आरे ते वरळी मेट्रो सेवा एप्रिलमध्ये सुरु होईल? मुंबईकरांसाठी ३० मिनिटांत प्रवास, समोर आली नवी अपडेट

मुंबईतील अ‍ॅक्वा लाईन मेट्रोच्या दुसऱ्या टप्प्याची म्हणजेच मेट्रो लाईन- ३ ची घोषणा मुख्यमंत्री देवेंद्र फडणवीस यांनी नुकतीच केली होती. आता मेट्रो लाईन ३ च्या फेज २ च्या उद्घाटनाच्या संभाव्य तारखेबद्दल चर्चा सुरु झाल्या आहेत. काही मिडिया हाऊसच्या म्हणण्यांनुसार एप्रिलच्या दुसऱ्या आठवड्यात या मार्गाचे उद्धाटन होईल.

२२ किलोमिटरचा टप्पा

मेट्रो लाईन ३ चा दुसरा टप्पा हा आरे ते आचार्य अत्रे चौक (वरळी) यांना जोडणारा मुंबईचा पहिला भूमिगत मेट्रो कॉरिडॉर असेल. हा कॉरिडॉर सुमारे २२ किमी लांबीचा असणार आहे. मेट्रो लाईन ३ चा दुसरा टप्पा कार्यान्वित झाल्यानंतर, मुंबईतील प्रमुख भागात वाहतूक कोंडीची समस्या लक्षणीयरीत्या कमी होईल, असा दावा केला जात आहे. मुंबईतील कुलाबा-वांद्रे-सीप्झ मार्गावर मेट्रो सेवा सुरू करण्याची तारीख मुख्यमंत्र्यांनी जाहीर केली आहे.

कधी सुरू होऊ शकतो?

मीडिया रिपोर्टनुसार, मेट्रो लाईन ३ (अ‍ॅक्वा लाईन मेट्रो) चा दुसरा टप्पा आरे आणि वरळी दरम्यान सुरू होणार आहे. ही मेट्रो लाईन १० एप्रिलपासून सुरू होऊ शकते. सध्या, आरे आणि वांद्रे-कुर्ला कॉम्प्लेक्स (बीकेसी) दरम्यानच्या फेज १ मध्ये या मेट्रो मार्गावर मेट्रो ट्रेन धावतात. आरे आणि वरळी दरम्यान मेट्रो सेवा पुन्हा सुरू झाल्यामुळे लेडी जमशेदजी रोड आणि डॉ. अ‍ॅनी बेझंट रोड सारख्या जड वाहतुकीच्या भागातून प्रवास करणाऱ्या प्रवाशांना मोठा दिलासा मिळेल. यामुळे, धारावी, दादर, सिद्धिविनायक, सीप्झ, एमआयडीसी, अंधेरी-कुर्ला रोड, बीकेसी आणि वरळी यासारख्या भागात प्रवास करणे देखील पूर्वीपेक्षा सोपे होईल.

प्रवास होईल जलद

मेट्रो लाईन ३ च्या दुसऱ्या टप्प्याच्या शुभारंभानंतर सेंट मायकल चर्च, हजरत मखदुम फकीह अली महिमी तीर्थक्षेत्र, शीतलादेवी मंदिर आणि सिद्धिविनायक मंदिर इत्यादी अनेक धार्मिक स्थळांना भेट देणे पूर्वीपेक्षा सोपे होईल. आता मुंबई मेट्रोमध्ये कमी अंतराची मेट्रो सेवा उपलब्ध होणार आहे. मुंबई मेट्रो लाईन ३ च्या फेज ३ च्या शुभारंभानंतर, प्रवाशांना वाहतूक कोंडीसारख्या समस्यांशिवाय फक्त ₹ १० ते ₹ ६० भाडे देऊन या मार्गावर फक्त ३० मिनिटांत प्रवास करता येईल.