IND vs SA: गोलंदाजांची सुमार कामगिरी! 358 धावा करूनही टीम इंडियाचा पराभव; हे 4 खेळाडू ठरले कारणीभूत

IND vs SA 2nd ODI : रायपूरमध्ये ३ डिसेंबरला खेळला गेलेला भारत आणि दक्षिण आफ्रिका यांच्यातील दुसरा एकदिवसीय सामना भारतीय संघासाठी एका वाईट स्वप्नासारखा ठरला. विराट कोहली आणि ऋतुराज गायकवाड यांच्या शानदार शतकांच्या जोरावर ३५८ धावांचा डोंगर उभारूनही टीम इंडियाला दक्षिण आफ्रिकेविरुद्ध पराभव पत्करावा लागला. या पराभवामुळे तीन सामन्यांची ही मालिका आता १-१ ने बरोबरीत आली.

कालचा अंतिम सामना 'करो या मरो'चा झाला आहे. भारताच्या या मोठ्या धावसंख्येचा बचाव करण्यात गोलंदाज अपयशी ठरले. गोलंदाजांच्या निराशाजनक कामगिरीनंतर आता चार खेळाडू या पराभवाला काहीसे कारणीभूत ठरत आहेत. खास करुन भारतीय क्षेत्ररक्षणातील अक्षम्य चुकांनीही भारतीय संघाला पराभवाकडे नेले.

पराभवाचे मुख्य कारण: गोलंदाजांची निराशाजनक कामगिरी

भारताच्या या पराभवाचे सर्वात मोठे कारण म्हणजे गोलंदाजांचे अत्यंत सामान्य आणि निराशाजनक प्रदर्शन. एवढ्या मोठ्या लक्ष्याचा बचाव करताना भारतीय गोलंदाज पूर्णपणे निष्प्रभ ठरले. विशेषत: सामन्याच्या मध्य आणि अखेरच्या षटकांमध्ये (डेथ ओव्हर्समध्ये) ते दक्षिण आफ्रिकेच्या फलंदाजांवर नियंत्रण मिळवू शकले नाहीत. या अपयशासाठी भारतीय संघातील खालील चार गोलंदाज मुख्यत्वे जबाबदार मानले जात आहेत.

१. हर्षित राणा ठरला महागडा..

युवा वेगवान गोलंदाज हर्षित राणा या सामन्यात खूप महागडा ठरला. त्याने महत्त्वाचा फलंदाज एडन मार्करमचा बळी घेतला असला तरी, आपल्या १० षटकांच्या स्पेलमध्ये त्याने तब्बल ७० धावा खर्च केल्या. त्याच्या महागड्या गोलंदाजीने दक्षिण आफ्रिकेवर दबाव निर्माण करण्याच्या भारतीय योजनांवर पाणी फेरले.

२. प्रसिद्ध कृष्णा - सर्वात महागडा गोलंदाज

वेगवान गोलंदाज प्रसिद्ध कृष्णा हा भारतीय गोलंदाजी आक्रमणात सर्वात महागडा ठरला. त्याने केवळ ८.२ षटकांतच ८२ धावा दिल्या. त्याने दोन बळी घेतले असले तरी, त्याचा अत्यंत महागडा स्पेल, विशेषत: अखेरच्या षटकांमध्ये, दक्षिण आफ्रिकेच्या डावाला गती देणारा ठरला.

३. कुलदीप यादव - फिरकीचा जादू चालला नाही

संघाचा मुख्य फिरकी गोलंदाज कुलदीप यादवही या सामन्यात आपली छाप पाडण्यात अपयशी ठरला. आपल्या फिरकीने फलंदाजांना बांधून ठेवण्याची त्याच्याकडून अपेक्षा होती, परंतु त्याने आपल्या १० षटकांत ७८ धावा खर्च केल्या आणि त्याला एकही बळी मिळाला नाही. त्याच्या महागड्या स्पेलमुळे दक्षिण आफ्रिकेच्या फलंदाजांना मोकळेपणाने खेळण्याची संधी मिळाली.

४. वॉशिंग्टन सुंदर - गोलंदाजी, फलंदाजीत अपयशी

अष्टपैलू खेळाडू वॉशिंग्टन सुंदर फलंदाजी आणि गोलंदाजी अशा दोन्ही आघाड्यांवर अपयशी ठरला. फलंदाजीमध्ये त्याला केवळ १ धाव करता आली, तर गोलंदाजीमध्येही त्याने भरपूर धावा दिल्या आणि तो महागडा ठरला. त्याच्या या दुहेरी अपयशामुळे संघाचे संतुलन बिघडले.