क्रिकेट विश्वात बिहारच्या वैभवचा धमाका! 39 वर्षांचा जागतिक विक्रम मोडीत काढत बनला सर्वात तरुण शतकवीर

Vaibhav Suryavanshi Breaks 39 Year Record : भारतीय क्रिकेटच्या क्षितिजावर एका नवीन ताऱ्याचा उदय झाला आहे. बिहारच्या अवघ्या १४ वर्षीय वैभव सूर्यवंशीने विजय हजारे ट्रॉफीमध्ये ऐतिहासिक कामगिरी करत क्रिकेट विश्वाचे लक्ष वेधून घेतले आहे. अरुणाचल प्रदेशविरुद्ध खेळताना वैभवने केवळ धावांचा पाऊस पाडला नाही, तर ३९ वर्षांपूर्वीचा पाकिस्तानच्या खेळाडूचा जागतिक विक्रमही मोडीत काढला.

३९ वर्षांचा विश्वविक्रम उद्ध्वस्त

वैभव सूर्यवंशी आता लिस्ट-ए (List-A) क्रिकेटमध्ये शतक झळकावणारा जगातील सर्वात तरुण खेळाडू ठरला आहे. त्याने वयाच्या १४ वर्षे २७२ दिवसांच्या असताना हे शिखर गाठले. यापूर्वी हा विक्रम पाकिस्तानच्या झहूर इलाहीच्या नावावर होता. इलाहीने १९८६ मध्ये वयाच्या १५ वर्षे २०९ दिवसांच्या असताना शतक झळकावले होते. तब्बल ३९ वर्षांनंतर वैभवने हा विक्रम मोडीत काढून भारताच्या नावावर केला आहे.

वादळी खेळी: ८४ चेंडूत १९० धावा!

रांची येथील जेएससीए ओव्हल मैदानावर बिहार विरुद्ध अरुणाचल प्रदेश हा सामना पार पडला. बिहारचा उपकर्णधार असलेल्या वैभवने सुरुवातीपासूनच आक्रमक पवित्रा घेतला. त्याने अवघ्या ३६ चेंडूत आपले शतक पूर्ण केले. वैभव एवढ्यावरच थांबला नाही, तर त्याने ८४ चेंडूंचा सामना करताना १९० धावांची जबरदस्त खेळी केली. या खेळीत त्याने १६ चौकार आणि १५ उत्तुंग षटकार ठोकले.

भारतीय विक्रमाची बरोबरी

लिस्ट-ए क्रिकेटमध्ये भारतीय फलंदाजाकडून सर्वात जलद शतकाचा विक्रम पंजाबच्या अनमोलप्रीत सिंगच्या (३५ चेंडू) नावावर आहे. वैभवने ३६ चेंडूत शतक पूर्ण करून अनमोलप्रीतच्या विक्रमाशी जवळपास बरोबरी साधली आहे. यासह त्याने युसूफ पठाण (४० चेंडू), उर्विल पटेल (४१ चेंडू) आणि अभिषेक शर्मा (४२ चेंडू) यांसारख्या स्फोटक फलंदाजांनाही मागे टाकले आहे.

काय आहे लिस्ट-ए क्रिकेट? देशांतर्गत खेळल्या जाणाऱ्या एकदिवसीय (५० षटके) सामन्यांना 'लिस्ट-ए' दर्जा दिला जातो. यामध्ये आंतरराष्ट्रीय एकदिवसीय सामने आणि विजय हजारे ट्रॉफीसारख्या प्रमुख देशांतर्गत स्पर्धांचा समावेश होतो.

सर्वात जलद लिस्ट-ए शतकांचे मानकरी

जागतिक स्तरावर सर्वात जलद लिस्ट-ए शतकाचा विक्रम ऑस्ट्रेलियाच्या जॅक फ्रेझर-मॅकगर्कच्या नावावर आहे, ज्याने २०२३ मध्ये २९ चेंडूत शतक झळकावले होते. त्यानंतर दक्षिण आफ्रिकेचा दिग्गज एबी डिव्हिलियर्स (३१ चेंडू) याचा क्रमांक लागतो.

दोन्ही संघांची प्लेइंग इलेव्हन

बिहार संघाची टीम : वैभव सूर्यवंशी, साकिबुल गनी (कर्णधार), आयुष लोहारुका (यष्टीरक्षक), मंगल महारौर, पियुष सिंग, आकाश राज, बिपिन सौरभ, सूरज कश्यप, हिमांशू तिवारी, साबीर खान, बादल कनोजिया.

अरुणाचल प्रदेश संघाची टीम : कमशा यांगफो (कर्णधार), सूर्यांश सिंग, टेची नेरी, तडकमल्ला मोहित, नीलम ओबी, नबाम टेम्पोल, आदित्य वर्मा, धीरज अँटिन, टेची सानिया, मिबोम मोसू, टेची डोरिया.

वैभव सूर्यवंशीच्या या कामगिरीमुळे भारतीय क्रिकेटमध्ये खळबळ उडाली असून, भविष्यातील तो एक मोठा खेळाडू म्हणून पाहिला जात आहे. नुकत्याच झालेल्या आयपीएल लिलावातही वैभववर मोठी बोली लागली होती, आणि आता त्याने मैदानात आपल्या बॅटने त्याची किंमत सिद्ध केली आहे.