विषारी कफ सिरपमुळे मृत्यू सत्र सुरूच: नागपुरात आणखी एका चिमुकलीचा बळी;WHO ने दिली धोक्याची सूचना

Toxic Cough Syrup 3 Year Old Girl Dies in Nagpur : मध्य प्रदेशातील छिंदवाडा जिल्ह्यात विषारी कफ सिरपमुळे मुलांच्या मृत्यूचे सत्र अत्यंत गंभीर वळणावर पोहोचले आहे. या औषधामुळे निष्पाप बालकांना आपले प्राण गमवावे लागत असून, बुधवारी सकाळी नागपूरमध्ये उपचारादरम्यान आणखी एका साडेतीन वर्षीय चिमुकलीचा मृत्यू झाला. या घटनेमुळे या सिरपमुळे बळी पडलेल्या मुलांची एकूण संख्या २६ वर पोहोचली असून, या गंभीर आरोग्य संकटाने महाराष्ट्र आणि मध्य प्रदेश या दोन्ही राज्यांमध्ये खळबळ उडवून दिली आहे.

साडेतीन वर्षीय अंबिकाचा नागपुरात उपचारादरम्यान मृत्यू

छिंदवाडा जिल्ह्यातील चौरई परिसरातील ककई बिल्वा गावची रहिवासी असलेली साडेतीन वर्षांची अंबिका विश्वकर्मा हिचा नागपूरमध्ये उपचारादरम्यान मृत्यू झाला. सप्टेंबर महिन्याच्या सुरुवातीला तिची तब्येत बिघडली होती. स्थानिक उपचारांनी फरक न पडल्याने, कुटुंबीयांनी तिला १४ सप्टेंबर रोजी नागपूर येथील एका खासगी रुग्णालयात दाखल केले.

रुग्णालयातील डॉक्टरांनी तपासणी केल्यानंतर अंबिकाचे मूत्रपिंड (Kidney) निकामी झाल्याचे निदान केले होते. सुमारे महिनाभरापासून तिच्यावर उपचार सुरू होते. मात्र, उपचारांना प्रतिसाद न मिळाल्याने बुधवारी सकाळी तिचा मृत्यू झाला. नागपूरमध्ये या विषारी सिरपमुळे मृत्यूमुखी पडलेल्या मुलांची ही १८ वी केस आहे आणि विशेष म्हणजे हे सर्व मृत बालके मध्य प्रदेशातील आहेत.

विषारी सिरपमुळे 26 निष्पाप जीवांचा बळी

अंबिकाच्या मृत्यूमुळे मध्य प्रदेशात विषारी कफ सिरपमुळे बळी पडलेल्या मुलांची एकूण संख्या आता २६ झाली आहे. यापूर्वी परासिया येथील मोरडोंगरीचा एक वर्षाचा गर्विक पवार याचाही नागपूरच्या मेडिकल कॉलेजमध्ये उपचारादरम्यान मृत्यू झाला होता. सातत्याने होणारे हे मृत्यू आरोग्य व्यवस्थेवर आणि औषधांच्या गुणवत्तेवर गंभीर प्रश्नचिन्ह निर्माण करत आहेत. सध्या आणखी दोन मुले नागपूरच्या रुग्णालयांमध्ये मृत्यूशी झुंज देत आहेत.

WHO कडून गंभीर आरोग्यविषयक सूचना जारी

या विषारी कफ सिरपच्या गंभीर घटनेची दखल आता जागतिक स्तरावर घेण्यात आली आहे. जागतिक आरोग्य संघटना (WHO) ने या पार्श्वभूमीवर एक महत्त्वपूर्ण आरोग्यविषयक सूचना (Medical Alert) जारी केली आहे.

डब्ल्यूएचओने भारतातील तीन खोकल्याच्या सिरपचा वापर आणि वितरण तातडीने थांबवण्याचा सल्ला दिला आहे.

• कोल्ड्रिफ (Coldrif) - (उत्पादक: स्रिसन फार्मास्युटिकल्स)
• रेस्पीफ्रेश टीआर (Respifresh TR) - (उत्पादक: रेडनेक्स फार्मा)
• रीलाइफ (Relife) - (उत्पादक: शेप फार्मा)

डायथिलीन ग्लायकॉल (DEG) चा धोका

या सिरपच्या काही बॅचच्या तपासणीत, डायथिलीन ग्लायकॉल हे विषारी रसायन निर्धारित प्रमाणापेक्षा खूप जास्त प्रमाणात आढळले आहे. DEG हे रसायन मानवी शरीरासाठी अत्यंत धोकादायक असून, ते विशेषतः लहान मुलांसाठी जीवघेणे ठरत आहे. यामुळे मूत्रपिंडाचे गंभीर नुकसान होते. ते मेंदूवर विपरीत परिणाम करते. लहान मुलांमध्ये मृत्यूचा धोका निर्माण करते.

डब्ल्यूएचओची जागतिक आरोग्य संस्थांना विनंती

या गंभीर धोक्यामुळे, डब्ल्यूएचओने जागतिक आरोग्य संस्थांना आणि तज्ज्ञांना विशेष विनंती केली आहे की, या उत्पादक कंपन्यांनी डिसेंबर २०२४ नंतर तयार केलेल्या सर्व औषधांची कठोर तपासणी करण्यात यावी. तसेच, तपासणी पूर्ण झाल्याशिवाय कोणतीही औषधे बाजारात विक्रीसाठी उपलब्ध होणार नाहीत, याची काळजी घेण्याचे निर्देश देण्यात आले आहेत.