डेटिंग अ‍ॅप वापरत असाल तर सावधान ! तरुणांची फसवणूक; टोळीचं भयंकर कृत्य उघडकीस

मुंबईत डेटिंग अ‍ॅपच्या माध्यमातून तरुणांना गंडवणाऱ्या एका संगनमताच्या टोळीचा पर्दाफाश झाला आहे. ही टोळी तरुणांशी ऑनलाईन मैत्री करून त्यांना हॉटेलमध्ये बोलावून अवाजवी बिलं आकारत होती. एका तरुणाच्या सावधपणामुळे हे संपूर्ण फसवणूक प्रकरण उघडकीस आले असून पोलिसांनी २१ जणांना अटक केली आहे, यामध्ये ६ महिलांचाही समावेश आहे.

फसवणुकीचा योजनाबद्ध प्रकार

टोळीतील महिलांचं काम ठराविक पद्धतीने सुरू असायचं. त्या विविध डेटिंग अ‍ॅप्सवर तरुणांशी ओळख करून त्यांच्याशी मैत्री प्रस्थापित करायच्या. काही दिवस संवाद साधल्यानंतर त्या तरुणांना रेस्टॉरंटमध्ये भेटायला बोलवायच्या. पण ही रेस्टॉरंट्स देखील या टोळीच्या नियंत्रणाखाली असायची. वेटर, मेन्यू, किंमती - सगळं आधीच ठरवलेलं असे.

जेव्हा तरुण तिथे पोहोचायचा, तेव्हा महिला महागड्या पदार्थांची ऑर्डर द्यायच्या आणि शेवटी त्याच्यावर हजारोंचं बनावट बिल लादलं जायचं. त्यानंतर हॉटेलचे कर्मचारी धमकी देऊन पैसे उकळायचे.

बोरीवलीतील घटनेने उघड झालं रॅकेट

बोरीवलीत राहणाऱ्या २२ वर्षीय तरुणाशी 'दिशा' नावाच्या महिलेची डेटिंग अ‍ॅपवरून ओळख झाली. काही वेळातच ते दोघं एका हॉटेलमध्ये भेटले. त्या वेळी दारू, हुक्का आणि एनर्जी ड्रिंक्सची ऑर्डर देण्यात आली. जेव्हा बिल आलं, तेव्हा ते तब्बल ३५,००० रुपये होतं. तरुणाने पैसे देण्यास नकार दिला, तेव्हा हॉटेलमधील कर्मचाऱ्यांनी त्याला धमकावण्यास सुरुवात केली.

त्याने तत्काळ पोलिसांना कॉल केला. पोलिस आल्यानंतर बिलाची रक्कम ३०,००० रुपये करण्यात आली. दिशाने अर्धं बिल देण्याचं सांगितलं, आणि त्या तरुणाकडून १५,००० रुपये घेतले गेले. मात्र, घरी गेल्यावर त्याला लक्षात आलं की पैसे हॉटेलच्या खात्यात न जाता एका खाजगी UPI आयडीवर ट्रान्सफर झाले होते.

तरुणाची तक्रार आणि पोलिसांचा तपास

या प्रकाराचा संशय आल्यावर तरुणाने पोलिसांकडे तक्रार दाखल केली. तपासात दिशाचे कॉल रेकॉर्ड्स, UPI व्यवहार तपासले गेले आणि फसवणुकीचं संपूर्ण रॅकेट समोर आलं. पोलिसांनी केलेल्या कारवाईत २१ जणांना अटक करण्यात आली असून, त्यात ६ महिलांचा समावेश आहे.

फसवणुकीचं मोठं जाळं

या टोळीचं काम अतिशय योजनाबद्ध पद्धतीने सुरू होतं. डेटिंग अ‍ॅपवरून युवकांची माहिती मिळवून, त्यांना विशिष्ट हॉटेलमध्ये बोलावून, त्यांच्याकडून जबरदस्तीने पैसे उकळणं हेच त्यांचं मुख्य उद्दिष्ट होतं. पोलिसांकडून आता या प्रकरणाचा सखोल तपास सुरू असून इतर पीडितांचीही माहिती घेतली जात आहे.