मुंबईतील लीलावती रुग्णालय नेमकं कशामुळे चर्चेत आले? काळी जादू, घोटाळा, ईडी.. नेमका प्रकार काय?

मुंबईतील लीलावती हाँस्पिटल हे घोटाळा आणि काळ्या जादू प्रकरणामुळे चर्चेत आले. मुंबईतील वांद्रे पोलिस स्टेशनमध्ये याबाबत तक्रार नोंदविण्यात आली आहे. सध्याचे विश्वस्त प्रशांत मेहता यांनी केलेल्या आरोपांवर आता चेतन मेहता यांनीही प्रतिक्रिया दिली आहे. चेतन मेहता यांचे वकील सिमरन सिंग यांनी हे आरोप फेटाळत एक प्रसिद्धी पत्रक दिले आहे. त्यात प्रशांत मेहता यांनी केलेले आरोप हे निराधार आणि द्वेषपूर्ण असल्याचे सांगण्यात आले आहे.

काय होता आरोप

प्रशांत मेहता यांनी या प्रकारांबाबत मोठे आरोप केले. ते म्हणाले की, काळी जादू आणि गूढ प्रथांसाठी वांद्रे पोलिस ठाण्यात दाखल केलेल्या आमच्या तक्रारीच्या आधारे दंडाधिकाऱ्यांसमोर कार्यवाही प्रलंबित आहे. रुग्णालयाच्या परिसरात काळ्या जादूचे विधीही केले जात असल्याचा दावा त्यांनी केला. आम्हाला मानवी केस आणि कवट्या असलेले सातपेक्षा जास्त कलश सापडले आहेत.

रुग्णालयात सापडले पुरावे

रुग्णालयाचे कार्यकारी संचालक आणि माजी मुंबई पोलिस आयुक्त परमबीर सिंह म्हणाले की, विश्वस्तांनी रुग्णालयात काळी जादू केली जात असल्याचे म्हटले आहे. ते म्हणाले, "काही कर्मचाऱ्यांनी सांगितले की काळ्या जादूशी संबंधित वस्तू सध्याच्या विश्वस्तांच्या कार्यालयाच्या जमिनीखाली ठेवल्या होत्या. ही माहिती मिळाल्यानंतर, साक्षीदारांच्या उपस्थितीत आणि व्हिडिओ रेकॉर्डिंग अंतर्गत फरशी खोदण्यात आली, ज्यामध्ये आठ कलश सापडले. या कलशांमध्ये मानवी अवशेष, हाडे, केस, तांदूळ आणि काळ्या जादूमध्ये वापरल्या जाणाऱ्या इतर वस्तू होत्या.

विश्वस्तांनी आरोप फेटाळले

बेकायदेशीर नियुक्त्यांविरुद्ध सुरू असलेल्या कार्यवाहीतून माघार घेण्यासाठी दबाव निर्माण करणे हा यामागील उद्देश आहे, असे चेतन मेहता यांच्या वकील सिमरन सिंग यांचे म्हणणे आहे. सिमरन सिंग म्हणाल्या की, सप्टेंबर २०२४ मध्ये धर्मादाय आयुक्तांनी माझ्या अशिलाचे कायमस्वरूपी विश्वस्त म्हणून स्थान कायम ठेवले होते. कायमस्वरूपी विश्वस्तांच्या नियुक्तीला विद्यमान विश्वस्तांनी आव्हान दिले आहे. सर्वोच्च न्यायालयाच्या अलीकडील आदेशात, धर्मादाय आयुक्तांना प्रलंबित प्रकरणे वेळेत निकाली काढण्याचे निर्देश देण्यात आले आहेत. आता एक मीडिया मोहीम सुरू करण्यात आली आहे. मीडिया मोहीम म्हणजे माझ्या अशिलाची प्रतिमा मलिन करण्याचा प्रयत्न आहे.

दुसऱ्या बाजूने आरोपांवर भाष्य

आरबीआयच्या परिपत्रकांमध्ये आणि मार्गदर्शक तत्त्वांमध्ये स्पष्ट केल्याप्रमाणे. एचडीएफसीने त्यांच्याविरुद्ध दिवाळखोरीची कारवाई दाखल केली आहे. त्याला अंमलबजावणी संचालनालय आणि केंद्रीय अन्वेषण विभागाकडून चौकशीचा सामना करावा लागला आहे. आर्थिक अनियमिततेबद्दल त्याच्याविरुद्ध अनेक खटले सुरू आहेत. कर्ज वसुली न्यायाधिकरणाने सार्वजनिक पैशाच्या अपहाराचा निषेध करणारा सविस्तर आदेश पारित केला आहे. राजेश मेहता यांच्याविरुद्ध रेड कॉर्नर नोटीस जारी करण्यात आल्याचे आम्हाला समजते, असेही सिमरन सिंग यांनी म्हटले आहे.