ICC T20 Rankings आयसीसी रँकिंगमध्ये 'हा' भारतीय गोलंदाज जगात नंबर 1, तर तिलक वर्माची टॉप-5 मध्ये धडक

ICC T20 Rankings : भारतीय क्रिकेटचा सुवर्णकाळ सध्या टी-२० रँकिंगमध्ये स्पष्टपणे दिसत आहे! आयसीसीने जाहीर केलेल्या ताज्या आकडेवारीनुसार, भारतीय फिरकीचा 'जादूगार' जगात अव्वल ठरला असून त्याने रेटिंगचा नवा विक्रम प्रस्थापित केला आहे. याच सोबतीने, भारताच्या एका उगवत्या ताऱ्याने फलंदाजीच्या रँकिंगमध्ये मोठी क्रांती घडवत जगातील टॉप-५ मध्ये एन्ट्री केली आहे. ही कामगिरी केवळ भारताचे वर्चस्व सिद्ध करणारी नसून जागतिक क्रिकेटमधील दिग्गजांना धोक्याचा इशारा देणारी आहे.

'मिस्ट्री स्पिनर'चा ऐतिहासिक विक्रम!

भारतीय फिरकीपटू वरूण चक्रवर्तीने आपल्या जादुई गोलंदाजीच्या जोरावर जगातील नंबर १ टी-२० गोलंदाज म्हणून स्थान कायम राखले आहे. ताज्या रँकिंगमध्ये त्याने ८१८ रेटिंग पॉइंट्स मिळवले आहेत, जे त्याच्या कारकिर्दीतील आतापर्यंतचे सर्वोत्तम रेटिंग आहे. भारतासाठी टी-२० रँकिंगमध्ये सर्वाधिक रेटिंग मिळवणारा गोलंदाज म्हणून त्याने इतिहासात नाव कोरले आहे. दक्षिण आफ्रिकेविरुद्धच्या गेल्या दोन सामन्यांत ४ बळी घेत त्याने आपली पकड अधिक घट्ट केली आहे.

युवा फलंदाजाची मोठी झेप

दुसरीकडे, भारताचा युवा फलंदाज तिलक वर्माने आपल्या फलंदाजीने सर्वांना थक्क केले आहे. दोन अंकी सुधारणा करत त्याने थेट चौथ्या क्रमांकावर झेप घेतली आहे. या प्रक्रियेत त्याने इंग्लंडचा जोस बटलर आणि पाकिस्तानच्या साहिबजादा फरहान यांसारख्या दिग्गजांना मागे टाकले आहे. तिलक सध्या कमालीच्या फॉर्ममध्ये असून त्याच्या सातत्यपूर्ण खेळीचा हा मोठा परिणाम आहे.

अर्शदीप आणि आफ्रिकन खेळाडूंनाही फायदा

वेगवान गोलंदाज अर्शदीप सिंगने ४ स्थानांची प्रगती करत १६ वे स्थान पटकावले आहे. धर्मशाला येथील सामन्यात त्याने अवघ्या १३ धावांत २ बळी घेत सामना फिरवला होता. जरी दक्षिण आफ्रिकेचा संघ मालिकेत पिछाडीवर असला, तरी त्यांच्या खेळाडूंच्या रँकिंगमध्ये सुधारणा झाली आहे. कर्णधार एडेन मार्करम २९ व्या स्थानी, तर क्विंटन डी कॉक ५३ व्या क्रमांकावर पोहोचला आहे. अष्टपैलू मार्को यानसेनने १४ स्थानांची उडी घेत जगातील टॉप-२५ गोलंदाजांमध्ये जागा मिळवली आहे.