माझ्यासाठी बलिदान देणाऱ्या 5 जणांच्या चरणी माझं यश अर्पण, पंकजा मुंडे भावूक

मुंबई : विधान परिषदेसाठी भाजपाच्या केंद्रीय समितीने पाच उमेदवारांची नावे जाहीर केली आहेत. यात विशेष पंकजा मुंडे, सदाभाऊ खोत, परिणय फुके, योगेश टीळेकर, अमित गोरखे यांच्या नावाचा समावेश आहे. पंकजा मुंडेंना विधानपरिषदेत संधी मिळाल्याने त्यांच्या कार्यकर्त्यांकडून जल्लोष साजरा केला जात आहे.आज पंकजा मुंडे आपला उमेदवारीचा अर्ज भरणार आहेत.

विधानपरिषदेच्या 11 जागांसाठी येत्या 12 जुलै रोजी मतदान होणार आहे. त्याच दिवशी निकालही जाहीर होणार आहे. त्याआधी पंकजा मुंडेंनी मुंबईतील श्री सिद्धिविनायकाचे दर्शन घेतले. त्यानंतर त्या वरळीत माध्यमांशी संवाद साधताना त्या भावूक झाल्याचे दिसून आले.

काय म्हणाल्या पंकजा मुंडे?

पंकजा मुंडे म्हणाल्या की, "मी आधी सिद्धीविनायकाचं दर्शन घेतलं आणि आता या लोकांना भेटायला आले. ज्यांनी कधीही मला क्षणभरदेखील स्वतःला, स्वतःच्या हृदयपासून दूर ठेवलं नाही. माझ्या सर्व वाईट काळात ते माझ्याबरोबर राहिले. त्यांचं दर्शन घेतलं आणि आता आईचं दर्शन घ्यायला चालले आहे. मग मी अर्ज दाखल करेन."मी माझे राष्ट्रीय अध्यक्ष जे. पी. नड्डा, गृहमंत्री अमित शाह, पंतप्रधान नरेंद्र मोदी, राज्यातील नेते देवेंद्र फडणवीस, भाजपाचे प्रदेशाध्यक्ष चंद्रशेखर बावनकुळे, सुधीर भाऊ,विनोद तावडे, रावसाहेब दानवे, भुपेंद्र यादव, आशिष शेलार या सर्वच सदस्यांचे आभार मानते, ज्यांनी माझं नाव सुचवलं. लोकांना प्रतिक्षा करावी लागली. मला हवंय ते करण्यापेक्षा लोकांना हवंय ते राजकारणात करायचं असतं. आता लोकांना हवंय ते झालंय, मी सर्वांचे आभार मानते.

माझं यश या पाच जणांना अर्पण

बीड लोकसभा निवडणुकीत पराभूत झाल्यानंतर पंकजा मुंडे यांच्या पाच कार्यकर्त्यांनी आत्महत्या केली. पराभव जिव्हारी लागल्याने त्यांनी टोकाचं पाऊल उचललं. याबद्दल बोलताना पंकजा मुंडे म्हणाल्या, "मला जीवनात जे काही मिळणार आहे, ते मी त्या पाच जीवांच्या चरणी अर्पण करते. ते आज असते तर त्यांनी घोषणाबाजी केली असती, परंतु ते आता नाहीत तर मला त्यांचं शल्य राहील. मी त्यांना माझं हे यश मी समर्पित करते", असंही त्या म्हणाल्या.

माझ्या प्रत्येक संघर्षात मुंडे साहेब आहेत

माझ्या प्रत्येक संघर्षात मुंडे आहेतच.या सर्वांच्या घोषणत आहेत, या सर्वांच्या कष्टात आहेत, माझ्या परिश्रमात आहेत.आमच्या सगळ्याच्या संस्कारात आहेत.ते तर सदैव राहतील.आजच्या माझ्या कार्यकर्त्यांनी माझ्यासाठी केलं त्याला आणि ज्यांनी स्वत:चा प्राण ही दिला त्या सगळ्यांना हे समर्पित करते.

देवेंद्र फडणवीस यांनी मानले केंद्रीय समितीचे आभार

या पार्श्वभूमीवर राज्याचे उपमुख्यमंत्री देवेंद्र फडणवीस यांनी पुण्यात माध्यमांच्या प्रतिनिधी बोलताना आपली प्रतिक्रिया दिली आहे.पंकजा मुंडे यांना विधान परिषदेची उमेदवारी केंद्राने जाहीर केलीय, याचा आनंद आहे. पंकजाताईंना विधान परिषदेत स्थान दिले जावे,असा आमच्या सगळ्यांचा आग्रह होता. तो भाजप केंद्रीय समितीने मान्य केला. त्याबद्दल मी आभार मानतो, अशी प्रतिक्रिया उपमुख्यमंत्री देवेंद्र फडणवीस यांनी दिली आहे.