VIDEO : पुण्यातील महिलेचा विचित्र प्रयोग, स्वतःच्या लघवीने डोळे धुतले, डॉक्टरांचा तीव्र इशारा

आजकाल सोशल मीडियावर अनेक विचित्र आणि चकित करणारे ट्रेंड व्हायरल होत असतात. काही ट्रेंड आरोग्यदायी असले तरी काहींचा थेट आरोग्यावर विपरित परिणाम होऊ शकतो. असाच एक वादग्रस्त व्हिडिओ सध्या इन्स्टाग्रामवर चर्चेत आला आहे, ज्यामध्ये पुण्यातील एका महिलेने स्वतःच्या मूत्राने डोळे धुतल्याचा दावा केला आहे. यावर नेत्रतज्ज्ञांनी तीव्र नाराजी व्यक्त करत लोकांना अशा प्रकारांपासून दूर राहण्याचा सल्ला दिला आहे.

नूपुर पिट्टी नावाच्या महिलेचा विचित्र दावा

पुण्यातील नूपुर पिट्टी नावाच्या महिलेला तिच्या स्वतःच्या "नेचरल हेल्थ ट्रेनिंग" आणि औषधविरहित जीवनशैलीसाठी ओळखले जाते. तिने इन्स्टाग्रामवर एक व्हिडीओ पोस्ट केला आहे, ज्यात ती दिवसाच्या पहिल्या मूत्राने आपले डोळे धुताना दिसते. तिचा दावा आहे की, या पद्धतीमुळे डोळ्यांची लालसरता, जळजळ आणि कोरडेपणा कमी होतो. तिने या कृतीस "निसर्गोपचार" म्हणत ती सातत्याने करत असल्याचे म्हटले आहे.

नेत्ररोग तज्ज्ञांचा स्पष्ट इशारा

या व्हिडीओला प्रतिसाद देताना नेत्रतज्ज्ञ डॉ. समिता मुळे यांनी जोरदार निषेध नोंदवला आहे. त्यांनी 27 जून रोजी एका पोस्टमध्ये म्हटले, "सकाळचे मूत्र कोणत्याही परिस्थितीत शुद्ध किंवा निर्जंतुक नसते. ते शरीरातील विविध समस्यांचे संकेत असू शकते - जसे अति जलसेवन, मधुमेह किंवा मूत्रपिंडातील बिघाड."

त्या पुढे म्हणाल्या, "डोळ्यांना मूत्रासारख्या अपायकारक द्रवात भिजवण्याची गरजच नाही. डोळे हे स्वतःच स्वच्छ राहतात. कोणत्याही अशा ट्रीटमेंटमुळे डोळ्यांना नुकसान होण्याची शक्यता अधिक असते."

डोळ्यांची काळजी घेण्यासाठी डॉक्टरांचा योग्य सल्ला

डॉ. समिता यांनी डोळ्यांच्या निगा राखण्यासाठी काही सुरक्षित मार्ग सांगितले. त्यात प्रिझर्व्हेटिव्ह-मुक्त, निर्जंतुक, लुब्रिकेटिंग आय ड्रॉप्सचा वापर करणं, जे नैसर्गिक अश्रूंशी सुसंगत असतात, हे महत्त्वाचे आहे. तसेच, डोळ्याभोवती स्वच्छ पाण्याने चेहरा धुणे आणि मेकअप वापरणाऱ्यांनी डोळ्यांसाठी खास तयार केलेल्या क्लिनिंग वाइप्स वापरणे हे अधिक प्रभावी आणि सुरक्षित उपाय आहेत.