BCCIचा मोठा निर्णय, IPL 2025चा थरार या तारखेपासून रंगणार, पुढील तीन हंगामाच्या तारखाही केल्या जाहीर

IPL 2025 Timetable 2025 : जगातील सर्वात मोठ्या क्रिकेट लीग आयपीएलची आतुरतेने क्रिकेटप्रेमी वाट पाहत असतात. आयपीएलने जगभरातील क्रिकेटपटूंना उत्तम व्यासपीठ दिले आहे. विशेष म्हणजे खेळाडूंना पैशाबरोबरच प्रसिद्धी देखील मिळते. आयपीएल मेगा लिलावावर सर्वांच्या नजरा खेळलेल्या असतानाच आता आयपीएलचा टाइमटेबल देखील समोर आला आहे.

तीन हंगामाच्या तारखा जाहीर

बीसीसीआयने एक अभूतपूर्व पाऊल उचलत आयपीएलच्या पुढील तीन हंगामांच्या तारखा जाहीर केल्या आहेत. आयपीएल 2025 14 मार्चपासून सुरू होणार असून त्याची अंतिम फेरी 25 मे रोजी होणार आहे. 2026 चा हंगाम 15 मार्च ते 31 मे दरम्यान खेळवला जाईल, तर 2027 चा हंगाम 14 मार्च ते 30 मे दरम्यान खेळवला जाईल. ESPNcricinfo च्या अहवालात याचा खुलासा करण्यात आला आहे.

24-25 नोव्हेंबरला मेगा लिलाव

आयपीएल 2025 साठी 24 आणि 25 नोव्हेंबर रोजी मेगा लिलाव आयोजित केला जाणार आहे. जिथे एकूण 574 खेळाडूंचा लिलाव होणार आहे. दरम्यान, बीसीसीआयने पुढील तीन हंगामांसाठी काही महत्त्वाच्या तारखा जाहीर केल्या आहेत. आयपीएलचे हे मोठे पाऊल आहे. असे यापूर्वी कधीही झालेले नाही.

ईएसपीएन क्रिकइन्फोच्या अहवालानुसार, गुरुवारी फ्रँचायझींना पाठवलेल्या ईमेलमध्ये, आयपीएलने स्पर्धेच्या तारखांची विंडो दिली आहे. ही शेवटची तारीख असण्याची शक्यता आहे. आयपीएल 2025 मध्ये एकूण 74 सामने खेळवले जाणार आहेत. जेव्हा बीसीसीआयने आपले हक्क विकले तेव्हा प्रत्येक हंगामात 84 सामने खेळण्याची चर्चा होती, परंतु अद्याप तसे झाले नाही.

यंदाच्या लिलावात 574 खेळाडूंचा समावेश

यावेळी 574 खेळाडूंपैकी 48 कॅप्ड भारतीय खेळाडू, 193 कॅप्ड परदेशी खेळाडू, 3 असोसिएट नॅशनल खेळाडू, 318 अनकॅप्ड भारतीय खेळाडू आणि 12 अनकॅप्ड परदेशी खेळाडूंचा मेगा लिलावात समावेश आहे. या खेळाडूंपैकी केवळ 204 खेळाडूंना खरेदी करता येणार आहे. ज्यामध्ये 70 स्लॉट विदेशी खेळाडूंसाठी आहेत.