IPL Eliminator, GT vs MI : मुंबईने गुजरातला दाखवला घरचा रस्ता; क्वॉलिफायर-2मध्ये पंजाबशी भिडणार

Gujarat Titans vs Mumbai Indians, IPL 2025 : इंडियन प्रीमियर लीग (IPL) 2025 च्या एलिमिनेटर सामन्यात मुंबई इंडियन्स (MI) ने गुजरात टायटन्सचा 20 धावांनी पराभव केला. 30 मे (शुक्रवार) रोजी मुल्लानपूर येथील महाराजा यादविंद्र सिंह आंतरराष्ट्रीय क्रिकेट स्टेडियमवर झालेल्या सामन्यात मुंबई इंडियन्सने गुजरात टायटन्सला जिंकण्यासाठी 229 धावांचे लक्ष्य दिले. ज्याचा पाठलाग करताना गुजरात टायटन्स 6 गडी बाद फक्त 208 धावाच करू शकले.

या विजयासह, मुंबई इंडियन्स क्वालिफायर-2 मध्ये पोहोचले, जिथे त्यांचा सामना पंजाब किंग्जशी होईल. त्याच वेळी, गुजरात टायटन्स स्पर्धेतून बाहेर पडला आहे. 1 जून रोजी अहमदाबाद येथे क्वालिफायर-2 सामना खेळवला जाणार आहे.

गुजरातचा असा राहिला खेळ

लक्ष्याचा पाठलाग करताना गुजरातची सुरुवात चांगली झाली नाही आणि पहिल्याच षटकात कर्णधार शुभम गिल (१) ची विकेट गमावली. जलदगती गोलंदाज ट्रेंट बोल्टच्या चेंडूवर शुभम एलबीडब्ल्यू झाला. त्यानंतर साई सुदर्शन आणि कुशल मेंडिस यांनी 64 धावांची भागीदारी करत डावाची सूत्रे हाती घेतली. 20 धावा काढल्यानंतर मिशेल सँटनरच्या चेंडूवर कुशल मेंडिस हिटविकेट बाद झाला.

येथून, साई सुदर्शन आणि वॉशिंग्टन सुंदर यांच्यात तिसऱ्या विकेटसाठी ८४ धावांची भागीदारी झाली, ज्यामुळे गुजरात टायटन्स पुन्हा सामन्यात आला. सुंदर-सुदर्शनची भागीदारी जसप्रीत बुमराहने मोडली. ४८ धावा काढल्यानंतर वॉशिंग्टन सुंदरला जसप्रीत बुमराहने बाद केले. सुंदरने २४ चेंडूंच्या डावात ५ चौकार आणि तीन षटकार मारले.

येथून, साई सुदर्शनवर मोठी जबाबदारी होती, परंतु त्याला वेगवान गोलंदाज रिचर्ड ग्लीसनने बाद केले. सुदर्शनने 49 चेंडूत 10 चौकार आणि एका षटकाराच्या मदतीने 80 धावा केल्या.

सुदर्शन बाद झाला तेव्हा गुजरातचा स्कोअर 15.4 षटकात 4 गडी बाद 170 धावा होता. इम्पॅक्ट सब म्हणून आलेल्या शेरफेन रुदरफोर्ड (24) ने काही मोठे फटके खेळले, परंतु 19 व्या षटकाच्या पहिल्याच चेंडूवर ट्रेंट बोल्टने त्याला पॅव्हेलियनमध्ये परत पाठवले. येथून गुजरातचा विजय कठीण झाला.

Next stop: Qualifier 2️⃣ 😍@mipaltan are all set to meet the @PunjabKingsIPL for a ticket to glory 🎟

Scorecard ▶ https://t.co/R4RTzjQfph#TATAIPL | #GTvMI | #Eliminator | #TheLastMile pic.twitter.com/vK0oAjcG5s

— IndianPremierLeague (@IPL) May 30, 2025

रोहित शर्माने संस्मरणीय खेळी केली

मुंबई इंडियन्सने नाणेफेक जिंकून प्रथम फलंदाजी करताना पाच विकेट गमावून 228 धावा केल्या. मुंबईची सुरुवात चांगली झाली. जॉनी बेअरस्टो आणि रोहित शर्मा यांनी मिळून पहिल्या विकेटसाठी 84 धावांची भागीदारी केली.

तथापि, या भागीदारीदरम्यान रोहित शर्मालाही दोन जीवदान मिळाले. प्रथम जेराल्ड कोएत्झी आणि नंतर कुसल मेंडिस यांनी त्यांचा झेल सोडला. आर. साई किशोर यांनी जॉनी बेअरस्टोला बाद करून ही भागीदारी मोडली. बेअरस्टोने 22 चेंडूत 4 चौकार आणि तीन षटकारांसह 47 धावा केल्या. जॉनी बेअरस्टो बाद झाल्यानंतर काही वेळातच रोहित शर्माने 28 चेंडूत आपले अर्धशतक पूर्ण केले.