येवल्यात छगन भुजबळांना कांदा हसवणार, रडवणार की मनोज जरांगे झुंझावणार? वाचा ग्राऊंड रिपोर्ट

Yeola Lasalgaon Assembly Election 2024 : येवला-लासलगाव हा विधानसभा मतदारसंघ राजकीयदृष्ट्या अत्यंत महत्त्वाचा मानला जातो. कांदा उत्पादनाचा मोठा भाग आणि पाणीटंचाईचे प्रश्न यामुळे हा मतदारसंघ कायम चर्चेत राहतो. येवला तालुक्यातील 124 गावे आणि निफाड तालुक्यातील 46 गावे मिळून हा मतदारसंघ बनला आहे. 2004 पासून छगन भुजबळ यांनी या मतदारसंघात आपले वर्चस्व निर्माण केले आहे.

भुजबळांचा विकासाचा अजेंडा आणि आव्हाने

छगन भुजबळ हे राष्ट्रवादी काँग्रेसच्या (अजित पवार गट) तिकिटावर पाचव्यांदा निवडणूक लढवत आहेत. मागील 20 वर्षांतील विकासकामांच्या जोरावर त्यांनी आपली ताकद वाढवली आहे. मांजरपाडा कालव्याचे पाणी डोंगरगावपर्यंत पोहोचवून शेतकऱ्यांना दिलासा दिल्याचा मुद्दा भुजबळांसाठी महत्त्वाचा आहे. मात्र, मराठा आरक्षणाच्या मुद्द्यावरून मनोज जरांगे यांच्याकडून त्यांच्यावर टीका झाल्याने काही मराठा मतदार नाराज झाल्याचे संकेत मिळत आहेत.

माणिकराव शिंदेंची नव्या आव्हानांसह लढाई

महाविकास आघाडीकडून राष्ट्रवादी काँग्रेस शरदचंद्र पवार पक्षाचे माणिकराव शिंदे यांचे भुजबळांना आव्हान आहे. सन 2009 पासून त्यांना विधानसभा निवडणुकीत यश मिळालेले नाही. यावेळी मराठा समाजाच्या पाठिंब्याचा फायदा घेण्याचा त्यांचा प्रयत्न आहे. शरद पवार यांनी भुजबळांविरोधात थेट प्रचारसभा घेऊन शिंदेंची ताकद वाढवली आहे.

निफाड तालुक्यातील 46 गावांचा निर्णायक प्रभाव

येवला मतदारसंघातील निफाड तालुक्यातील 46 गावे निर्णायक ठरणार आहेत. या भागातील स्थानिक नेत्यांच्या पाठिंब्यामुळे मतांचे गणित बदलू शकते. माजी आमदार कल्याणराव पाटील आणि अंबादास बनकर हे भुजबळांच्या बाजूने प्रचार करत आहेत, तर मारोतराव पवार आणि नरेंद्र दराडे यांच्यासारखे स्थानिक नेते शिंदेंच्या प्रचारात आघाडीवर आहेत.

लोकसभा निवडणुकीतील अनुभवाचा परिणाम विधानसभा निवडणुकीवर?

2024 च्या लोकसभा निवडणुकीत महाविकास आघाडीने येवल्यात महायुतीपेक्षा 13,205 मताधिक्य मिळवले होते. यामुळे विधानसभा निवडणुकीतही महाविकास आघाडीला बळ मिळण्याची शक्यता आहे. मात्र, विधानसभा निवडणुकीतील स्थानिक मुद्दे आणि व्यक्तिगत लोकप्रियता या निर्णायक ठरतील.

हे आहेत मुद्दे

येवला-लासलगाव मतदारसंघातील भुजबळ विरुद्ध शिंदे यांची ही निवडणूक विकास, मराठा आरक्षण, कांदा भाव आणि पाण्याच्या समस्यांवर केंद्रित आहे. भुजबळांच्या 20 वर्षांच्या कामगिरीची कसोटी आणि शिंदेंच्या मराठा कार्डाचा परिणाम काय होईल, हे निकालानंतर स्पष्ट होईल.