मोठी बातमी! मंत्री संजय शिरसाट यांच्या निवासस्थानावर हल्ल्याचा प्रयत्न

सामाजिक न्यायमंत्री संजय शिरसाट सध्या विविध कारणांमुळे चर्चेत आहेत. छत्रपती संभाजीनगरचे माजी खासदार इम्तियाज जलील यांनी त्यांच्यावर गंभीर आर्थिक गैरव्यवहाराचे आरोप केले आहेत. याव्यतिरिक्त, काही दिवसांपूर्वी त्यांचा एक व्हिडीओ व्हायरल झाला होता, ज्यात त्यांच्या पलंगाशेजारी पैशांनी भरलेली एक बॅग दिसल्याचा दावा करण्यात आला होता. अशातच आता त्यांच्या घरावर मध्यरात्रीच्या सुमारास हल्ला झाल्याची धक्कादायक घटना समोर आली आहे.

नेमकं काय घडलं?

मिळालेल्या माहितीनुसार, छत्रपती संभाजीनगरचे पालकमंत्री संजय शिरसाट यांच्या निवासस्थानावर मध्यरात्री दीड वाजण्याच्या सुमारास हल्ल्याचा प्रयत्न करण्यात आला. एका अज्ञात तरुणाने त्यांच्या घरावर दगडफेक केली आणि परिसरात आरडाओरडही केली.

हल्ला करणारा तरुण मद्यधुंद अवस्थेत

सौरभ घुले असे हल्ला करण्याचा प्रयत्न करणाऱ्या तरुणाचे नाव आहे. प्राथमिक माहितीनुसार, हा तरुण मद्यधुंद अवस्थेत होता. या घटनेनंतर तातडीने सातारा पोलीस ठाण्यात या तरुणाविरोधात गुन्हा दाखल करण्यात आला असून, पोलीस या प्रकरणाचा तपास करत आहेत.

"एवढे पैसे आलेच कुठून?" असा प्रश्न

संजय शिरसाट गेल्या काही दिवसांपासून विविध कारणांमुळे माध्यमांमध्ये आहेत. नुकताच त्यांचा एक व्हिडीओ व्हायरल झाला होता, ज्यामध्ये ते एका बेडवर सिगारेट ओढताना दिसत होते आणि त्यांच्या बाजूला एक कुत्राही होता. या व्हिडीओमध्ये त्यांच्या खोलीत कथितरीत्या पैशांनी भरलेली एक बॅग दिसल्याने राजकीय वर्तुळात मोठी खळबळ उडाली होती. 'एवढी रोकड कुठून आली?' असा प्रश्न यामुळे उपस्थित करण्यात आला होता.

"व्हिडीओ मॉर्फ केलेला आहे"

या व्हायरल व्हिडीओवर संजय शिरसाट यांनी आपली भूमिका स्पष्ट केली होती. "हा व्हिडीओ माझ्या घरातीलच आहे, पण बॅगमध्ये पैसे नसून कपडे होते," असे त्यांनी सांगितले होते. नंतर त्यांनी हा व्हिडीओ मॉर्फ (बदललेला) केल्याचा दावा केला. तसेच, ते ठाकरे गटाचे नेते संजय राऊत यांच्याविरोधात अब्रुनुकसानीचा दावा दाखल करणार असल्याचेही म्हणाले होते.