लागेल.