ऋषभ पंतची एक कृती अन् सोशल मीडियावर उडाला गोंधळ, नेमकं काय घडलं, जाणून घ्या सर्व काही!

Rishabh Pant Latest News : भारतीय क्रिकेट संघाचा धडाकेबाज फलंदाज ऋषभ पंत हा त्याच्या मैदानावरील कामगिरीमुळे नेहमीच चर्चेत असतो. पण आता मैदानाबाहेर केलेल्या एका कृतीमुळे त्याने लाखो लोकांची मने जिंकली आहेत. आर्थिक अडचणींमुळे शिक्षण सोडून द्याव्या लागणाऱ्या एका विद्यार्थ्याला मदत करून पंतने पुन्हा एकदा आपले मोठे मन दाखवून दिले आहे. या घटनेमुळे सर्वत्र त्याचे कौतुक होत आहे.

नेमकी घटना काय?

कर्नाटकातील बिल्गी तालुक्यातील रबकवी गावातील ज्योती कनाबूर मठ नावाच्या विद्यार्थिनीने प्री-युनिव्हर्सिटी कोर्समध्ये ८५% गुण मिळवले होते. तिला जमखंडी येथील बिजापूर लिंगायत शिक्षण संस्थेत बीसीए (बॅचलर ऑफ कॉम्प्युटर ॲप्लिकेशन्स) मध्ये प्रवेश मिळाला. मात्र, कुटुंबाची आर्थिक परिस्थिती हलाखीची असल्याने तिचे वडील कॉलेजची फी भरू शकत नव्हते. यामुळे ज्योतीच्या उच्च शिक्षणाचे स्वप्न धोक्यात आले होते.

ऋषभ पंतची मदतीची धाव!

ज्योतीच्या वडिलांनी स्थानिक हितचिंतक अनिल यांच्याशी संपर्क साधला. अनिल यांनी बेंगळूरूमध्ये त्यांच्या क्रिकेटशी संबंधित मित्रांशी याबद्दल बोलले. योगायोगाने, ही माहिती थेट ऋषभ पंतपर्यंत पोहोचली. याबद्दल कळताच पंतने कोणतीही दिरंगाई न करता, लगेच मदतीसाठी हात पुढे केला.

पंतने ४०,००० रुपयांची कॉलेज फी थेट कॉलेज प्रशासनाकडे जमा केली. यामुळे ज्योतीला तिच्या शिक्षणात कोणताही अडथळा आला नाही. पंतच्या या औदार्याने ज्योती आणि कॉलेज प्रशासनावर खूप प्रभाव पडला. ज्योतीने एक भावनिक पत्र लिहून पंतचे आभार मानले आणि भविष्यात आपणही अशा प्रकारे इतरांना मदत करण्याचे वचन दिले.

पत्रातील भावना!

आपल्या पत्रात ज्योतीने लिहिले की, "मला बीसीएचा अभ्यास करायचा होता, पण आर्थिक परिस्थितीमुळे माझ्या पालकांनी मदत मागितली. जेव्हा ही गोष्ट भारतीय क्रिकेटपटू ऋषभ पंतला कळली, तेव्हा त्यांनी मला ४०,००० रुपयांची मदत केली. यामुळे मी माझा अभ्यास सुरू ठेवू शकले. मी त्याचे मनापासून आभार मानते आणि त्याच्या दीर्घायुष्यासाठी देवाकडे प्रार्थना करते."

ऋषभ पंतची ही कृती केवळ आर्थिक मदतीपुरती मर्यादित नाही, तर त्याने एका हुशार विद्यार्थ्याचे भविष्य सुरक्षित केले आहे. मैदानावर आपल्या आक्रमक खेळाने प्रेक्षकांना जिंकणारा हा खेळाडू मैदानाबाहेरच्या माणुसकीच्या कृतीमुळे खऱ्या अर्थाने हिरो ठरला आहे.