हरमनप्रीत कौर आणि स्मृती मानधना यांचा ‘डबल धमाका', वनडे क्रिकेटमध्ये रचला इतिहास

Harmanpreet Kaur Smriti Mandhana Create History : १४ सप्टेंबर २०२५ हा दिवस भारतीय क्रिकेटच्या इतिहासात सुवर्ण अक्षरांनी लिहिला गेला. मोहालीच्या मैदानात कर्णधार हरमनप्रीत कौर आणि स्फोटक फलंदाज स्मृती मानधना यांनी असे काही विक्रम रचले, ज्यामुळे केवळ भारताचं नाही, तर जगभरातील महिला क्रिकेटचं भविष्य अधिक उज्वल दिसत आहे. हरमनप्रीतने आपल्या १५० व्या वनडे सामन्याचा ऐतिहासिक टप्पा गाठला, तर स्मृती मानधनाने मायदेशात २००० धावांचा विक्रम रचून नवा अध्याय सुरू केला. हा दिवस केवळ विक्रमांचा नाही, तर भारतीय महिला क्रिकेटच्या वाढत्या सामर्थ्याचा पुरावा आहे.

हरमनप्रीत कौरचा विक्रम: १५० वनडे सामन्यांचा टप्पा पार

भारतीय संघाची कर्णधार हरमनप्रीत कौर हिने ऑस्ट्रेलियाविरुद्ध आपला १५० वा एकदिवसीय सामना खेळून एक खास विक्रम प्रस्थापित केला. अशी कामगिरी करणारी ती दुसरीच भारतीय महिला क्रिकेटपटू ठरली आहे. तिच्या आधी महान फलंदाज मिताली राजने २३२ वनडे सामने खेळले आहेत.

या विक्रमासह हरमनप्रीत १५० किंवा त्याहून अधिक वनडे सामने खेळणाऱ्या जगातील निवडक महिला खेळाडूंच्या यादीत समाविष्ट झाली आहे. यामध्ये झूलन गोस्वामी आणि एलिस पेरी (Ellyse Perry) यांसारख्या दिग्गजांचाही समावेश आहे.

सामन्यापुर्वी हरमनप्रीत काय म्हणाली?

सामन्यापूर्वी हरमनप्रीत म्हणाली की, "हा प्रवास खूपच अविस्मरणीय आहे आणि आगामी काळातही मला भारतीय संघासाठी खूप वर्षे खेळायचे आहे." ऑस्ट्रेलियाविरुद्धच्या या वनडे मालिकेनंतर हरमनप्रीतची नजर या वर्षी होणाऱ्या वनडे वर्ल्ड कपवर असणार आहे.

महाराष्ट्र कन्या स्मृती मानधनाचाही खास विक्रम: मायदेशात एवढ्या धावा वनडेत पूर्ण

याच सामन्यात, सलामीवीर फलंदाज स्मृती मानधना हिने देखील एक खास टप्पा गाठला. भारतामध्ये खेळताना तिने आपल्या वनडे कारकिर्दीत २००० धावा पूर्ण केल्या. हा विक्रम करणारी ती दुसरी भारतीय महिला खेळाडू ठरली. तिच्या आधी मिताली राजने भारतात २८३३ धावा केल्या आहेत. २९ वर्षीय मानधनाने आपल्या खेळीदरम्यान ४२ वी धाव घेताना हा टप्पा गाठला आणि अखेरीस ती ५८ धावा करून बाद झाली. तिच्या या खेळीत ६ चौकार आणि २ षटकारांचा समावेश होता.

स्मृती मानधनाची विक्रमी कामगिरी

स्मृती मानधना: तिने आतापर्यंत मायदेशात ४८ वनडे सामन्यांमध्ये २०१६ धावा केल्या आहेत, ज्यात ४ शतके आणि १५ पेक्षा जास्त अर्धशतकांचा समावेश आहे. तसेच, जुलै महिन्यातच तिने वनडेमध्ये ४५०० धावा पूर्ण करून, मिताली राजनंतर ही कामगिरी करणारी ती दुसरी भारतीय खेळाडू ठरली आहे.

हरमनप्रीत कौरची विक्रमी कामगिरी

आपल्या कर्णधारपदातून आणि फलंदाजीतून हरमनप्रीतने भारतीय संघाला अनेक महत्त्वाचे विजय मिळवून दिले आहेत. १५० व्या सामन्याचा हा टप्पा तिच्या प्रदीर्घ अनुभव आणि योगदानाचा पुरावा आहे.