RCB च्या यश दयालवर गंभीर आरोप; शारीरिक शोषण प्रकरणामुळे कारकिर्द धोक्यात

IPL 2025 मध्ये विजेतेपद मिळवलेल्या रॉयल चॅलेंजर्स बंगळुरु संघाचा वेगवान गोलंदाज यश दयाल सध्या गंभीर आरोपांच्या भोवऱ्यात सापडला आहे. उत्तर प्रदेशातील गाजियाबाद येथील इंदिरापूरम परिसरात राहणाऱ्या एका युवतीने त्याच्यावर लग्नाचं आश्वासन देऊन शारीरिक आणि मानसिक शोषण केल्याचा आरोप केला आहे. या प्रकरणी पोलिसांनी गुन्हा नोंदवला असून, यश दयालची अडचण मोठ्या प्रमाणावर वाढली आहे.

पाच वर्षांच्या संबंधांनंतर पोलिसांत तक्रार

तक्रारदार युवतीने पोलिसांना दिलेल्या माहितीनुसार, ती मागील पाच वर्षांपासून यश दयालसोबत प्रेमसंबंधात होती. यशने तिला लग्नाचे वचन देत वारंवार शारीरिक संबंध ठेवले. मात्र, नंतर तो मागे हटला आणि लग्नाची बोलणी टाळू लागला. एवढंच नाही, तर यशचे इतर अनेक मुलींशीही संबंध असल्याचा आरोप तिने केला आहे.

युवतीने आपल्या आरोपांचे समर्थन म्हणून चॅटचे स्क्रीनशॉट, व्हिडिओ कॉल्स आणि काही फोटो पोलिसांना पुराव्यादाखल सादर केले आहेत. पोलिसांनी यावर कारवाई करत यश दयालविरोधात गुन्हा दाखल केला आहे.

मारहाणीचा आरोप आणि हेल्पलाइनवर तक्रार

या प्रकरणात आणखी एक धक्कादायक बाब पुढे आली आहे. युवतीने सांगितलं की, जेव्हा तिने यशला लग्नाच्या आश्वासनाची आठवण करून दिली, तेव्हा त्याने तिच्यावर शारीरिक मारहाण केली. तिने 14 जून रोजी महिला हेल्पलाइन 181 वर संपर्क केला, पण प्रतिसाद न मिळाल्याने तिने 21 जून रोजी थेट मुख्यमंत्री हेल्पलाइनवर तक्रार दाखल केली.

यश दयालच्या वडिलांची प्रतिक्रिया

यश दयालच्या वडिलांनी या प्रकरणावर प्रतिक्रिया देताना म्हटले आहे की, "आम्हाला त्या मुलीची ओळख नाही. ती आमच्यावर हे आरोप का करत आहे, हेच समजत नाही."

IPL 2025 मध्ये यश दयालचा परफॉर्मन्स

IPL 2025 च्या मोसमात यश दयालने RCB कडून 15 सामने खेळले आणि एकूण 13 विकेट्स घेतल्या. याच मोसमात RCB ने पहिल्यांदाच IPL चषक जिंकला होता. यश दयाल उत्तर प्रदेशकडून रणजी क्रिकेटमध्येही खेळतो.

या प्रकरणामुळे त्याच्या कारकिर्दीवर मोठे संकट ओढवले आहे. तपास सुरू असून, पुढील काही दिवसांमध्ये यामध्ये अधिक माहिती स्पष्ट होण्याची शक्यता आहे.