बारामतीत पुन्हा काका-पुतण्यांची लढाई! अहेरीत मुलीविरुद्ध वडिल लढत! हे आहेत शरद पवारांचे 45 शिलेदार

Published: Thursday, October 24, 2024, 19:34 [IST]

Sharad Pawar Candidate List Baramati Ajit Pawar vs Yugendra Pawar : महायुतीपाठोपाठ महाविकास आघाडीतील घटक पक्ष एक एक करुन आपली यादी जाहीर करत आहे. आज राष्ट्रवादी काँग्रेस शरदचंद्र पवार पक्षाच्या 45 उमेदवारांची यादी जाहीर झाली आहे. पक्षाचे प्रदेशाध्यक्ष जयंत पाटील यांनी ही यादी जाहीर केली. बारामतीत युगेंद्र पवार यांना शरद पवारांच्या पक्षाकडून उमेदवारी देण्यात आली आहे. त्यामुळे आता बारामतीत अजित पवार विरुद्ध युगेंद्र पवार या काका-पुतण्यांची लढत पाहायला मिळणार आहे.

तर दुसरीकडे धर्मरावबाबा आत्राम हे अजित पवार यांच्या राष्ट्रवादी काँग्रेसकडून अहेरीत विधानसभा निवडणूक लढवणार आहेत. तर त्यांची कन्या भाग्यश्री आत्राम यांना शरद पवारांच्या राष्ट्रवादी काँग्रेसकडून तिकीट मिळाले आहे. त्यामुळे अहेरीत आता मुलीविरुद्ध बाप असा सामना रंगणार आहे.

काका विरुद्ध पुतण्या

आज शरद पवारांच्या राष्ट्रवादीची उमेदवारी जाहीर झाली. यात बारामतीत पुन्हा लोकसभा निवडणुकीतील ती रंगत पाहायला मिळणार आहे. राष्ट्रवादी काँग्रेसच्या फुटीनंतर नणंद विरुद्ध भावजयी हा सामना बारामती लोकसभा निवडणुकीत रंगला आणि अजित पवार यांच्या पत्नीला पराभव स्विकारावा लागला. तिथे सुप्रिया सुळे या निवडून आल्या, आता पुन्हा बारामती विधानसभा निवडणुकीत अजित पवार यांचा सामना त्यांचेच पुतणे युगेंद्र पवार यांच्याशी रंगणार आहे.

धर्मराव आत्राम आणि अहेरी हे समिकरण

गडचिरोली-चिमूर लोकसभा मतदारसंघात सहा विधानसभा क्षेत्र आहेत, त्यापैकीच एक म्हणजे अहेरी विधानसभा मतदारसंघ. या मतदारसंघाचे राजकीय दृष्टिकोनातून वेगळे महत्त्व आहे. त्यामुळे युती असो की आघाडी, या दोघांनीही अहेरी मतदारसंघावर लक्ष केंद्रित केलं आहे. पूर्वी गडचिरोली जिल्ह्यात राष्ट्रवादी काँग्रेस पक्ष म्हणजे धर्मरावबाबा आत्राम असे समीकरण होते.

वडीलांविरुद्ध मुलगी

आत्राम यांनी आता अजित पवार गटात प्रवेश केला पण त्यांची कन्या भाग्यश्री आत्राम हलगेकर यांनी राष्ट्रवादी काँग्रेस शरद पवार गटात प्रवेश केला. त्यामुळे आत्राम यांचे राजकीयदृष्ट्या घरात खिंडार पडले आहे. कुटुंबातील ह्या विभाजनामुळे जिल्ह्यातील राजकीय समीकरणेही बदलली आहेत.आता नवीन समि‍करणे काय असतील आणि बाप लेकीपैकी कोण अहेरीचा गड राखणार हे येत्या 23 नोव्हेंबरला स्पष्ट होईल.