IPLमधील टॉप 10 रेकॉर्ड्स; सर्वात वेगवान शतक कोणी ठोकले, एका षटकात सर्वाधिक धावा कोणाच्या नावावर!

IPL Top 10 Unbreakable IPL Records : इंडियन प्रीमियर लीग (IPL) 2025 आज म्हणजेच 22 मार्च रोजी सुरू होत आहे. 18 व्या हंगामाचा अंतिम सामना 25 मे रोजी खेळला जाईल. ईडन गार्डन्सवर कोलकाता नाईट रायडर्स (KKR) आणि रॉयल चॅलेंजर्स बंगळुरू (RCB) यांच्यात उद्घाटन सामना खेळला जाईल.

आयपीएल 2025 च्या हंगामात, या 10 संघांमध्ये 65 दिवसांत अंतिम सामन्यासह एकूण 74 सामने खेळवले जातील. आयपीएलचा इतिहास जितका रंजक आहे. तितकाच तो विक्रमांनी भरलेला आहे, पहिल्या हंगामापासून ते 17 व्या हंगामापर्यंत अनेक मोठे विक्रम जोडले गेले आहेत.

चला जाणून घेऊया यातील 10 विशेष विक्रम जे मोडणे अशक्य आहे, सर्वाधिक धावा कोणत्या खेळाडूने काढल्या, सर्वाधिक विकेट्स कोणाच्या नावावर आहेत, यासह सर्वच गोष्टींचा यात समावेश आहे.

कोहली-डिव्हिलियर्स यांच्याकडे भागीदारीचा विक्रम

आयपीएलच्या इतिहासातील सर्वात मोठ्या भागीदारीचा विक्रम विराट कोहली आणि एबी डिव्हिलियर्स यांनी आरसीबीकडून खेळताना केला होता. 2016 च्या हंगामात दोघांनीही शानदार फलंदाजी केली आणि गुजरात लायन्सविरुद्धच्या सामन्यात त्यांनी मिळून 229 धावा जोडल्या. या सामन्यात कोहली आणि डिव्हिलियर्स दोघांनीही शतके केली. कोहलीने 55 चेंडूत 109 धावा केल्या, तर डिव्हिलियर्सने 52 चेंडूत 129 धावा केल्या.

कोहलीचा हा विक्रम 9 वर्षांपासून कायम

रॉयल चॅलेंजर्स बंगळुरू (RCB) चा माजी कर्णधार विराट कोहलीने आयपीएलमध्ये असा विक्रम रचला आहे की त्याला स्पर्श करणेही अशक्य वाटते. हा विक्रम गेल्या 9 वर्षांपासून कायम आहे. आयपीएलच्या एका हंगामात सर्वाधिक धावा करण्याचा विक्रम कोहलीच्या नावावर आहे, म्हणजेच 973 धावा त्याने केलेल्या आहेत. हे यश 2026 मध्ये मिळाले. तेव्हा कोहलीने 4 शतके आणि 7 अर्धशतके ठोकली होती. तथापि, गुजरात टायटन्सकडून खेळताना शुभमन गिलने 2023 च्या हंगामात 890 धावा केल्या. तो या विक्रमाच्या अगदी जवळ पोहोचला.

ख्रिस गेलने सर्वात जलद शतक ठोकले

2013 च्या आयपीएल हंगामात ख्रिस गेल आरसीबीचा भाग होता. त्यानंतर पुणे वॉरियर्स विरुद्धच्या सामन्यात त्याने 30 चेंडूत शतक झळकावले. हे आयपीएलमधील सर्वात वेगवान शतक आहे, ज्याचा अजूनही कोणी रेकॉर्ड मोडलेला नाही. त्याच्यानंतर दुसऱ्या क्रमांकावर डेव्हिड मिलर आहे, ज्याने 2013 च्या त्याच हंगामात पंजाब किंग्जकडून खेळताना आरसीबीविरुद्ध 38 चेंडूत शतक झळकावले होते.

यशस्वीने सर्वात जलद अर्धशतक ठोकले

आयपीएलमध्ये सर्वात जलद अर्धशतकाचा विक्रम राजस्थान रॉयल्स (RR) चा सलामीवीर यशस्वी जयस्वालच्या नावावर आहे. 11 मे 2023 रोजी, त्याने कोलकाता नाईट रायडर्स (केकेआर) विरुद्धच्या सामन्यात 13 चेंडूत अर्धशतक झळकावले. हा सामना ईडन गार्डन्समध्ये झाला. यशस्वीने अर्धशतक साजरे करताना 6 चौकार आणि 3 षटकार मारले.

