IPL लिलावात अनकॅप्ड खेळाडूंची चांदी! प्रशांत वीर व कार्तिक शर्मावर कोट्यवधींचा वर्षाव, वाचा सविस्तर!

IPL 2026 Mini Auction : इंडियन प्रीमियर लीग (IPL) २०२६ च्या मिनी लिलावात मंगळवारी पैशांचा पाऊस पडला. अबू धाबी येथे पार पडलेल्या या लिलावात अनकॅप्ड (आंतरराष्ट्रीय अनुभव नसलेल्या) भारतीय खेळाडूंनी सर्वांचे लक्ष वेधून घेतले.

चेन्नई सुपर किंग्सने (CSK) प्रशांत वीर आणि कार्तिक शर्मा या युवा खेळाडूंना प्रत्येकी १४.२० कोटी रुपयांना खरेदी करत सर्वांना थक्क केले. दुसरीकडे, ऑस्ट्रेलियाचा कॅमेरॉन ग्रीन हा आयपीएल इतिहासातील सर्वात महागडा परदेशी खेळाडू ठरला आहे.

प्रशांत वीर आणि कार्तिक शर्मा: रातोरात झाले करोडपती!

लिलावाचा सर्वात मोठा धक्का उत्तर प्रदेशच्या २० वर्षीय प्रशांत वीर याने दिला.

४७ पट किंमत

प्रशांतची मूळ किंमत (Base Price) अवघी ३० लाख रुपये होती. मात्र, त्याच्यासाठी झालेल्या चुरशीच्या बोलीत चेन्नईने त्याला १४.२० कोटींना आपल्या संघात घेतले. ही रक्कम त्याच्या मूळ किमतीच्या तब्बल ४७ पट अधिक आहे.

कार्तिक शर्मा

प्रशांतप्रमाणेच कार्तिक शर्मावरही चेन्नईने विश्वास दाखवत त्याला १४.२० कोटी रुपयांची मोठी बोली लावून ताफ्यात सामील केले.

कॅमेरॉन ग्रीनचा नवा विक्रम

कोलकाता नाईट रायडर्सने (KKR) ऑस्ट्रेलियन अष्टपैलू कॅमेरॉन ग्रीनला २५.२० कोटी रुपयांना विकत घेतले.

परदेशी खेळाडूंमध्ये अव्वल: ग्रीनने मिचेल स्टार्कचा २४.७५ कोटींचा विक्रम मोडीत काढला.

पगार मर्यादा

जरी केकेआरने २५.२ कोटींची बोली लावली असली, तरी बीसीसीआयच्या नियमानुसार ग्रीनला प्रत्यक्षात १८ कोटी रुपयेच मिळतील. उर्वरित ७.२ कोटी रुपये बीसीसीआयच्या कल्याण निधीत जमा होतील. परदेशी खेळाडूंनी मिनी लिलावाचा गैरफायदा घेऊ नये म्हणून ही १८ कोटींची मर्यादा निश्चित करण्यात आली आहे.

लिलावातील अन्य महत्त्वाच्या घडामोडी!

लिलावात अनेक अनुभवी खेळाडूंना अपेक्षित किंमत मिळाली नाही, तर काही अनकॅप्ड खेळाडूंनी बाजी मारली:

• आकिब नबी दार : दिल्ली कॅपिटल्सने या खेळाडूला ८.४० कोटी रुपयांना विकत घेतले.
• मथिशा पाथिराना : श्रीलंकेच्या या वेगवान गोलंदाजाला कोलकाताने १८ कोटी देऊन संघात कायम ठेवले.
• वेंकटेश अय्यर : २०२४ मध्ये २३.७५ कोटी मिळवणाऱ्या व्यंकटेशला यावेळी आरसीबीने केवळ ७ कोटींत विकत घेतले.
• रवी बिश्नोई : राजस्थान रॉयल्सने फिरकीपटू बिश्नोईला ७.२० कोटींना आपल्या ताफ्यात घेतले.
• अनकॅप्ड ऑल-राउंडर्सचा संमिश्र प्रतिसाद!

सातव्या सेटमध्ये १० खेळाडूंपैकी केवळ ३ खेळाडू विकले गेले:

• आकिब नबी दार: ८.४० कोटी (दिल्ली कॅपिटल्स)
• प्रशांत वीर: १४.२० कोटी (चेन्नई सुपर किंग्स)
• शिवंग कुमार: ३० लाख (सनरायझर्स हैदराबाद) दुर्दैवाने राजवर्धन हंगरगेकर, तनुष कोटियन, महिपाल लोमरोर आणि विजय शंकर यांसारख्या अनुभवी खेळाडूंना कोणताही खरेदीदार मिळाला नाही.

इतिहासातील सर्वात महागडे खेळाडू

• खेळाडू : संघ : किंमत
• ऋषभ पंत : लखनौ सुपर जायंट्स : २७ कोटी
• कॅमेरॉन ग्रीन : कोलकाता नाईट रायडर्स : २५.२० कोटी
• मिचेल स्टार्क : कोलकाता नाईट रायडर्स : २४.७५ कोटी