कळमनुरीत शिवसेना विरुद्ध शिवसेना, संतोष बांगर यांना उद्धव ठाकरे यांच्या पक्षाकडून कोण टक्कर देणार?

Uddhav Thackeray's Shiv Sena is challenged by Santosh Bangar in Kalmanuri : हिंगोली जिल्ह्यातील कळमनुरी विधानसभा मतदारसंघ पूर्वी कॉंग्रेसचा बालेकिल्ला होता. पण, आता शिवसेनेची पकड मजबूत आहे. मात्र, मागील तीन वर्षांत शिवसेनेत दोन गट पडले. त्यामुळे पक्षाची ताकद विभागली गेली आहे. सध्या या मतदारसंघाचे प्रतिनिधित्व शिंदे गटाचे संतोष बांगर करीत आहेत. आक्रमक आमदार म्हणून त्यांची ओळख आहे. त्यामुळे ते नेहमीच चर्चेत असतात. यावेळी महायुतीकडून ते उमेदवारीचे प्रबळ दावेदार आहेत. दुसरीकडे या मतदारसंघावर महविकास आघाडीकडून शिवसेना ठाकरे गटाचा दावा मजबूत आहे. त्यामुळे आता या मतदारसंघात शिवसेना विरुद्ध शिवसेना अशी सरळ सरळ लढत होऊ शकते. पण, वंचित बहुजन आघाडीचेही या मतदारसंघात चांगले संघटन आहे. या ठिकाणी वंचितचा उमेदवार कोण असणार यावर निवडणुकीचे गणित ठरणार आहे.

जातीय समीकरणे अशी

आगामी निवडणुकीमध्ये महायुतीचा कोणता उमेदवार रिंगणात उतरणार? याकडे सर्वांचं लक्ष लागलेलं आहे. त्याचप्रमाणे महाविकास आघाडी देखील ही जागा कोणत्या घटक पक्षाला सोडणार, हे पाहणं महत्त्वाचं ठरणार आहे. कळमनुरी मतदारसंघाचे राजकारण मुस्लीम, आदिवासी, बंजारा, हटकर या समाजावरच अवलंबून आहे.

सध्या काय चित्र आहे?

कळमनुरी विधानसभा मतदारसंघांत गत निवडणुकीत वंचित बहुजन आघाडीचे अजित मगर दुसऱ्या क्रमांकावर होते. पण, आता अजित मगर शिवसेना ठाकरे गटात आहेत. वंचितला या मतदारसंघात तगडा उमेदवार मिळाला तर याचा फटका महाविकास आघाडी आणि महायुतीला बसण्याची शक्यता आहे. विद्यमान आमदार संतोष बांगर यांनी तालुक्यात विविध विकास कामं केलेली आहेत, त्यामुळे ते जास्तच चर्चेत आहेत. महायुतीने सिटिंग गेटिंग हे तत्त्व स्वीकारल्यास संतोष बांगर हे पुन्हा उमेदवार असू शकतात.

आता महाविकास आघाडी ही जागा कोणाला देणार? हे पाहणं महत्वाचं ठरणार आहे. या मतदारसंघात शिवसेना काँग्रेस अशी लढत आतापर्यंत होत आली आहे. मात्र आता ठाकरे गट महाविकास आघाडीचा घटक असल्याने ठाकरे गटाला ही जागा सुटू शकते. यामुळे या मतदारसंघात शिवसेना विरुद्ध शिवसेना अशी लढत असणार आहे. ठाकरे गटाकडून माजी आमदार डॉ. संतोष टार्फे, जिल्हा प्रमुख अजय ऊर्फ गोपू पाटील, शिवसेना जिल्हा संघटक बाळासाहेब मगर, शेतकरी नेते अजित मगर इच्छुक आहेत.

गतवेळी काय झाले होते?

2019 च्या विधानसभा निवडणुकीत हा मतदारसंघ शिवसेनेने जिंकला होता. शिवसेनेचे संतोष बांगर यांनी वंचित बहुजन आघाडीचे अजित मगर यांचा 16 हजार 378 मतांनी पराभव करून विजय मिळवला होता. आता मगर ठाकरे गटात आहेत. कळमनुरी विधानसभा मतदारसंघ हा हिंगोली लोकसभा मतदारसंघांतर्गत येतो. नुकत्याच झालेल्या 2024 च्या लोकसभा निवडणुकीत शिवसेनेचे (उद्धव बाळासाहेब ठाकरे) उमेदवार नागेश पाटील आष्टीकर यांनी हिंगोली शिवसेनेच्या हेमंत पटेल यांचा 1 लाख 86 हजार 2 मतांनी पराभव केला. त्यामुळे आता या मतदारसंघात महाविकास आघाडीचा आत्मविश्वास वाढला आहे.

या आहेत समस्या

आमदार संतोष बांगर यांचा जनसंपर्क दांडगा आहे. सुखदुःख ते मतदारांसोबत असतात, ही त्यांची जमेची बाजू आहे.‌ या मतदारसंघातून महामार्ग गेलेला आहे. परंतु, ग्रामीण भागातील अंतर्गत रस्त्यांची मोठी दुरवस्था झालेली आहे. अनेक गावांमध्ये पाणीटंचाई आहे. रोजगार, शेतमालाला अल्प भाव या समस्या आहेत. औंढा नागनाथ येथे भाविकांसाठी आवश्यक त्या सुविधांचा अभाव आहे.