मुंबई महापालिकेची सामान्यांसाठी 'म्हाडा' स्टाईल घरांची योजना; क्रीम लोकेशनला घर, कसा कराल अर्ज!

BMC Housing Lottery Mumbai News : मुंबई सारख्या मेट्रो सिटीत घर घेण्याचे स्वप्न पाहणाऱ्या नागरिकांसाठी एक मोठी आनंदाची बातमी आहे. मुंबई महानगरपालिकेने आता 'म्हाडा'च्या धर्तीवर परवडणारी घरे उपलब्ध करून देण्याचा महत्त्वपूर्ण निर्णय घेतला आहे.

विकास नियंत्रण नियमावली (DCPR) 15 नुसार विकासकांकडून रोख प्रीमियमऐवजी थेट घरे स्वीकारण्यास महापालिकेने सुरुवात केली आहे. या घरांची लॉटरी पद्धतीने विक्री दिवाळीनंतर करण्यात येणार आहे.

426 घरांसाठी अर्ज प्रक्रिया लवकरच सुरू

महापालिकेला विकासकांकडून एकूण 426 घरे प्राप्त झाली आहेत, जी सर्वसामान्य नागरिकांसाठी खुली केली जाणार आहेत.

कधी सुरू होणार अर्ज?

पुढील आठवड्यापासून या घरांसाठी महापालिकेच्या संकेतस्थळावरून ऑनलाइन अर्ज प्रक्रिया सुरू होईल.

घरांचे आकारमान: ही घरे 270 ते 528 चौरस फूट क्षेत्रफळाची असतील.

किंमत : या घरांची अंदाजे किंमत 60 लाख ते 1 कोटी रुपयांच्या दरम्यान असणार आहे.

महापालिकेला महसूल : या विक्रीतून महापालिकेला 300 कोटी रुपयांपेक्षा अधिक महसूल मिळण्याची शक्यता आहे.

अल्प आणि अत्यल्प उत्पन्न गटासाठी सुवर्णसंधी

या योजनेत घर खरेदीसाठी अर्ज करण्याची संधी केवळ विशिष्ट उत्पन्न गटातील नागरिकांनाच मिळणार आहे.

उत्पन्न गट वार्षिक उत्पन्न मर्यादा किती?

• अत्यल्प उत्पन्न गट 6 लाख रुपयांपर्यंत
• अल्प उत्पन्न गट 9 लाख रुपयांपर्यंत

या दोन्ही गटातील नागरिक अर्ज करण्यासाठी पात्र असतील. विशेष म्हणजे, म्हाडाप्रमाणेच या लॉटरी प्रक्रियेत स्वातंत्र्यसैनिक, अपंग आणि इतर विशेष गटांसाठी राखीव कोटा ठेवण्यात येईल.

मुंबईतील 'या' उच्चभ्रू भागांत मिळणार घर

ही घरे मुंबईतील विविध महत्त्वाच्या आणि उच्चभ्रू परिसरात उपलब्ध असतील. यामुळे कमी दरात मुंबईत स्वतःचे हक्काचे घर घेण्याची ही एक सुवर्णसंधी आहे.

विभाग उपविभाग घरांची संख्या (अंदाजित)

• पूर्व उपनगर भांडुप पश्चिम सर्वाधिक 270 घरे
• कांजुरमार्ग उर्वरित घरे
• पश्चिम उपनगर अंधेरी पूर्व उर्वरित घरे
• कांदिवली पूर्व-पश्चिम उर्वरित घरे
• दहिसर, गोरेगाव, जोगेश्वरी उर्वरित घरे

शहर भाग भायखळा उर्वरित घरे

भायखळ्यातील घरे आकाराने लहान असली तरी त्यांच्या किमती तुलनेने जास्त असतील, तर उपनगरांमध्ये अधिक प्रशस्त आणि कमी दरातील पर्याय उपलब्ध होतील.

महापालिकेचा हा नवा उपक्रम मुंबईतील मध्यम आणि निम्न उत्पन्न गटातील नागरिकांना परवडणारी, कायदेशीर आणि सुरक्षित घरं मिळवून देण्यात मोठा बदल घडवू शकतो.