WPL 2026: पहिल्याच सामन्यात भारताच्या 2 वाघीणी एकमेकांशी भिडणार! मुंबई VS बंगळुरू मॅचचे डिटेल्स वाचा

WPL 2026 MI vs RCB opening match : क्रिकेट चाहत्यांची प्रतीक्षा अखेर संपली आहे. 'विमेन्स प्रीमियर लीग' २०२६ च्या हंगामाचा थरार आजपासून म्हणजेच ९ जानेवारीपासून सुरू होत आहे. सलामीचा सामना गतविजेत्या मुंबई इंडियन्स आणि २०२४ च्या चॅम्पियन रॉयल चॅलेंजर्स बंगळुरू यांच्यात रंगणार आहे. नवी मुंबईच्या डी. वाय. पाटील स्टेडियमवर होणारा हा महामुकाबला हरमनप्रीत कौर विरुद्ध स्मृती मंधाना असा असेल.

दोन्ही संघांचे बलाबल

कागदावर पाहिल्यास हरमनप्रीत कौरच्या नेतृत्वाखालील मुंबई इंडियन्सचा संघ अधिक संतुलित वाटत आहे. दक्षिण आफ्रिकेची वेगवान गोलंदाज शबनम इस्माइलच्या पुनरागमनामुळे मुंबईची गोलंदाजी अधिक धारदार झाली आहे. दुसरीकडे, स्मृती मंधानाच्या आरसीबी संघात ऋचा घोष आणि ग्रेस हॅरिस सारख्या स्फोटक फलंदाजांची फौज आहे, ज्या कोणत्याही क्षणी सामन्याचे चित्र पालटू शकतात.

पिच रिपोर्ट आणि हवामान

कशी आहे खेळपट्टी?

डी. वाय. पाटील स्टेडियमची खेळपट्टी फलंदाजांसाठी नंदनवन मानली जाते. येथे चेंडू बॅटवर चांगल्या उसळीसह येतो, ज्यामुळे मोठे फटके मारणे सोपे होते.

हवामान कसे राहील?

आज नवी मुंबईत हवामान क्रिकेटसाठी पोषक असेल. तापमान २१°C ते ३१°C दरम्यान राहण्याचा अंदाज आहे.

रात्रीच्या वेळी दव पडण्याची शक्यता असल्याने टॉस जिंकणारा संघ प्रथम गोलंदाजी करण्याचा निर्णय घेऊ शकतो, कारण दुसऱ्या डावात ओल्या चेंडूवर ग्रीप मिळवणे गोलंदाजांसाठी कठीण होऊ शकते.

WPL: मुंबई इंडियन्स विरुद्ध आरसीबी - हेड टू हेड रेकॉर्ड

विमेन्स प्रीमियर लीगच्या इतिहासात मुंबई इंडियन्स आणि रॉयल चॅलेंजर्स बेंगळुरू हे दोन सर्वात लोकप्रिय संघ जेव्हा जेव्हा आमनेसामने आले आहेत, तेव्हा क्रिकेट चाहत्यांना हाय-व्होल्टेज सामने पाहायला मिळाले आहेत.

• एकूण सामने खेळले: ७
• मुंबई इंडियन्सचा विजय: ४
• आरसीबीचा विजय: ३

आजच्या सामन्यातील महत्वाचे मुद्दे

• हरमनप्रीत कौर विरुद्ध श्रेयंका पाटील: मुंबईच्या कर्णधाराला रोखण्यासाठी आरसीबी आपली युवा फिरकीपटू श्रेयंकाचा वापर करू शकते.
• स्मृती मंधाना विरुद्ध शबनम इस्माइल: जगातील सर्वात वेगवान महिला गोलंदाज शबनम इस्माइल आणि स्मृती मंधाना यांच्यातील लढत पाहण्यासारखी असेल.

दोन्ही संघांची संभाव्य प्लेइंग-XI

मुंबई इंडियन्स: हेली मॅथ्यूज, नेट सायव्हर-ब्रंट, हरमनप्रीत कौर (कर्णधार), अमेलिया केर, सजीवन सजना, अमनजोत कौर, जी. कमलिनी, शबनम इस्माइल, सायका इशाक, निकोला केरी, पूनम खेमनार.

आरसीबी: स्मृती मंधाना (कर्णधार), ऋचा घोष, श्रेयंका पाटील, नदीन डी क्लार्क, ग्रेस हॅरिस, जॉर्जिया वोल, राधा यादव, लॉरेन बेल, अरुंधती रेड्डी, पूजा वस्त्राकर, दयालन हेमलता.

या हाय-व्होल्टेज सामन्यात एलिस पेरीची अनुपस्थिती आरसीबीला जाणवू शकते, ज्याचा फायदा घेण्याचा प्रयत्न मुंबई इंडियन्स करेल.