गेलच्या वादळात बनवलेल्या षटकारांचा विक्रम

ख्रिस गेलने आणखी एक विक्रम रचला आहे जो मोडण्यासाठी खूप मेहनत घ्यावी लागेल. 2013 च्या हंगामात, ख्रिस गेलने आरसीबीकडून खेळताना एका सामन्यात 17 षटकार मारले. पुणे वॉरियर्स विरुद्धच्या सामन्यात त्याने 175 धावांची खेळी खेळून ही कामगिरी केली. एका डावात कोणत्याही फलंदाजाने मारलेले हे सर्वाधिक षटकार होते. आयपीएलमध्ये कोणत्याही फलंदाजाने केलेली ही सर्वोच्च धावसंख्या आहे.

एका षटकात सर्वाधिक धावा कोणी केल्या?

आयपीएलमध्ये एका षटकात सर्वाधिक धावा करण्याचा विक्रम ख्रिस गेल आणि रवींद्र जडेजा यांच्या नावावर आहे. 2011 च्या हंगामात, आरसीबीच्या ख्रिस गेलने कोची टस्कर्सचा गोलंदाज पारसनाथ परमेश्वरनने टाकलेल्या एका षटकात ३७ धावा केल्या. या षटकात दोन नो-बॉल होते आणि गेलने सलग तीन षटकार मारले. 2021 च्या आयपीएल हंगामात चेन्नई सुपर किंग्ज (CSK) कडून खेळणाऱ्या जडेजाने RCB गोलंदाज हर्षल पटेलच्या एका षटकात 37 धावा काढल्या.

पदार्पणाच्या सामन्यात 6 विकेट्स

वेस्ट इंडिजचा वेगवान गोलंदाज अल्झारी जोसेफने आयपीएलमध्ये पदार्पण करताच खळबळ उडवून दिली. त्याने २०१९ मध्ये मुंबई इंडियन्सकडून खेळून पदार्पण केले. त्यानंतर त्याच्या पहिल्याच सामन्यात त्याने सनरायझर्स हैदराबादविरुद्ध ३.४ षटकांत १२ धावा देत ६ विकेट्स घेतल्या. हा विक्रम अजूनही अभंग आहे.

सर्वाधिक हॅट्रिकचा विक्रम

आयपीएलच्या इतिहासात असा एक गोलंदाज आहे ज्याने एकदा किंवा दोनदा नाही तर तीनदा हॅट्रिक घेतली आहे. त्या गोलंदाजाचे नाव अमित मिश्रा आहे. भारतीय संघाचा स्टार फिरकी गोलंदाज अमित मिश्रा हा आयपीएलमध्ये तीन वेळा हॅटट्रिक घेणारा एकमेव गोलंदाज आहे. त्याने दिल्ली डेअरडेव्हिल्स (आता दिल्ली कॅपिटल्स), डेक्कन चार्जर्स आणि सनरायझर्स हैदराबाद विरुद्ध हा पराक्रम केला.

'या' संघाने सर्वाधिक सलग सामने जिंकले

कोलकाता नाईट रायडर्स (केकेआर) संघाने आयपीएलमध्ये असे काही केले आहे जे आतापर्यंत इतर कोणताही संघ करू शकला नाही. केकेआरने 2014 ते 2015 हंगामात सलग 10 सामने जिंकले. जो एक विक्रम आहे. 2014 च्या हंगामात कोलकाताने विजेतेपद पटकावले होते. जर आपण निरीक्षण केले तर, केकेआरने सलग 14 टी-20 सामने जिंकले आहेत. आयपीएल जिंकल्यानंतर त्यांनी चॅम्पियन्स लीग टी-20 मध्ये 5 सामनेही जिंकले.

एका हंगामात सर्वाधिक झेल कोणाच्या नावावर

आयपीएलमध्ये बॅट आणि बॉल व्यतिरिक्त क्षेत्ररक्षणातही अनेक रोमांचक विक्रम आपल्याला पाहायला मिळत आहेत. क्षेत्ररक्षणातही अनेक अतूट आणि आश्चर्यकारक विक्रम झाले आहेत. यामध्ये एक नाव दक्षिण आफ्रिकेचा माजी दिग्गज एबी डिव्हिलियर्सचे आहे. 2016 च्या हंगामात रॉयल चॅलेंजर्स बंगळुरूकडून खेळताना त्याने एक-दोन नव्हे तर 19 झेल घेतले. एकाच हंगामात कोणत्याही क्षेत्ररक्षकाने (विकेटकीपरने नव्हे) घेतलेले हे सर्वाधिक झेल आहेत.