मुंबई विद्यापीठाच्या सिनेट निवडणुकीत ठाकरेंचाच बोलबाला; 10 पैकी 7 जागा युवासेनेने जिंकल्या

Mumbai University Senate Elections : कोर्टकचेरी यामुळे बरेच दिवस लांबलेल्या मुंबई विद्यापीठाच्या सिनेटच्या निवडणुकीमध्ये अखेर युवासेनेने जोरदार मुसंडी मारली आहे. तर भाजपाप्रणित विद्यार्थी संघटना असलेल्या अभाविपचा या निवडणुकीत धुव्वा उडाला आहे.

सिनेटच्या 10 जागांपैकी 7 जागांवर युवासेनेच्या उमेदवारांनी विजय मिळवला आहे. तर उर्वरित जागांवरही युवासेनेचेच उमेदवार आघाडीवर असल्याची माहिती मिळाली आहे.

मुंबई विद्यापीठाच्या सिनेटची निवडणूक ही युवासेना आणि अभाविपने प्रतिष्ठेची केली होती. तसेच या निवडणुकीवरून दोन्हीकडून न्यायालयीन लढाईही लढली गेली होती. अखेरीस नुकत्याच झालेल्या मतदानानंतर आज मतमोजणीची प्रक्रिया पार पडली. आणि त्यामध्ये युवासेनेच्या उमेदवारांनी जोरदार मुसंडी मारली. सिनेटच्या राखीव गटात युवासेनेच्या पाचपैकी पाच उमेदवारांना विजय मिळाला आहे. तर खुल्या गटामध्येही युवासेनेचे दोन उमेदवार विजयी झाले आहेत.

राखीव गटामधून युवासेनेच्या विजयी झालेल्या उमेदवारांमध्ये मयूर पांचाळ, स्नेहा गवळी, शीतल देवरुखकर, धनराज कोचहाडे, शशिकांत झोरे यांचा समावेश आहे. तर खुल्या गटामधून युवासेनेचे प्रदीप सावंत आणि मिलिंद साटम हे विजयी झाले आहेत. याशिवाय खुल्या गटामधून युवासेनेचे इतर तीन उमेदवार हे आघाडीवर असल्याची माहिती मिळत आहे. मुंबई विद्यापीठ सिनेट निवडणुकीत युवासेनेच्या शशिकांत झोरे यांची हॅट्ट्रिक, राखीव मतदारसंघातील सर्व पाचही उमेदवार विजयी !!

राखीव मतदारसंघ
DTNT
शशिकांत झोरे 5170
अजिंक्य जाधव 1066
SC.
शीतल देवरूखकर 5498
राजेंद्र सयगावकर 1014
ST
धनराज कोहचाडे 5247
निशा सावरा 924
OBC
मयूर पांचाळ 5350
राजेश भुजबळ 888
Women
स्नेहा गवळी 5014
रेणुका ठाकूर 883