सोनं-चांदी पुन्हा वधारलं! 'टॅरिफ'च्या निर्णयाने बाजारात मोठी उडी; बघा या आठवड्यात कसे असतील दर अंदाज

Gold silver rate forecast 23 27 february 2026 : जागतिक राजकारणातील उलथापालथ आणि अमेरिकेतील महत्त्वाच्या कायदेशीर निर्णयांमुळे सोन्या-चांदीच्या किमतींनी पुन्हा एकदा उसळी घेतली आहे. अमेरिकेचे राष्ट्राध्यक्ष डोनाल्ड ट्रम्प यांच्या टॅरिफ (कर) उपायांवर तेथील सर्वोच्च न्यायालयाने दिलेल्या निर्णयानंतर गुंतवणुकीसाठी 'सुरक्षित आश्रय' (Safe-haven) म्हणून सोन्याची मागणी वाढली असून किमतीत जोरदार उलटफेर पाहायला मिळाला आहे.

सोन्याच्या दरात मोठी वाढ (२१ फेब्रुवारीची स्थिती)

शनिवारी सोन्याच्या तिन्ही श्रेणींमध्ये (२४K, २२K आणि १८K) लक्षणीय वाढ नोंदवण्यात आली आहे.

• २४ कॅरेट सोने: प्रति ग्रॅम १९१ रुपयांनी वाढून १५,९२८ रुपये झाले.
• २२ कॅरेट सोने: प्रति ग्रॅम १७५ रुपयांनी वाढून १४,६०० रुपये झाले.
• १८ कॅरेट सोने: प्रति ग्रॅम १४३ रुपयांनी वाढून ११,९४६ रुपये झाले.

चांदीची विक्रमी झेप

चांदीच्या किमतीतही शनिवारी मोठी वाढ झाली असून दर प्रति किलो २,७५,००० रुपये इतका झाला आहे. गेल्या दोन महिन्यांपासून चांदीमध्ये प्रचंड अस्थिरता दिसून येत असून, किमतींनी ४ लाख रुपयांचा टप्पा ओलांडल्यानंतर फेब्रुवारीत त्या काहीशा घसरल्या होत्या.

जागतिक तणावाचा बाजारावर परिणाम

२३ ते २७ फेब्रुवारीच्या आठवड्यात गुंतवणूकदारांचे लक्ष प्रामुख्याने दोन मोठ्या घडामोडींकडे असेल.

१. डोनाल्ड ट्रम्प यांचे टॅरिफ धोरण: सर्वोच्च न्यायालयाने १०० हून अधिक देशांवरील कर रद्द केल्यानंतर ट्रम्प यांनी अतिरिक्त १०% कर लादण्याची घोषणा केली आहे, ज्यामुळे शेअर बाजारात अस्थिरता निर्माण झाली आहे.

२. अमेरिका-इराण युद्धजन्य परिस्थिती: इराणचे सर्वोच्च नेते अयातुल्ला अली खामेनी यांच्या हत्येच्या पर्यायाबाबत अमेरिकेत चर्चा सुरू असल्याच्या वृत्तामुळे जागतिक बाजारात भीतीचे वातावरण असून, यामुळे सोन्याच्या रॅलीला अधिक बळ मिळू शकते.

भविष्यातील अंदाज (Price Target)

तज्ज्ञांच्या मते, दीर्घकाळात सोन्या-चांदीची तेजी कायम राहील. 'ऑगमोंट'च्या संशोधन प्रमुख रेनिशा चैनानी यांच्या मते.

सोने: येत्या काळात भारतात सोन्याचे दर ₹ १,६३,००० ते ₹ १,७०,००० प्रति १० ग्रॅमपर्यंत जाऊ शकतात.

चांदी: भारतीय बाजारपेठेत चांदी ₹ ३,९०,००० ते ₹ ४,२०,००० प्रति किलोचे लक्ष्य गाठू शकते.