बँकांमध्ये 78,000 कोटींची बेवारस रक्कम: ही रक्कम तुमची तर नाही ना ? एका मिनिटात अशी करा चेक

Unclaimed Amount In Bank : देशातील बँकांमध्ये बेवारस पडून असलेल्या 78,000 कोटींपेक्षा जास्त रक्कमबाबत सरकारने मोठा निर्णय घेतला आहे. आता केंद्र सरकार हे पैसे ग्राहकांना परत करण्याची तयारी करत आहे. केंद्र सरकारने सर्व सरकारी बँकांना 2025-26 या आर्थिक वर्षात निष्क्रिय बँक खात्यांमधील किमान 30 ते 40% ठेवींची परतफेड करण्याचे निर्देश दिले आहेत.

ही रक्कम त्या खात्यांशी संबंधित आहे, ज्या खात्यामध्ये गेल्या 10 वर्षांपासून कोणताही व्यवहार झालेला नाही. या रक्कमेचा वापर करण्यासाठी सरकारने एक नवीन पोर्टल आणि जागरूकता मोहीम सुरू केली आहे, ज्यामुळे लोकांना त्यांचे बेवारस पैसे शोधण्याची आणि परत मिळवण्याची संधी मिळेल. ही रक्कम सामान्य नागरिकांच्या कष्टाच्या पैशाची असल्याने सरकारचा हा निर्णय आर्थिक समावेशनासाठी महत्त्वाचा ठरणार आहे.

भारतातील बँकांमध्ये, विमा कंपन्यांमध्ये, ईपीएफ आणि म्युच्युअल फंड्समध्ये सुमारे 1.96 लाख कोटी रुपये बेवारस रकमेच्या स्वरूपात पडून आहेत, त्यापैकी 78,000 कोटी रुपये बँक खात्यांशी संबंधित आहेत. बेवारस रक्कम म्हणजे अशी रक्कम जी दहा वर्षांपेक्षा जास्त काळ कोणत्याही व्यवहाराशिवाय (जमा किंवा काढणे) पडून आहे. तसेच या रक्कमेचा मालक किंवा वारस कोण आहे हे ठरलेले नाही. रिझर्व्ह बँक ऑफ इंडियाच्या (RBI) मते 2022 पर्यंत बँकांमध्ये बेवारस ठेवींची रक्कम 48,262 कोटी रुपये होती, जी आता वाढून 78,000 कोटींपर्यंत पोहोचली आहे. ही रक्कम मृत व्यक्तींच्या खात्यांमध्ये, निष्क्रिय खात्यांमध्ये किंवा संपर्क नसलेल्या खातेदारांमुळे पडून आहे.

बँकेत तुमचा दावा न केलेला स्टेटस कसे तपासायचे

जर तुम्हालाही वाटत असेल की तुमच्या निष्क्रिय बँक खात्यात पैसे आहेत तर तुम्ही त्याबद्दल माहिती घेऊ शकता. या रकमेची तपासणी करण्यासाठी रिझर्व्ह बँक ऑफ इंडिया (RBI) ने एक केंद्रीकृत पोर्टल UDGAM सुरू केले आहे. याद्वारे तुम्ही तुमचे पैसे आहेत की नाही हे सहजपणे शोधू शकता.

पोर्टलवर नोंदणी कशी करावी

1. प्रथम, UDGAM पोर्टल udgam.rbi.org.in ला भेट द्या.
अनक्लेम्ड अमाउंट सेक्शनमध्ये जा आणि नोंदणी करा.

2. नोंदणी करण्यासाठी, तुमचा नोंदणीकृत मोबाईल नंबर आणि तुमचे नाव प्रविष्ट करा.

3. आता पासवर्ड सेट करा आणि कॅप्चा कोड टाका.

4. चेक बॉक्सवर टिक करा आणि पुढे क्लिक करा.

5. त्यानंतर OTP टाकून पडताळणी करा.

6. आता तुम्ही तुमचे नाव आणि मोबाईल नंबर टाकून पासवर्ड तयार करू शकाल.

7. यानंतर तुम्ही मोबाईल नंबर आणि पासवर्डने लॉगिन करू शकाल.

8. पोर्टलवर, यूजर केवळ दावा न केलेल्या ठेवी शोधू शकत नाहीत तर दावे देखील करू शकतात.

बँकांमधील ठेवींची रक्कम शोधण्यासाठी इतर पर्याय

1. अनेक बँका अजूनही उमंग पोर्टलशी जोडल्या गेलेल्या नाहीत. जर तुमची बँक यादीत नसेल तर तुम्हाला बँकेच्या वेबसाइट किंवा शाखेला भेट देऊन त्यांच्याशी संपर्क साधावा लागेल. बँकांच्या पोर्टलवर वेळोवेळी माहिती अपडेट होत राहते. म्हणून ही माहिती तपासत राहा.

2. तुम्ही तुमच्या बँकेच्या शाखेला भेट देऊन देखील चौकशी करू शकता. यासाठी, तुमचे केवायसी कागदपत्रे नक्कीच सोबत ठेवा.

3. 10 वर्षांपासून निष्क्रिय असलेल्या बँक खात्यांची रक्कम बँकांकडून ठेवीदार शिक्षण आणि जागरूकता निधी (DEAF) मध्ये जमा केली जाते. जर तुमचे पैसे या फंडात असतील तर तुम्ही उमंग पोर्टलद्वारे माहिती मिळवू शकता.

4. जर तुमचा मोबाईल नंबर किंवा आधार तुमच्या बँक खात्याशी लिंक केलेला असेल तर तुम्ही तुमच्या बँकेच्या कस्टमर केअरला कॉल करून इंटरनेट बँकिंगद्वारे देखील ही माहिती मिळवू शकता.