31 डिसेंबरपूर्वी उरका 'ही' 4 महत्त्वाची कामे; अन्यथा होईल मोठे आर्थिक नुकसान!, जाणून घ्या सविस्तर!

Published: Saturday, December 27, 2025, 13:43 [IST]

Financial tasks before December 31 : मुलभूत आर्थिक शिस्त आणि नियोजनासाठी वर्षअखेर अत्यंत महत्त्वाची असते. २०२५ हे वर्ष संपायला आता अवघे काही दिवस शिल्लक आहेत. जर तुम्ही ३१ डिसेंबरपर्यंत काही महत्त्वाची आर्थिक कामे पूर्ण केली नाहीत, तर १ जानेवारी २०२६ पासून तुम्हाला वाढीव किमती, दंड किंवा निष्क्रिय कागदपत्रांचा सामना करावा लागू शकतो. जाणून घ्या कोणत्या 4 गोष्टींकडे तुम्ही तातडीने लक्ष दिले पाहिजे.

१. स्वस्त गाडी खरेदीची शेवटची संधी (किमती २-३% ने वाढणार)

जर तुम्ही नवीन कार घेण्याचा विचार करत असाल, तर ३१ डिसेंबरपर्यंतची वेळ तुमच्यासाठी फायदेशीर आहे. १ जानेवारीपासून अनेक दिग्गज ऑटोमोबाईल कंपन्या आपल्या वाहनांच्या किमती वाढवणार आहेत. वाढता इनपुट कॉस्ट (उत्पादन खर्च) कारणीभूत असल्याचे कंपन्यांनी म्हटले आहे.

वाढ किती?

MG मोटरने आपल्या कारच्या किमती २% पर्यंत वाढवल्या आहेत, ज्यामुळे 'हेक्टर' सारखी गाडी ३८ हजार रुपयांनी महाग होईल.

लक्झरी कार्स

मर्सिडीज आणि BMW ने देखील २ ते ३ टक्क्यांपर्यंत दरवाढ जाहीर केली आहे. मारुती, टाटा आणि ह्युंदाई देखील लवकरच दरवाढीची अधिकृत घोषणा करण्याची शक्यता आहे.

२. लघु बचत योजना : गुंतवणुकीवर जास्त व्याज मिळवण्याची वेळ

सार्वजनिक भविष्य निर्वाह निधी (PPF), सुकन्या समृद्धी योजना (SSY) आणि ज्येष्ठ नागरिक बचत योजना यांसारख्या 11 लहान बचत योजनांच्या व्याजदरात कपात होण्याची शक्यता आहे.

रेपो रेटचा परिणाम : आरबीआयने ५ डिसेंबर रोजी रेपो दर ०.२५% ने कमी करून ५.२५% केला आहे. बँकांना स्वस्त दरात पैसे उपलब्ध झाल्यामुळे आता मुदत ठेव (FD) आणि सरकारी योजनांचे व्याजदर कमी होऊ शकतात.

संधी : सरकार प्रत्येक तिमाहीत (जानेवारी, एप्रिल, जुलै, ऑक्टोबर) व्याजदरांचा आढावा घेते. त्यामुळे सध्याच्या जास्त व्याजदराचा लाभ घेण्यासाठी ३१ डिसेंबरपूर्वी गुंतवणूक करणे शहाणपणाचे ठरेल.

३. आधार-पॅन लिंकिंग: शेवटचे ५ दिवस शिल्लक

ज्यांचे आधार कार्ड १ ऑक्टोबर २०२४ रोजी किंवा त्यापूर्वी बनले आहे, त्यांच्यासाठी ३१ डिसेंबर २०२५ ही पॅन कार्डशी लिंक करण्याची शेवटची मुदत आहे.

लिंक न केल्यास काय होईल? : तुमचे पॅन कार्ड 'निष्क्रिय' (Invalid) होईल.

परिणाम : पॅन कार्ड बंद झाल्यास तुम्ही इन्कम टॅक्स रिटर्न (ITR) भरू शकणार नाही. तसेच बँकिंग व्यवहार, म्युच्युअल फंड गुंतवणूक आणि रखडलेला टॅक्स रिफंड मिळवण्यात मोठ्या अडचणी येतील.

४. इन्कम टॅक्स रिटर्न (ITR): विलंब शुल्काचा धोका

आर्थिक वर्ष २०२४-२५ साठी अद्याप आयटीआर भरला नसेल, तर ३१ डिसेंबरपर्यंत 'बिलेटेड रिटर्न' भरण्याची संधी आहे. त्यानंतर मात्र परतावा (Refund) मिळणे कठीण होईल.

विलंब शुल्क (Late Fee) : ५ लाखांपेक्षा कमी उत्पन्न असल्यास: १,००० रुपये दंड.

५ लाखांपेक्षा जास्त उत्पन्न असल्यास : ५,००० रुपये दंड.

ITR-U चा फटका : जर तुम्ही ३१ डिसेंबरची डेडलाईन चुकवली, तर तुम्हाला 'अपडेटेड रिटर्न' (ITR-U) भरावा लागेल, ज्यामध्ये कराच्या रकमेवर २५% ते ७०% पर्यंत अतिरिक्त दंड द्यावा लागू शकतो.