Mumbai Accident News : पाण्याच्या टाकीत गुदमरुन 4 कामगारांचा मृत्यू, नागपाडा परिसरातील थरारक घटना

Mumbai Accident News : मुंबईतून मोठी धक्कादायक बातमी समोर आली आहे. मुंबईच्या नागपाडा भागात 4 मजुरांचा गुदमरुन मृत्यू झाला.

मिळालेल्या माहितीनुसार, पाण्याची टाकी साफ करण्यासाठी टाकीत उतरलेल्या 4 मजुरांचा गुदमरून मृत्यू झाला आहे. बांधकाम सुरू असलेल्या इमारतीमध्ये हा धक्कादायक प्रकार घडला आहे.

पाण्याची टाकी साफ करण्यासाठी मजूर टाकीमध्ये उतरले होते. मात्र, जीव गुदमरल्यानं त्यांना अस्वस्थ वाटू लागलं. त्यानंतर त्यांना तातडीनं अग्निशमन दलाच्या मदतीनं बाहेर काढून मुंबईच्या जे.जे. रुग्णालयात दाखल करण्यात आलं. मात्र, डॉक्टरांनी त्यांना तपासून मृत घोषीत केलं आहे. या घटनेने एकच खळबळ उडाली आहे.

कशी घडली नेमकी घटना?

मुंबईतील नागपाडा येथील मिंट रोडवरील गुड लक मोटर ट्रेनिंग स्कूलजवळील एका बांधकामाधीन इमारतीच्या पाण्याच्या टाकीची साफसफाई करताना गुदमरून 4 कामगारांचा मृत्यू झाला. बृहन्मुंबई महानगरपालिकानुसार, आज दुपारी साडे बारा वाजेच्या सुमारास नागपाडा येथील बिस्मिल्लाह स्पेस बिल्डिंगमध्ये काही कामगार पाण्याची टाकी साफ करत असताना ही घटना घडल्याचे सांगितले जात आहे.

महानगरपालिकेच्या अधिकाऱ्यांनी सांगितले की, घटनेची माहिती मिळताच त्यांनी तात्काळ घटनास्थळी पोहोचून कामगारांना पाण्याच्या टाकीतून बाहेर काढले. बीएमसीच्या एका अधिकाऱ्याने सांगितले की, ही घटना बिस्मिल्लाह स्पेस बिल्डिंगमध्ये घडली, जी नागपाडा परिसरातील दिमटिमकर रोडवरील गुड लक मोटर ट्रेनिंग स्कूलजवळ आहे. मुंबई अग्निशमन दलाने कामगारांना उपचारासाठी जेजे रुग्णालयात नेले, जिथे डॉक्टरांनी त्यापैकी 4 जणांना मृत घोषित केले.

या घटनेवर पोलिस काय म्हणाले?

या घटनेची माहिती देताना मुंबई पोलिसांनी सांगितले की, आज दुपारी बारा वाजेच्या सुमारास, जेजे मार्ग पोलिस स्टेशन अंतर्गत मस्तान तलब जवळील दिमटिमकर रोडवरील बिस्मिल्लाह स्पेस नावाच्या एका बांधकामाधीन इमारतीत काही कामासाठी भूमिगत पाण्याच्या टाकीत शिरलेल्या 4 कामगारांना गुदमरल्यामुळे मृतावस्थेत आढळले. पाचवा व्यक्ती ठीक आहे, त्याला जेजे रुग्णालयात दाखल करण्यात आले आहे. आमच्याकडून पुढील तपास केला जात आहे.