सुनेत्रा पवारांनी चाकणकरांना राजीनामा देण्यास भाग पाडलेचं; सुनेत्रा पवारांची दमदार भूमिका

भोंदूबाबा अशोक खरात प्रकरणामुळे अडचणीत आलेल्या राज्य महिला आयोगाच्या अध्यक्षा रुपाली चाकणकर यांच्यावर उपमुख्यमंत्री सुनेत्रा पवार यांनी मोठी कारवाई केली आहे. सुनेत्रा पवारांनी घेतलेल्या भूमिकेमुळे चाकणकर यांना अखेर आपल्या पदाचा त्याग करावा लागला असून, प्रशासनातील पारदर्शकता जपण्यासाठी हे पाऊल उचलल्याचे बोलले जात आहे.

पारदर्शक चौकशीसाठी सुनेत्रा पवारांचा कठोर पवित्रा

अशोक खरात याच्याशी असलेल्या निकटच्या संबंधांमुळे महिला आयोगाच्या प्रतिमेवर प्रश्नचिन्ह उभे राहत होते. या पार्श्वभूमीवर सुनेत्रा पवार यांनी थेट भूमिका घेत चाकणकर यांना राजीनामा देण्यास सांगितले. "चौकशी निष्पक्ष आणि पारदर्शक व्हावी, यासाठी राजीनामा आवश्यक होता," असे स्पष्ट मत सुनेत्रा पवारांनी आपल्या सोशल मीडिया पोस्टद्वारे व्यक्त केले आहे. त्यांच्या या तत्पर कारवाईमुळे राजकीय वर्तुळात सुनेत्रा पवारांच्या प्रशासकीय पकडीची चर्चा सुरू झाली आहे.

रात्री उशिरा 'देवगिरी'वर घडामोडींचा थरार

मुख्यमंत्री देवेंद्र फडणवीस यांच्याशी झालेल्या चर्चेनंतर रुपाली चाकणकर यांनी रात्री नऊच्या सुमारास उपमुख्यमंत्री सुनेत्रा पवार यांची 'देवगिरी' निवासस्थानी भेट घेतली. यावेळी सुनेत्रा पवारांनी प्रकरणाचे गांभीर्य लक्षात घेऊन त्यांना तत्काळ पद सोडण्याचे आदेश दिले. त्यानंतर चाकणकर यांनी आपले राजीनामा पत्र सुनेत्रा पवारांकडे सुपूर्द केले. हे पत्र आता पुढील मंजुरीसाठी मुख्यमंत्र्यांमार्फत राज्यपालांकडे पाठवण्यात येणार आहे.

नैतिकतेचा आधार घेत चाकणकरांची माघार

रुपाली चाकणकर यांनी आपल्या राजीनाम्याचे समर्थन करताना 'नैतिक जबाबदारी' हा शब्द वापरला आहे. "सध्या होत असलेल्या आरोपांची चौकशी कोणत्याही अडथळ्याविना व्हावी, ही माझी इच्छा आहे," असे त्यांनी म्हटले आहे. खरात पती-पत्नीला आपल्या कुटुंबाने गुरु मानले होते, मात्र त्यांच्या वैयक्तिक कृत्यांशी आपला संबंध नसल्याचा खुलासाही त्यांनी यावेळी केला.

महिला आयोगातील पुढील हालचाली

राज्यमंत्री दर्जा असलेल्या या पदावरून चाकणकर पायउतार झाल्यामुळे आता महिला आयोगाची धुरा कोणाकडे जाणार, याकडे सर्वांचे लक्ष लागले आहे. सुनेत्रा पवार यांनी या प्रकरणात घेतलेली आक्रमक भूमिका पाहता, आगामी काळात महिला आयोगाच्या कामात मोठे बदल होण्याची शक्यता वर्तवण्यात येत आहे.