"ठिकाण अन् वेळ मी ठरवेल!" 'या' भारतीय क्रिकेटपटूला मागितली 5 कोटींची खंडणी! अंडरवर्ल्डची धमकी?

Rinku Singh Extortion Case : भारतीय क्रिकेट संघाचा युवा आणि तुफानी फलंदाज रिंकू सिंह याच्या नावाने एक अत्यंत धक्कादायक बातमी समोर आली आहे. रिंकू सिंहकडे ₹५ कोटी रुपयांची खंडणी मागितल्याचे गंभीर प्रकरण उघडकीस आले आहे, ज्यामुळे राष्ट्रीय तपास यंत्रणांचे कान उभे झाले आहेत.

या प्रकरणी तातडीने कारवाई करत तपास यंत्रणांनी दोन व्यक्तींना अटक केली असून, त्यातील मुख्य आरोपीला थेट वेस्ट इंडीजमधून (त्रिनिदाद) 'रेड कॉर्नर नोटीस' जारी करून भारतात आणण्यात आले आहे.

प्रकरण काय आहे?

रिंकू सिंहला खंडणीसाठी धमकावण्याचे सत्र फेब्रुवारी २०२५ मध्ये सुरू झाले.

पहिला संदेश (५ फेब्रुवारी २०२५): आरोपीने रिंकू सिंहला एक साधा संदेश पाठवला. यामध्ये त्याने रिंकू हा केकेआरकडून खेळत असल्याबद्दल आनंद व्यक्त केला आणि 'थोडी आर्थिक मदत' मागितली.

दुसरा संदेश (९ एप्रिल २०२५): कोणताही प्रतिसाद न मिळाल्याने आरोपीने थेट ₹५ कोटी रुपयांची मागणी केली आणि त्यासाठी 'वेळ व ठिकाण मी ठरवेन' असे लिहिले.

धमकीचा संदेश (२० एप्रिल २०२५): दुसऱ्या संदेशालाही रिंकूने प्रतिसाद न दिल्यावर, आरोपीने इंग्रजीत एक 'रिमाइंडर' संदेश पाठवला, ज्यामध्ये 'D-Company' (डी-कंपनी) चा उल्लेख करत धमकीचा स्पष्ट संकेत दिला. या धमक्यांमुळे रिंकू सिंहच्या सुरक्षेबाबत चिंता व्यक्त करण्यात आली आणि तात्काळ तपास सुरू झाला.

खंडणी मागणारा आरोपी कोण? (वेस्टइंडीज कनेक्शन)

• या खंडणी प्रकरणात मोहम्मद दिलशाद आणि मोहम्मद नवीद या दोन व्यक्तींचा सहभाग असल्याचे मानले जात आहे मुख्य आरोपी नवीद हा मूळचा बिहारमधील दरभंगा येथील रहिवासी आहे.
• मुंबई गुन्हे शाखेने तांत्रिक पाळत ठेवून नवीदचा ठावठिकाणा वेस्ट इंडीजमध्ये (त्रिनिदाद आणि टोबॅगो) शोधला. इंटरपोल आणि परराष्ट्र मंत्रालयाच्या मदतीने त्याच्याविरुद्ध लुकआउट नोटीस (LOC) आणि नंतर रेड कॉर्नर नोटीस जारी करण्यात आली.
• आंतरराष्ट्रीय स्तरावर कारवाई करून नवीदला वेस्ट इंडीजमधून भारतात आणण्यात आले आणि त्याला अटक करण्यात आली.

पोलिसांनी दिलेल्या माहितीनुसार, अटक केलेल्या एका आरोपीने खंडणी मागितल्याची कबूल केली आहे. या रॅकेटमध्ये आणखी कोणी सामील आहे का, याचा तपास पोलीस करत आहेत. यापूर्वीही आरोपी दिलशाद याने डी-कंपनीच्या नावाने झीशान सिद्दीकी (माजी आमदार बाबा सिद्दीकी यांचा मुलगा) यांनाही खंडणीसाठी धमकावल्याचे उघड झाले आहे.

हेही वाचा : Ind vs Pak: भारताने आशिया कप जिंकला, पाकचा पराभव; तिलक वर्मा ठरला 'संकटमोचक', कुलदीपच्या 4 विकेट्स!