शिखर धवनला मोठा दिलासा: EX वाईफला 5.7 कोटी रुपये परत करण्याचे आदेश; ऑस्ट्रेलियन कोर्टावरही ताशेरे!

भारतीय क्रिकेट संघाचा माजी धडाकेबाज सलामीवीर शिखर धवन याला वैयक्तिक आयुष्यातील कायदेशीर लढाईत मोठे यश मिळाले आहे. दिल्लीच्या कौटुंबिक न्यायालयाने एक महत्त्वपूर्ण निकाल देत धवनची माजी पत्नी आयशा मुखर्जी हिला ५.७ कोटी रुपये परत करण्याचे आदेश दिले आहेत. परदेशातील न्यायालयाने दिलेला मालमत्ता वाटपाचा निर्णय भारतीय कायद्याशी सुसंगत नसल्याचे निरीक्षण नोंदवत न्यायालयाने धवनच्या बाजूने कौल दिला आहे.

वादाचे मूळ: ऑस्ट्रेलियन न्यायालयाचा 'एकतर्फी' निर्णय

शिखर धवन आणि आयशा मुखर्जी यांचा ऑक्टोबर २०२३ मध्ये घटस्फोट झाला. आयशा ऑस्ट्रेलियन नागरिक असल्याने हे प्रकरण तिथल्या न्यायालयातही गेले होते.

६०% वाट्याचा आदेश : ऑस्ट्रेलियाच्या कौटुंबिक न्यायालयाने तिथल्या कायद्यानुसार (मालमत्ता सेटलमेंट नियम १९७५) धवनच्या भारत आणि परदेशातील एकूण मालमत्तेपैकी तब्बल ६० टक्के हिस्सा आयशाला देण्याचे आदेश दिले होते.

जबरदस्तीने वसुली : या आदेशानुसार धवनला ८.१२ लाख ऑस्ट्रेलियन डॉलर देण्यास भाग पाडले गेले होते. तसेच तिथली मालमत्ता विकून पैसे देण्याची सक्ती करण्यात आली होती.

दिल्ली न्यायालयाचे चोख प्रत्युत्तर

दिल्लीच्या कौटुंबिक न्यायालयाचे न्यायाधीश देवेंद्र कुमार गर्ग यांनी या प्रकरणातील तांत्रिक आणि कायदेशीर त्रुटींवर बोट ठेवले:

भारतीय कायद्याचे वर्चस्व : न्यायालयाने स्पष्ट केले की, 'हिंदू विवाह अधिनियम १९५५' आणि भारतीय वैवाहिक कायदे हे ऑस्ट्रेलियन कायद्यापेक्षा वेगळे आहेत. भारतात पतीच्या संपूर्ण वैयक्तिक मालमत्तेवर पत्नीचा हक्क सांगणारा कोणताही नियम नाही.

एकतर्फी प्रक्रिया : ऑस्ट्रेलियन न्यायालयाने धवनविरुद्ध एकतर्फी निर्णय दिला होता. तसेच, आयशा भारतीय न्यायालयात हजरही झाली नाही. त्यामुळे भारताबाहेरील असा निर्णय भारतीय नागरिकावर लादता येणार नाही.

परताव्याचा आदेश : आयशाने मालमत्ता सेटलमेंटच्या नावाखाली धवनकडून घेतलेली ५.७० कोटी रुपयांची रक्कम त्याला परत करावी, असे आदेश न्यायालयाने दिले आहेत.

भारतीय विवाह कायदा आणि मालमत्ता वाटप

भारतात घटस्फोटाच्या वेळी मालमत्तेचे वाटप कसे होते, यावर न्यायालयाने प्रकाश टाकला.

संयुक्त मालमत्ता : हिंदू विवाह कायद्याच्या कलम २७ नुसार केवळ पती-पत्नीच्या नावावर असलेल्या 'संयुक्त' मालमत्तेचेच वाटप केले जाते.

स्त्रीधन : पत्नीला लग्नात मिळालेले दागिने, भेटवस्तू (स्त्रीधन) यावर केवळ पत्नीचा अधिकार असतो.

पोटगी (Alimony) : कलम २५ नुसार पत्नीला सन्मानाने जगण्यासाठी पतीकडून पोटगी मिळवण्याचा अधिकार आहे, परंतु पतीच्या एकूण मालमत्तेतील मोठा हिस्सा मिळवण्याची तरतूद सरसकट लागू नाही.

धवन-आयशा नातेसंबंधाचा प्रवास

२०११ मध्ये शिखर आणि आयशा विवाहबंधनात अडकले होते. आयशा धवनपेक्षा वयाने मोठी असून तिला पहिल्या लग्नापासून दोन मुली आहेत. सुमारे ११ वर्षांच्या संसारानंतर २०२३ मध्ये त्यांचा अधिकृत घटस्फोट झाला. त्यांना 'जोरावर' नावाचा एक मुलगा आहे.

शिखर धवनची देदीप्यमान कारकीर्द

हा निकाल अशा वेळी आला आहे जेव्हा धवनने क्रिकेटच्या सर्व फॉरमॅटमधून निवृत्ती जाहीर केली आहे. २०१० मध्ये वनडे आणि २०१३ मध्ये कसोटी पदार्पण करत त्याने 'गब्बर' म्हणून ओळख निर्माण केली. भारतासाठी ३४ कसोटी, १६७ वनडे आणि ६८ टी-२० सामने खेळणाऱ्या धवनने आंतरराष्ट्रीय क्रिकेटमध्ये २४ शतके आणि ५५ अर्धशतके झळकावली आहेत.